السلام عليكم

قررنا نشتري سيارة للعائلة ، قلنا يا ولد خلنا نتوسع العيال كبرت وضاقت علينا السيارة القديمة . وطاح الخيار على اكسبديشن موديل 2012، توكلنا على الله وجمعنا الدراهم ودفعت عربون بالوكالة يوم الثلاثاء الماضي 13/4/1433هـ وكملنا المبلغ يوم الأربعاء 14/4/1433هـ وإلى اليوم ما استلمنا السيارة .
المره الأولى قالوا السيارة بجدة بتتأخر يومين إلى 3 أيام .. ما فيه اللون اللي طلبته علماً بأني طالب لون أبيض وما فيه أحد يرغبه .. قلنا ما يخالف .
المره الثانية قالوا: السيارة في الخرج (المستودع هناك) يعني راحت من جده للخرج ليش ؟؟ وليش ما جت للرياض مباشرة ؟ قالوا: ضروري تمر على المستودع على يفكون التربيط مدري أيش .
المره الثالثة قالوا: معليش صار فيه خطأ مدري غلط في الطلبية .

وكملنا اسبوع ما حولك أحد والمشكلة أن عندي مناسبة عائلية يوم الأربعاء قلنا بنكشخ يا ولد وخلي الأولاد ينبسطون لكن للأسف توكيلات الجزيرة ما همها خدمة الزبون ، كلمتهم هذا اليوم وقالوا: إحتمال يوم الخميس .. معقولة يا جماعة الخير هالمماطلة ؟؟؟

يعني لو أني رايح وشاري الموتر من النسيم أو الشفاء كان في خلال أقل من 24 ساعة وأنا خالص ...

لكن ما أقول إلا الشكوى لله ...