هل قمت بحركة بسيطة بالسيارة أدت إلى خراب كبير ؟؟؟؟ شاركنا برأيك

[سليمان الصقر]

مثل ما انتم شايفين في العنوان فوق ، المقصد جمع أكبر قدر من التجارب ليتسنى لنا الاستفادة منها وراح أبدأ بنفسي /
سيارتي جي اكس آر 2001 مره غرزت بالنفود وكنت ألف الدركسون يمين يسار يمين يسار باستمرار حتى تطلع السيارة ولما وصلت الازفلت لقيت السيارة فيها فظاوه بالدركسون ولما رحت الورشة قالوا ماينفع تصليح لازم تبديل .
واترك المايك للمتحدث التالي

[كاشت وحداني]

حركه بسيطه وادت لخراب كبير
طول الله اعماركم جيت اغير بواجي فورد ٩٥مبطي شوي
ويوم وصلت البوجي الاخير ما وصلت له قمت طلعت في الكبوت وركبت البوجي
لكن الغلطه ان وطيت على الكويل وصار فيه شعر
ويهرب الكهرباء
طبعا الفوردات في التسعينات كان كل ٤ سلندر تلقتي في كويل واحد حاطينه في مقدمة المكينه فوق



Sent from my iPhone using Tapatalk

[أصيل حجآ زي]

يعطيك الله العآفية موضوع ممتآز يجنبنا كثير من المشآكل أذا شآرك الشبآب به
تستحق خمسة نجوم ذهبية وأضآفة الموضوع للموآضيع المُميزة المُثبت بمقدمة الخيمة :

المواضيع المميزة في الخيمة

يقلون غلطة الشآطر بألف :
كنت أفضي القير التمآتك وأنا مـُسرَع ثُم أعشق وأنا فوق السبعين 70 كيلآ { كلم }
وأكتشفت أن ذلك يسرَع بتخبيط القير بحيث أن القوآبض والأحزمة بالقير تصطفق ببعضها
وتخرَب بسُرعة مُذهلة .

ما يضُر السيآرة أنك تفضيها قبل ما تتوقف عند أشآرة أو بأخر المشوآر أو نقطة تطفيش
لاكن يضُرها أذا عــُدت وعشقتها وهي فوق سرعة 30 كلم .


وكثيرين خآصة بعض الشبآب هدآهــُم الله
يقول :
خلني أجرَب التفحيط وينتهي بحآدث أو يدخــُل جوى أحد البيوت
والقصص كثيرة
نخلي المجآل للشبآب يدلو بدلائهـــُم
أشـكــُرك أخي / ســُليمآن على هذا الموضوع الشيق بعد شـــُكر الله المُنعم الجبآر .
الى المزيد وألى الأمآم .

[صبي هذيل]

السلام عليكم
انا قبل شهر تقريبا كنت انضف كربريتر ددسن قديم ومتحمس المهم ابغا اسوق الموتر بعد التنضيف الكلام ذا في عز الظهر وانتهت مهمة التنضيف واشغل الموتر وبسم الله اقضبه خط متحمس طبعا
ولا دريت الا انبير الحراره اتش فوق بالحيل ياولد صفط ولا تصفط واطفي الموتر وراك ودونك ولا مافيها كلام واخذلي حول ساعه ادور سطحه
وجا راعي السطحه وحملنا الموتر وجميع الورش مقفله لفينا لين طفشنا المهم راعي السطحه كانه طفش مني وحفاظً لماء الوجه قلتله بس نزل الموتر هنا حول الورش ونزلنا الموتر وفكيت الكبوت ولا الموتر بارد واشغل السياره والحراره اتش واجي عند سلك الحساس حق الحراره ولاهو لاصق في المكينه وارفعه وراحت الحراره عاد راعي السطحه اول لاشاف السلك وعرف المشكله قال فلوسي ولاينقص ريال المهم اخذ حقه وروح يضحك
(الخطاء اني مع التنضيف الزائد للكربرتر دقيت السلك ولصق في المكينه ومع حراره المكينه ارتفع امبير الحراره)

[بدوي جنوبي]

يبو عبدالرحمن الكلام اللى ذكرته هل هو موجود في كتيّب السياره
لانى دائما أفضي القير وأنا على سرعات مختلفه وما حصل معى أى مشكله
واسوي الحركه هذي عادة أذا بغيت أشغل مكيف السيارة
أو أجرب سياره وابحث عن صوت في الدفرنس .

[ماجد الحايلي]

الخطأ اللي دايم اطيح فيه هو عدم معرفة اتجاه المسامير بالسيارة
كم مرة اكسر مسامير بالسيارة من عدم معرفتي بالاتجاه الصحيح ( عليمي)
او العنترية الزايدة وبالأخير المخرطة تتنظرني
كسرت مرة قواعد الاديتر في محاولة مني لتنظيفة وبالأخير
ربطته بحبال وحالتي حاله ولحام وكلفني اكثر من محلات تنظيف
الاديترات .

[فارس شمال]

السلام عليكم ،،،
قبل كم سنه كانت معي سوناتا 2003 وذيك اسميها حرك تبلش
لاني كل ماحاولت اسويلها ابسط صيانه تتعكرس الامور وتفرط كامله وتكلف تكاليف عاليه
اخليها على خرابها تمشي مثل الحلاوه
احد المرات كنت على سفر طويل وبالليل قلت اشيك على السيارة
كان في لي في طرمبه الدركسون يهزب زيت بكثره لانه ناشف
رحت الوكاله شريت اللي ب 35 ريال طبعاً هو مربطين ضغط فكيته بكل سهوله وركبت الجديد ورجعت وزنت الزيت وبسم الله اشغل السيارة والا اسمع صوت احتكاك قوي ويفصل الدركسون يصير ثقيل ،، واروح على ورشه ويقولي بستم حق طرمبه الدركسون راح وسعر الطرمبع بالوكاله 1900 كما اذكر
والله سلمني يقولي المكنيكي اخ سوري يقولي عندي مثلها خربانه بركبهن على بعض ونجرب ويركبهم وتضبط بس صار بكرة الطرمبه تلعب يمين يسار ترقل قالي اتوقع ماتمشيك 6 شهور
وقلت والله مالمسها وتمشيني بحول الله 4 سنوات مع ممشى فوق 250 الف وبعت السيارة قبل شهرين وهي على حالها

[فارس شمال]

طبعاً كلفتني ٢٣٠ ريال

[رفيع المقام]

الخطأ اللي دايم اطيح فيه هو عدم معرفة اتجاه المسامير بالسيارة
كم مرة اكسر مسامير بالسيارة من عدم معرفتي بالاتجاه الصحيح ( عليمي)
او العنترية الزايدة وبالأخير المخرطة تتنظرني
كسرت مرة قواعد الاديتر في محاولة مني لتنظيفة وبالأخير
ربطته بحبال وحالتي حاله ولحام وكلفني اكثر من محلات تنظيف
الاديترات .

أما العنتريه الزايده حدث ولا حرج ،، تدري إن كل صاموله في السياره لها تورك وعزم معين باستخدام مفتاح العزم..
بأذكر لكم سالفه لي عن العنتريه الزايده لكنها ليست في السياره هي للفائده وليسمح لي صاحب الموضوع ..
كنت أسوي صيانه لبعض بزابيز الاستراحه الشاهد جيت لاحد البزابيز المحليه وفكيته وركبت البزبوز الجديد ، يوم ركبته وشديت عليه إلا وفم البزبوز فوق وأعطيه إلا وبزبوزي بين يدي والسنه حقته جوا الماصوره ، لو زودت التيب على السنه (وأعوذ بالله من كلمة لو) كان ما صار اللي صار ..
أدري إني شطحت بكم بعيد ، 😌

[بدوي جنوبي]

الخطأ اللي دايم اطيح فيه هو عدم معرفة اتجاه المسامير بالسيارة
كم مرة اكسر مسامير بالسيارة من عدم معرفتي بالاتجاه الصحيح ( عليمي)
او العنترية الزايدة وبالأخير المخرطة تتنظرني
كسرت مرة قواعد الاديتر في محاولة مني لتنظيفة وبالأخير
ربطته بحبال وحالتي حاله ولحام وكلفني اكثر من محلات تنظيف
الاديترات .

أضحك الله سنك يا ماجد

ياخى دائما الفك عكس عقارب الساعه خذها قاعده في راسك لا تنساها
لكن بعض الاحيان تلخبط وانا مثلك ،،، خاصة أذا كان المسمار مثلا فوق راسك
يعنى تشتغل تحت السياره تفك كارتير القير ما تدري وين الفك من الشد
فأفضل حل تضع يدك مقابل المسمار وتتخيل كيف عكس دوران الساعه
بكذا تعرف أتجاه الفك من الربط وهكذا دواليك للمسامير الثانيه

[بدوي جنوبي]

يا شباب اللى ما يخرب ما يتعلم
يعنى لازم الواحد وهو يشتغل يقطم مسمار او يكسر ديكور
لا يكون الخراب اللى فعلته سبب في عزوفك عن العمل بسيارتك او بيتك
صحيح بعض الاحيان تسبب لك خسائر ،،، لكن كل دقه بتعليمه

توماس أديسون ويش قال عندما فشل في أختراع المصباح
لانه جرب 99 محاولة كلها فشلت ،، أقرا سيرته هنا
http://ar.wikipedia.org/wiki/%D8%AA%...B3%D9%88%D9%86

[سليمان الصقر]

سالفة قديمة جدا كان عندنا سيارة مازدا حوض موديل 85 وذلك الوقت أنا توني بالثانوية وكان عندنا طلعة للبر والموعد بعد صلاة الفجر مباشرة والصلاة بمسجد أحد الشباب المهم رحت للمسجد على المازدا ويوم وصلت ولا الحرارة فل وعلى طول طفيت الموتر وفتحت الرديتر طبعا بغى يعدمني لكن ربك ستر ورحت جبت موية من البراد وعبيت الرديتر على طول لين قال بس وطبعا هذاك علمها بالحياة خبطت السيارة على طول .... وبعدين فهمت ليش خبطت وسلامتكم

[ابوالوليدخالد]

الموضوع بسيط جدا
حبيت افك بلف المكسما بدون تعب فكسرت الثلاجة
ورجعت فكيت نص المكينة عشان اغير الثلاجة

[بدوي جنوبي]

مره فكيت كربريتر كابريس موديل قديم
على أساس أغير له طقم أصلاح وكانت اول مره أفك كربريتر
بعد ما أنتهيت من الأصلاح ركبته على المحرك وصار يصب البنزين صب داخل المحرك
أحترت وين المشكله فكيته مره ثانيه ،، للبحث عن الخلل لكن دون فائدة
فأضطريت انى أروح ورشة ،، وكانت المشكله من العوامة داخل الكربريتر تحتاج لوزن
وضبطها الميكانيكي وصار المحرك ممتاز ،،، والحمد لله أستفدت من التجربه .

[mgs71]

مره فكيت كربريتر كابريس موديل قديم
على أساس أغير له طقم أصلاح وكانت اول مره أفك كربريتر
بعد ما أنتهيت من الأصلاح ركبته على المحرك وصار يصب البنزين صب داخل المحرك
أحترت وين المشكله فكيته مره ثانيه ،، للبحث عن الخلل لكن دون فائدة
فأضطريت انى أروح ورشة ،، وكانت المشكله من العوامة داخل الكربريتر تحتاج لوزن
وضبطها الميكانيكي وصار المحرك ممتاز ،،، والحمد لله أستفدت من التجربه .

نفس المشكله صارت معي