ياسبحان الله عقب ماحنا مستانسين بهالربيع وهالاجواء اللي على كيف كيفك , صار هالنوار عندنا
تقل رضم , ولهو حي الله رضم حرام عدك برضم الحجره وكل شوي يامار جايتك لك فتاله , حنا
يوم شفنا الأمور وسط أبعدنا عنهم مهو ذلتن منهم لكن على قولت الأولين وش لك بالداب وشجرته ,
وعلى قولت إبن مهلهل يوم هو يقول : وإن شفت ضول الناس بالك تعسه ,ويا جنبك شر المخاليق
خله وعلى قولت إنقل الماء لو رجلك بالماء , الوكاد إننا أبعدنا عنهم على شان كل القولات اللي قبل
شوي ولو إن بعضهن أبعد من لاهه عن الموضوع ...
مشينا بإتجاه قرية أم الجمال , وقرية الخوالد أو بني خالد , وحصلنا لنا ماء ناقع يفتح النفس , نزلنا
عنده وصورنا بجنبه هالصورتين ..
وهذي صوره حول أم الجمال
وتعدينا لقرية أم الجمال , ويوم أقبلنا عليهم يامار بيوت الشعر كبر أمس
واليوم , والناس تخترش , والأعلام ماله والي ...
_ حنا .. وش السالفه يازلمه بيوت وأعلام !!!
_ الأردني .. هاض الملك جاي زياره لعشيرة المساعيد ...
أنا ولد أبوي ملك الأردن وبيوت شعر ووناسه عز الله اللي جاء وقتك يابو خالد , هذ عليه لك كم بيت
وترنا خشر بالمقسوم ...
_ أبو خالد .. والله ماتفرحون بالريال , أنا أقصد وإنتم تأخذون الفلوس , هذ اوين لقيتووووه
تغاوروني على حلالي مغاور ...
عز الله كل سنه ألا يتغاورون على لهم أسمن أمحق , سنة من السنين مسكت معهم على زياد , وقبله
يزيد , تقل مافيه ألا زياد ويزيد , وقبل زياد ويزيد خالد , زين بالله يامن هالوغدنيه تسبروا , وش
لون يسجلون بتويتر , كل مايبي يسجل حديهم يامار الإسم محجوز, جوزوا عن هالأسامي اللي مهي
زينه , وتوقعوا ياما تحصلون لكم إسمن مايلاحن , إسمن زين مثل سليم مضحي , أو ملفي ناصر ,
أو رايد دوهان , أو عيد ثاني , وعلى هالأسامي وإنتم ماشين ...
وبعدين من زين سوالف زياد ويزيد كله جيجا وميقا بالعون منتم قايلينن وين نرحل ووين ننزل ,
منتم جيدين ألا كم جيجا عبيت وكم ميجا شحنت , ويامنه هذا قال واحدكم تروني باتسر قناص , اللي
يجهلكم يقول إنكم تبون تكثرون الغزلان والحباري مايدري إن المريعي أو الفري يخب عليكم ,
وسلاحكم ساكتون مستعيرينه من الإستراحه اللي بجنبكم , وإن ماحصلتوا ساكتون أقرب نباطه أربعه
بثلاثه تخب عليكم , هو صحيح أن الأولين يوم يجيك واحدهم يامار مصاوغن صابره للمطالب ,
وهو صحيح إن واحدهم يوم يقفي يامار مطلعن فانيلته فوق سرواله تقل ينذخ به , وهو صحيح إنه
يامنه هذا قال واحدهم ولهو قطعن لواردك , ألا قطعته ولعنت سنسبيله , لكن الوكاد إنهم أبرك من
شلة جيجا وميقا
خلونا مع بعض الصور من أم الجمال وراجع ...
عسكر نبي ندرفع واحدن من خوايانا عندهم مايشوف من القاع صمايل ...
وهذي صوره أخرى ...
صوره أخرى ...
وهذي أخرى ...
وهذي أخيره ...
رساله : لاشك بأن أي جمال يُظهر ماحوله من قبح ، لكن الجمال الحق هو الذي يُشعرك بقبح كل ماحوله من جميل ...
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة ismailmoh
