سؤال لخبراء الفورد أرجو منكم الدخول....؟؟؟

[ماجد ابو نايف]

السلام عليكم ورحمة الله وبركاته
ياشباب عندي فورد 2004 كراون فكتوريا اشغلني بالتقطيع
وغيرت كل شي وفحصت كمبويتر اكثر من ثلاث مرات ولانفع معي .
الشاهد وانا قاعد ادور بالنت لقيت هالموضوع على هالرابط التالي :
http://www.assayyarat.com/forums/thread205089.html
ودي انكم تفيدونا لان الكويل الواحد من 100 الى 130 ريال
وصاحب هالموضوع يقول غير السسته والربله اللي تجي مع الكويل بـ 25 ريال بس
اتمنى انكم تشوفون الموضوع وتردون لي ولغيري .
شاكر ومقدر مروركم الكريم.
س -1 وش تتوقعون هل هالكلام صحيح لاني غيرت كل اللي غيره ومانفع معي ؟
س-2 اذا كان صحيح وين احصلها تتوقعون ؟

[كاشت وحداني]

عزيزي هو شرا طقم ب ٢٢٠ ريال والطقم ٨حبات
يعني الحبه تطلع ب ٢٧.٥ تقريبا
لكن حاجات زي هذي غالبا تباع طقم
وقبل كذل انت حدد التفتفه هل هي تقطيع بنزين ام تقطيع كهرب
علشان ما تتعب بدون فايده



Sent from my iPhone using Tapatalk

[بدوي جنوبي]

صار عندى نفس مشكلتك تقطيع
وفحصت كمبيوتر ببرنامج خاص بكهرباء الفورد فقط
وطلع العطل عندى في كويل رقم 6 وغيرت الكويل ب 90 ريال أصلي
وراح التقطيع .

الورش يستخدمو برنامج يفحص جميع السيارات عشان كذا ما يبين معك .

أبحث عن ورشة عندهم برنامج شركة فورد خاص بكهرباء الفورد
وليس برنامج شامل .

لكن سؤالي متى غيرت بواجى وهل هي أصلي ؟

ينقل لقسم الاعطال

[ماجد ابو نايف]

فعلا اخوي بدوي جنوبي
اول فحصين للسيارة كان بجهاز فحص لكل السيارات
لكن اخر فحص بتوكيلات الجزيرة بحائل
وقالو لي بعد ست ساعات من الانتظار بالصالة
الكويل رقم 2 و 5 و7
وكويل رقم 5 بالذات ركبته جديد 130 ريال
والبواجي اصليه وجديدة ماكملت الفين كيلو
واخوي بدوي جنوبي كل المقصد اني يمكن احصل حل لمشكلتي
هذا شي والشي الثاني اذا الكويل مايخرب واللي يخرب بس الجلده والسسته
حقته اشوف فيه فرق وودي ان الناس تعرفه وحتى لوكان الكويل بـ 90 ريال
27 ريال حقت الجلده والسسته ارخص بفرق كبير.

لكن فيه كهربائي سوري يقول غير البطارية مع الاصابع وتنتهي عندك المشكلة والله اعلم كلامه صح او لا
عذرا على الاطاله .

[كاشت وحداني]

من جده هالسوري
ركب بطاريه من اي واحد من الشباب
ولا خل السوري يجيبها على حسابه
ضبط الموتر حاسبه
ما ضبط يتحمل الخساره


Sent from my iPhone using Tapatalk

[ماجد ابو نايف]

وهنا المشكلة اخوي كاشت وحداني
بالسنين الاخيرة تعقدت الخرابات
وتعقدت التصليحات
وكثرت العمال النصابة وقلة المهاراة
ولنا بوكالات السيارات خير مثال
حتى اني رحت لوكالة فورد بحائل
وعرضت عليهم مشكلة
وقالو الخطا منك ليش تشتري قطع غيار من
خارج الوكالة كل اللي خارج الوكالة مقلد
وهم بكذا متبعين سياسة ( الزين عندنا والشين بجنبنا )
وربك يعين .
بس الجلد والسسته مامرت عليكم ماسمعتو عنها بس
هذا اللي انا اسال عنه .

[ذيب النجيل]

الكويلات حتى لوكانت جديده اذا غسلت السياره وجاها ماء تخرب

على كلام الكهربائي

[كاشت وحداني]

الجلد والسسته تحصل احيانا ويتم تغييرها ويضبط الموتر
طيب عندي سؤال
وانت ماشي خط يتفتف ولا يسلك


Sent from my iPhone using Tapatalk

[ماجد ابو نايف]

ياطويل العمر التقطيع
اكثر شي يكون بين سرعة 60 الى 100
تقطيع قوي ورجفة بالسيارة تحس ان السيارة
شوي وتتفكك من قوة التقطيع
والحل ان ارفع رجلي اعزكم الله بعزة عن البنزين
وادعس ثاني مرة وتمشي السيارة بس هنا المشكلة

[ابو محمد السهلي]

شيك على صفايه البنزين /////// او حساس البخاخ

[بدوي جنوبي]

فعلا اخوي بدوي جنوبي
اول فحصين للسيارة كان بجهاز فحص لكل السيارات
لكن اخر فحص بتوكيلات الجزيرة بحائل
وقالو لي بعد ست ساعات من الانتظار بالصالة
الكويل رقم 2 و 5 و7
وكويل رقم 5 بالذات ركبته جديد 130 ريال
والبواجي اصليه وجديدة ماكملت الفين كيلو
واخوي بدوي جنوبي كل المقصد اني يمكن احصل حل لمشكلتي
هذا شي والشي الثاني اذا الكويل مايخرب واللي يخرب بس الجلده والسسته
حقته اشوف فيه فرق وودي ان الناس تعرفه وحتى لوكان الكويل بـ 90 ريال
27 ريال حقت الجلده والسسته ارخص بفرق كبير.

لكن فيه كهربائي سوري يقول غير البطارية مع الاصابع وتنتهي عندك المشكلة والله اعلم كلامه صح او لا
عذرا على الاطاله .

طيب بدلت ال 3 كويلات ؟

دائما البواجى والكويلات خذها من الوكيل
او من محل تثق انه يبيعك قطع أصلي ليس مقلد
والكويل يخرب لانه راس الكويل قطعه كهربائيه أعتقد يقوم بمضاعفة الشرارة لذلك معرض للتلف .

[ملك الفكتوريا]

يابو نايف تقوى الهجر والا ابعتذر



التفتفه لها مسببات كثيره


طبعا انت تقول التفتفه بين 60 و100 واجزم لك بالمليون انها كويلات وهذا اولا


الامر الاخر تفحص كمبيوتر مثل ما قال معلمنا بدوي جنوبي بجهاز خاص بالفورد



والكويل الخربان تغيره


واللي مو خربان تغير الجلد والسست لان الكويل نادر خرابه الا اذا طولت والسيارة تفتف


الامر الاخر البواجي نوعان بالفورد


fm32 وهو خاص بالسيارات من 98 وتحت

ونوع pm32 وخاص بموديلات 99 وطالع


وترى نوع البواجي مهم وركب النوع الخاص وكاله ما يتجاوز 100 ريال ثمان قطع


وغير صفاية البنزين وكالة 45 ريال مع محلول تنظيف التانكي وكالة 25 ريال


وفلتر الهواء وكالة 53 ريال مع تنظيف حساس الهواء بالانتيك


وتنظيف الثروتل بدي وتصفية بخاخات بمحلات بترومين

وغير منظم الهواء من التقوى 190 ريال

وراح تلاحظ الفرق لك وللزمن من ناحية صوت وهدوء المكينه والعزم وانخفاض نسبة استهلاك البنزين






لكن الحين روح وشيك على الكويلات فيش فيش سلك سلك

والطريقة تفصل السلك من الكويل واذا اختلف صوت المكينه يعني الكويل شغال


واذا فصلت السلك ولا تغير شئ يعني الكويل خربان

وشيك على الفيش



وبعدها حول على ليات الهواء يمكن واحد مو راكب او مقطوع








وخذ العلم مني وعن تجربه



اذا البطارية ضعيفه والدينمو على نهايته ابشر بالعزم البايخ والتفتفه لان ضعف الكهرب يأثر على عميلة الاحتراق






وانصحك انصحك اذا تأكدت اذا فحصت كمبيوتر وما طلع بالفحص شئ والسيارة تفتف على 60 و100 سو تصفية مكينه وغير جلد وسست الكويلات لان الفحص ما يبين خراب الجلد والسست



واذا انت من الدمام ابشر اشيك لك على كل شئ واقولك السبب

[ماجد ابو نايف]

ماشاء الله عليك ياملك الفكتوريا
وابيض وجه يابعدي
والمشكلة اني بحايل واحس بضيقة
اذا دخلت الصناعية كله من هالعماله ( العربية )
واللي هم ماشاء الله يعرفون كل شي ويقدرون يصلحون اي شي
وما اسواء منهم الا وكالة فورد بحايل اهم شي يوضحون لك السعر قبل الخراب
اجل كويل واحد 280 ريال وشغل يديهم 500 ريال من دون سعر الفحص 350 ريال
يعني تبي تدفع 1500 ريال وانت تضحك
لكن احسن شي اتباع سياسة (امش بالسيارة حتى تقف )
مشكورين وماقصرتوا وانا ابي احاول ابحث عن الجلد والسسته حقت
الكويلات وابي اغيرها لانه كمبيوتر مخي معلق على انهاهي السبب
وبعدها يفرجها ربك.

وقفه بسيطة :- ملك الفكتوريا ماتخبر لي كرتون ببسي يمدحون اللي عندكم .

[نايف الشاكري]

السلام عليكم اخوي

اولا/ اذا ماظبط معك ترا بوه حساس بفلتر الهواء يجيك بارز فوق اللي اللي يربط فلتر الهواء بالمكينه هذا اعزك الله والموجودين يجيه تراب عادة وهو مثل الشعره اللي باللمبه فكه واذا شفت فيه تراب علي الشعر لاتلمسها لانها حساسه جيب علبه مويا ابونص وحط بها بنزين وشق الغطاء من فوق ورش عليها علي خفيف وركبه الفلتر مكانه هذي عاده تسبب تفتفه ..


الشي الثاني / يالربع لاحظت شي لارحت للاتراك وطقتهم تتقوله تفتفه من غير كشف قال رح جيب بواجي وكويلت واسلاك كويلت << طيب معروف السبب واحد منهم <<يعني تحسه غير كل واكيد بتظبط معه
ثم قال 500 حق ايش يابوي

[ملك الفكتوريا]

يا ابو نايف قبل لا تكشف وتغير وتخسر سو اللي قلت لك عليه


( فحص الكويلات بدون كمبيوتر )

والطريقه السيارة شغالة طبعا تجي عند الفيش المشبوك بالكويل وتفصله بالضغط على الكلبس اسفل الفيش وتسحبه للخارج واذا زادتا التفتفه وتغير صوت المكينه يعني الكويل شغال واذا فصلت الفيش وما تغير الصوت ولا زادت التفتفه ترى الكويل خربان


وغير الكويل الخربان وباقي الكويلات غير جلدها وسستها


وترى سالفة امش حتى تطفى بتدفع فوق المبلغ اضغاف


وبعدين سعر الكويل 120 ريال حتى بالوكالة


وترى اذا ما غيرت الكويل الخربان بيبدأ يخرب كل شوي كويل لان الضغظ يزيد على الشغال ويخرب وبدل كويل او كويلين بـ240 تدفع 960 ريال لكل الكويلات


لكن خذ العلم التفتفه عندك من احد الكويلات لان تفتفه من 60 الى 100 او 110 هذي كويلات


وانا سيارتي فورد


مشكلة مثل هذي عشان ترجع افضل مما كانت

اسوي تصفية مكينه حق 100 الف كيلوا قدام

تغيير الكويل الخربان مع جلد وسست باقي الكويلات

تغيير بواجي

تغيير منظم الهواء

تغيير صفاية البنزين

فلتر الهواء

تصفية بخاخات

تنظيف حساس الهواء وباقي الحساسات اللي تحتاج تنظيف

تشييك على الدينمو وكم شحنه

تغيير الاصابع

تنظيف الاسلاك المبريوطه بالبدي


وترى أغلبها تقدر تسويها بنفسك


واذا ما عندك بحايل بترومين

تروح لعالم ساكو ومحلول MAX44 وتصبه بالتانكي وهو فوق النص او حول الفل وتمشي 100 رايح و100 جاي على بس ما تتعدى 120 وراح ينظف البخاخات



وبالنسبة للبيبسي والكولا كلام كبير ههههههههههههههههههه وابيشر بكرتون ومعه الجلد والسست