رحلتي إلى ربيع الأردن

[عيد ثاني]

قعدنا الجهمه قبل قوقات الطيور , ويامنه جت للحق كلهم قعدوا قبلي ,

انا راصن صابري للمخده أبيهم ياما يشيلون الفرش , ولا كل صيدي متعاجس عن شيلة الفرش ,

لاوالله منا حلو رصت الصابر على المخده , خاصتن ياصار مهي خليتن من برد ,

أيه تروا الحتسي بالتفطن , انا من سمعت حلفزتهم , وأنا لك إحترف يم جهة أبو خالد وأبو عامر ,

وأنا لك أرفع طرف الفراش وأخلي عيني تبلص من حدره , ذبحتن الشفاوه

أبشوف وش اللي فرفرهم هالصبح , يوم فطنت يامار أبو خالد مقعين إقعى , ويراعي هنا ,

ويامار ابو عامر مثله يتناوط وهو بفراشه , وسمعت ابو خالد يقول لابو عامر ,

أنا قبل أحسبنهم رجال هاللي سارحينن بالغنم , وأثري حديهم مره لابستن شماغ ومعه رجال ,

المره الله يستر عليه مستوره , لكن ابو خالد الله يهديه قلبه خضر لو يشوف له مخيول قام يداوره ,

قمشطنا فرشنا , يوم فطنت يامار واحدن من خويانا الله يستر عليه , جادعن فانيلته ونيمن بطرق

السروال , وحاطن فلوسه بالفانيله ومتوسده توسد , ويوم نشدناه وش نوحك حاطن فلوسك

بهالفانيله ,قال مايروح شين إلا على الله خلفه , والله ماودي أعلمكم به , لكن تروه

واحدن من الأربعه , عاد أيهم هذي اللي والله ماطرت علي أعلمكم به ...

الوكاد إننا نوينا لنا مكانن بعيد , نبي يم عجلون وأكاديره , تقل هاتسين إنه زينه

وإلا والله ماندري عنه , مشينا عجلين نبي عجلون , وحنا لك ندخل إربد ونفطرأكالفطور

الزين , ويوم أفطرنا وجينا نبي نمشي , يامار أكالسياره عليه صور شيبس وبطاطس

وبتيتا , ويامار مكتوب عليه : إذا ذقت علقت , أصلآ من يقراه الواحد بدون الصوره يقوم

يتمذهل عليه , بالله عليكم إنطقوه باللهجه الاردنيه هاللون إذا ذوكيت علوكيت , بالله

عليكم ماتشوفون إنه أبرك من إنتا مو إنتا وإنتا جيعان , وأبرك من لما تسك ماحتسك ,

وأبرك من بعض هالشعار اللي بس يونونون , ياونتي وما ونتي , يامونونينن لنتم عندي

ولنا عندكم , حنا يوم نتسابلكم ونخلي أشغالنا نبي نسمع شعر مانبي قصيد وزن

وقافيه , يامنه هذا قام واحدكم يلهمتسهن ويجيبهن لنا , ولهو بس الشعار اللي يدبلون

التسبد , حتى الهلال الأحمر السعودي يدبل التسبد , وش نوح هو وحدن عن هالناس , هو

وحدن عن الدفاع المدني , هو وحدن عن الشرطه ,هو وحدن عن المرور , وش نوح بس هو

اللي يقولون له السعودي , والله العظيم إني أكاليوم يوم إجتماع قادة الخليج اللي

بالرياض رحت للرياض , مهو بس الحكام اللي يقدرون يروحون للرياض حتى جدتي لو تبي

تروح تروح , ويوم طلعت من الرياض حول صلبوخ يامار أكاللوحة اللي كبر أمس واليوم

يامار كاتبينن عليه دواجن الوطنيه قول وفعل , بالله عليكم هذي إعلانات لا ونسأل عن

سبب الضغط والقولون والسكري , والله إنه إرتفع ضغطي من هالسالفه ,

مار أبرتاح انا وياكم مع قصيدة لعياد ثاني منا زينه هاديه وتريح الواحد ...

يقول عياد :

شــــــف كيــــــف وش سويـــت في حـال مـغليــــــــــك

حتـــــى عــــدوي مــا يســــوي ســــــــواتــــك

كفيـت رجـــل الوصل عــن درب راجيــــــــــــــــــــــــــــك

وألحقــــــت شـــــمات العــــواذل شـــــــــماتـــك

مــن بعـد مـــاكنـــت أقــرب الخلــق وش فيـــــــــــــــــــك

صـــرت البعــــيد وصــرت مــن ذكـــــــــــــريــــاتــــك

كــاني غلطـت أمـــــوت لرضــاك وأرضيــــــــــــــــــــــــك

وأقبــل كفـــــوف الزعــــــل مــن غـــلاتـــــــك

وأرجــع وأضـــم إيــــديـــك وأقبــل إيـــــــــــــديـــــــــك

وأقــــول لـــك : روحــــي هـــديه وجــاتــك

وإن كـان ذلــي وإنكســــاري يهـــــــــــنيــــــــــــــــــك

واللـــه لتبطــــي مهتنيـــت بحيـــاتــك

إن جـــــت لعــزة رأســي أرخصــــــك وأشــــريــــــــك

وأرجعـــــك لأول بــــــداية شتــــاتــــــك

أنـــادي لغـــــيرك بوجهــــــك وأخــيــــــــــــــــــك

وأعلمـــك قـــــدرك وحبــــــــــــــــك لــذاتــــــــــــك

ويـــاجيتني ندمـــان والحـــــزن كـــــاسيـــــــــــك

بقــــول لك : مـــــاعــــاد يمديـك فـــاتـك

وأصــد عـن وجهــك وأســــــولف لـــــشـــــــانيــــك

وأعــــــزي أيــــــام الغــــلا فــــي وفـــــاتـــــك

أيا بعد راسي ياعياد على هالقصيده , وتسان عندك من هالنوعيه غرد به على تويتر خل هالطوير مايصم أفمه ياما ياصلن ...

وحنا ماشين خذينا حق المشاوي هالصورتين وكملنا طريقنا ...

رساله : ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛