وش افضل النعيمي او الحري

[أحمد4156]

كلها نعمه وخير من الله النجدي ممتاز لكن كثير خراريج والحري لحمه طيب لكن على الصحن لك عليه النعيمي البري مافي بعده زاكي لحم وشحم ونظيف ويجملك بالمفطح

[شوزن نص]

الحري ازين بكثير من النعيمي خاصتا اذا كان بالغربيه يم ديار الحروب ""اذا تبي تبيض وجهك مع الضيوف قلطهم على حري""

[خالداللهيبي (ابو احمد)]

اقول الحري اللي في الطليعه والنعيمي الله يعز النعمه والسعر اكبر دليل
اما الخراريج والامراض كلها ماتسلم

الحري بالحجاز مافيه مثله ومالوم اللي ماذاق غير النعيمي لانه ماشاف ولايعرف لايتعجل ويحكم
اقول اسالوا اهل المطابخ واهل الخبره

تحياتي

[خالداللهيبي (ابو احمد)]

اذا كنت تتكلم عن الحري حق الحجاز الشبية بالنجدي والقصير القامة في ديار طريق المدينة امثال عسفان وغران وحجر وغيرها من ديار حرب فلا يوجد ذبايح مثلهن علي وجة الأرض اما اذا كان حري الجنوب فالله يكرم النعمة

بيض الله وجهك اوردت المفيد
وانا استغرب من اللي ماذاقها ويحكم
بالنسبه لحريات الجنوب مااعرف وش المقصود
بس الرفيدي الله يعز النعمه

[بدرالرياض]

للبيت ( الثلاجة) الحري
للضيوف النعيمي

[ابوالفهد]

ما بعد شريت الي ها الحين الاحسن هو ما تصاغرت في العمر وتجازلت في العافيه من نعيمي او حري او نجدي وهو الافضل او تيس لوكان بربري مولود هنا طيب واهم شيء ما تأكل مكعبات الوافي وما شابهه و ما ابي الهرج يطول علي النجدي والساكني مثل الخرج ما بها هرج ودمتم بود بلا حري ولا نعيمي

[سلطان11]

الاحسن هو الحري

[خالداللهيبي (ابو احمد)]

سالت راعي مطبخ للولايم يقول الحري وحلف ان الحري من طيبه
يقول ناخذ الزايد من مرقته ونخليها بالثلاجه
لبعض الذبايح الهزلا نزيد منه

ويقول شحم الحري يجي من يشريه من اهل المطاعم يفرمونه من اللحم للكباب من طيبه
الحري ياجماعه ماهو مثل الذابايح
ويقول اما غيرها ماحد سال عنه ذبيحه عاديه

[تربة الشمال]

بالنسبه لي النعيمي افضل من ناحية النظافه والطعم وبعدين يقول المثل( يدلك على السلع اثمنهاء )
والنعيمي الحين في السوق هو الذي سعرة اغلا وتحياتي لكم

[aglanco]

الي يقلك الأفضل حري الجنوب غلطان ومعروف الحري جهة ديار حرب وسليم ومطيروالحجاز كله والدليل اسعارها ولحمها احمرمايل للبياض والله ياعليه طعم عني انا ذبايح الثلاجه والضيفان والعزايم مستحيل احط غير الحري حتى في زواجاتنا

يالشيخ 900
اسمع العلم وخلك من كلام غيرك
وش تعرف من حريات الجنوب؟؟؟
انا مجرب النعيمي وقلت رأيي فيه
و
مجرب الحري وقلت رأيي فيه
حددت الحريات بدياركم والديار اللي حولكم
ليه حريات الجنوب "خنازير" اجلكم الله
من جيزان الى جدة كلها حريات
اي ديرة بالجنوب،، ولا الساحل جربت الحري عندهم ؟؟؟
خذ الصورة هذي واعطنا رأيك



+


.................

[ماجدالعمري]

وش جاب لجاب الله يهديكم

النعيمي رقم واحد بالجزيره العربيه

واراهن الي بيتحداني


الحري والنجدي ماتسلم من الامراض المزمنه مثل السمال والجرب والطواليع

لدرجه قبل مده قلط عندنا ضيف وذبحنا له حري والحري مفتشينه مضبوط وسليم من الطواليع

ويوم قلطنا الصحن عند الضيف انفجر الطالوع ؟؟؟؟؟؟؟؟؟؟؟؟؟؟؟؟؟؟


هذا سبب قوي يرجح النعيمي على غيره

النعيمي من النادر يجي فيه طوالع

بينما العكس مع النجدي والحري فمن النادر ان يسلم من الطواليع
هذي وجهة نظري وكلن له وجهة نظر

قال وش دراك انها ....قال من كبرها

[أبو جراح11]

بعض الأخوان يدافع عن نوع معين من الحيوانات وكأنة يملكها لوحدة
ولآيقبل الرئي الأخر برحابة صدر
وياويلك تسب النوع الي يحبة
ياجماعة الخير كبرو الجمجمة شوي 00
الله يهدي الجميع00

[عبدالله.q8]

النعيمي متفوق وبمراحل

[الخولاني]

النعيمي ممتاز جدا
والحري اللي من الطايف يا سلام ايضا زبدة
والحري اللي من الجنوب البلدي المربى اللي ماهو مهرب من اليمن هذا عز الطلب
والنجدي النظيف ايضا قشطة

طبعا يحكم في كل ما قلت المرعى والعناية والسن والجو
وطبعا النقوة هي اللي لحمها ومرقها وشكلها يبيض الوجه

خلاصة كلها من نعم ربي وفي كل ديرة تلقى الزين واللي دونه

[راعي الاقطم]

١- النجدي النظيف ( اي شعره سودا افضل لحم )

لو يحصل حري حري اسود ياسلام

او نعيمي اسود ......

...............
أفضلها: أفضل الأضحية ما كانت كبشاً أملح أقرن، إذ هذا هو الوصف الذي استحبه الرسول صلى الله عليه وسلم وضحى به كما أخرج البخاري ومسلم في صحيحهما عن أنس أن النبي صلى الله عليه وسلم: «ضحى بكبشين أملحين أقرنين..» الحديث [البخاري:5558 ومسلم:1966] وفُسّر الأملح بأنه الأبيض الذي يخالطه سواد كما جاء عند مسلم 1967 أن رسول الله صلى الله عليه وسلم «أمر بكبش أقرن يطأ في سواد، ويبرك في سواد، وينظر في سواد..» الحديث [مسلم: شرح النووي 13105] قال النووي: "معناه أن قوائمه وبطنه وما حول عينيه أسود والله أعلم". أهـ.