شارك معنا في كيفيية طريقة صيد الشعري

[gulfhunter]

السلام عليكم ورحمة الله وبركاته

الله يمسيكم بالخير اخواني اعضاء مكشات وزوار الخيمه البحريه

اليوم موضوعنا هو صيد سمكة الشعري ونشوف طرق صيده بمختلف المناطق

الحداق

وبالنسبه إلى الحداق يوجد طريقتين للحداق الأولى الطرحه والثانيه سمار

طبعاً الأولى الطرحه وهذي الطريقه ممتعه للحداق وبالنسبه لى شخصياً ..... طبعاً يكون الميدار اولاً ومن ثم البلد يعني ترديعه ويكون طوله معتدل

الطريقه الثانيه وهي سماري وهي معروفه لدى الكثيرين ويفضل ميدارين وتختلف من شخص إلى شخص يكون البلد اولاً ومن ثم الميدارين أو يكون البلد بين الميدارين

الغزل

يكثر صيد الشعري بالغزل في الشتاء لتفضيل كثير من الصيادين وضع الغزل على القطع
أيضاً يعتبر الشعري من اكثر السمك تواجداً في اي مكان سواءً كان صيف ام شتاء

المد (الشكه)

ايضاً من السهل صيد الشعري بالمد وكثير ماصدنا الشعري بالمد وطريقة المد تكون متشابه بطريقة صيد السبيطي لايوجد اختلاف

طبعاً لازم نذكر الطعم (اليمه)

اولاً الخثاق على طول السنه
الربيان
الميد
وصلاخة الدويلمه او الوحره






واتمنى من الجميع المشاركه وبالنسبه إلى الأخوان إذا نسيت شي ياريت لو تضيفون اللي عندكم

تحياتي للجميع

[بو راشـد]

السلام عليكم ورحمة الله وبركاته
يشرفني أن أكون أول الأعضاء الي يشاركون في هلموضوع القيم.
طريقه حداق الشعري سمار وله طرحه. الطريقه المستعمله خيط بو 70 عمل ركه وهي الميدار اول الخيط ومن ثم البلد ولاكن قبل البلد بقليل ضع مدور صغير وجوفو شلون الصيد. طريقه وضع الطعم (اليم) لا تجعل الطعم عريض او كبير جدا لأنه الخيط بيخترب(بيحتاس) ولاكن قطع الطعم قطع صغيره ومعتدله وشكهم في الميدار(مثل ما تشك اللحم في سيخ الشواي) وإذا بقيت الأحسن أخلط مع الطعم بعض القطع من السمك سلس, دويلمي....... ولاكن أجعلها مثل قطع الخثاق (الحبار) ألي قطعته وخلطها وأنت تشك الطعم.

تحياتي لكم وصيد موفق أنشاء الله.....................................

[الخليج]

وعليكم السلام ورحمة الله وبركاته
مشرفنا بوعبدالله
الشعري من الاسملك المرغوبة بالمملكة وطريقة صيده بالخيط كلاتي :
1-الخيط اي حجم لانه غير حذر 0
2- الطعم ربيانه طازجه +منكوسه صغيرة +زورية صغيرة +صلاخ الميد +الخثاق
3-الميدار من 10 وتحت مع بلد كما قال بوراشد
4- طعم الشعري بالاكل لذيذ اذا لم يثلج
5- فيه نوعين من الشعري يشبهون بعض نوعا ما واحد لحمه يابس والثاني طري لذيذ والحداق اللي يعرف ذلك يصيد في مكان واحد واذا طلعت له الشعرية الغير مرغوبه رماها بالبحر
6- متواجد على طول السنة
7- كلام بو راشد فيه من فوائد التي يشكر عليها
هذا مابحوزتنا بالنسبة للشعري وصيدا موفق بإذن الله،،،،،،

[gulfhunter]

السلام عليكم ورحمة الله وبركاته

حياكم اخواني ابوراشد والخليج

مشكورين اخواني على المشاركه المفيده واثراء الموضوع

اخوي الخليج النوع اللي تقصده وهو اليماه وتجي عيونه كبيره وملمسه اقسى نعم من تصيده رجع بحر

تحياتي لكم وللجميع

[هاوي البحر]

السلام عليكم
عندي سؤالين
1)ماهو المقصود بـ مدور صغير ؟ في رد أبو رشد
2)ماهو المقصود بـ زورية صغيرة ؟ في رد النوخدة

وسلامتكم ..

[بو راشـد]

السلام عليكم ورحمه الله وبركاتة
أشكر أخوي الخليج على معلوماته القيمه وكما أشكر أخوي بوعبدالله على طرحه هذا الموضوع.
أخوي هاوي بحر أهلا بك وحياك الله وأما عن سؤالك فهذه الصوره أنشاء الله تفيدك.

[دمي بحر]

بعض انواع الشعري

سولي،ابوشويه(كوية)،ابو قفشة ،شحدود

بس عندي سؤالين
1- وش سالفة الخط الاحمر
2-كيف نعرف الشعري الغير مرغوب فيه

[النموذجي]

السلام عليكم ورحمة الله وبركاته

من اجود انواع الشعري الموجود في الدمام شعري منطقة النيوه والوشير
بصراحه كل ماصغرة الجيم تصغر الشعريه وكل ما كبرتها ابشر بذيك البلايه من الشعري
وافضل جيم ( طعم ) الخثاق وسلامتكم

اخوكم النموذجي

[أبو ستري]

نصيده عن طريق الشكة والخيط , عن طريق الشكة يكون الطعم ( خثاق ) ومثل ما قال البعض سمعت أنه يموت على الدويلمي كطعم ..


صورة خاصة من منطقة رأس بو قميص ..

[بو راشـد]

السلام عليكم ورحمة الله وبركاته
بنسبه لسؤالك أخوي دمي بحر أشلون أتعرف الشعري ألي يصلح ولي مايصلح الطريقة السهله هي عندما تصيدة تكون رحيته خايسه (مصن) وتتستطيع أن تميز الريحة بسهوله لقوتها. أما سؤالك الثاني مافهمته.

[SRDAL]

السلام عليكم ورحمة الله وبركاته


يعطيك العافيه اخوي بوعبدالله .

بصراحه موضوع حلو وممتع وماشاء الله الشباب ماقصرو اثروه بمعلوماتهم الطيبه والزينه وماخلو لنا شي انقوله .

ولاكن انا بتكلم عن حداف الشعري على القطع او القصاصير الي بحرها رق وفيها شير .,

وبالنسبه لي انا هذا من احلى الحداق عندي وانت عارف وخابر .

عادت يكون الشعري الي في القطع يكون عافيته اقوى وسحبته احلى ويبيله ناس ماترحم الأسباب هي انك ولو عطيته

مجال او ماسحبت عليه بسرعه راح يشير عليك ... وغالبا يكون شعري القطع او القصاصير لما تشوفه يضرب

على الييمه كأنه ضربه شحذوذ يعني يسحب في الييمه وانت تفكره صغير فيه نوع من العياره . علشان كذا لازم

تكون يدك حساسه على الخيط ومن ياخذها وتحس انه سمت الخيط عندك اياه لاترحم .

وطبعا غالباً مايكون حداق الشعري الى على القطع ( بدون بلد ) يعني مجرد خيطك والميدار ( ويمك كرتون

ميادري بو 8 ) كأنه مول ك خابرين الشغله فيها شير .

وعلى فكره شعري الرق والقطع الذ من شعري الغزير .

هذا كل ماعندي .... اتمنى اني كدرت افيد بمعلوماتي البسيطه .

تحياتي للجميع .

[gulfhunter]

السلام عليكم ورحمة الله وبركاته

حياك الله أخوي ابونواف

مشكور اخوي على مرورك وتعليقك ........ طبعاً انا متأكد انه أكثر موضوع يشدك والسبب حبك إلى الشعري والله يستاهل.... فعلاً زي ماذكرت حداق القطع او القصار لازم يكون طفاحي (يعني بدون بلد) وهو ان خيطك ينزل على القصار او القطعه والملاحظه هنا ولازم ننتبه انك إذا رميت الخيط راح يكون على القصار هنا لاتسحب الخيط ولا تحاول تحرك لأنه أقل حركه له راح يشير انت انتظر الحبيب الشعري يجي ويريحك ويشيله لكن لاترحمه الإ إذا وصل عندك على الطراد

الله يوفقك ويبارك فيك

[كبير النواخذه]

اخوي gulfhunter (بوعبدالله)...
لما قريت الي انت كاتبه .... قلت ..ماخلى لنا شي نكتبه...بس قلت يالله بنعصر المخ وبنكتب..نزلت شوي الا الشباب ما شاء الله عليهم..ماخلوا لنا شي

لذلك حبيت ادخل واشكركم كلكم
بوعبدالله
بونواف
بوراشد
أبو ستري
النموذجي
الخليج

ربي يحفظكم ويسلمكم

بس ترى نسيتوا شي واحد ومهم جدا جدا جدا .....وهو ان كيلو الشعري بخمس ريال

[gulfhunter]

السلام عليكم ورحمة الله وبركاته

حياك الله أخوي كبير النواخذه

مانستغنى عنك طال عمر انت الكبير ........ بالنسبه اخوي بعيد عن سعره احنا حبينا ان نشارك خبرات الجميع ويكون مرجع للأستفادة طال عمر ومافكرنا بالسعر

لكن اخوي شعري عن شعري يفرق ونبي تعطينى وش الفرق طال عمرك

تسلم اخوي على مرورك

[سلاح]

أشكر الجميع بدون إستثناء عىل هذا الجهد المبذول
مشكورين وماقصرتوا
لكن خبركم أخوكم توه في الصيد
لذلك حبيت أسأل
ماهي طريقة السماري
وكيف طريقة الربطة بالنسبة للثقل والميدار
وإذا بالصور يكون أفضل
ومشكوووووورين وما قصرتوا


محبكم.................
أبو عبدالرحمن