كشاف قوي جدااا (صور)

[خيال الصبحا]

السلام عليكم

(منقول)
هذا كشاف اسمه
(ماج ليت) امريكي الصنع لكنه
عليه نور ماشاء الله مايخيب ظنك فيه لا وبعد
معه لمبة احتياطية في نفس الكشاف.موجود لدي محلات ساكو (أنا
ما أدري وين المحل ولكن لعل الإخوان يفيدوننا بمكانه) والحجم الوسط
تقريبا نفس الى في الصور يغطي مساحه شاسعه.فيه جيشي وفية الوان حسب الاختيار
والسعر حسب الحجم(تم تعديل السعر بعد مشاركة الأخ غيام)


وهذي احجامه


أتمنى أكون أفدت
وشكراً

[غيّام]

اخوي خيال الصبحا

صبحك الله بالخير

من ناحية الكشاف انا مجربه وممتاز جدا ونوره قوي جدا ولكن سعره مهوب اللي قلت ان كانك تقصد سعر اللي انت حاطه في الصوره الكبيره
فهذا سعره 370 ووكيله المصباح في شارع الريل وبتلقاه عند الرمايه اللي في طريق التخصصي

وهو كشاف تستخدمه معظم القطاعات العسكريه في العالم

[خليف العيد]

اخي ..... خيال الصبحا
صباح الخير
اما الكشاف فهو عندي منذ مايقرب من ( 11 ) سنه
شريته من الرمايه ش التخصصي
وقيمته ( 400 )وهو في ذيك ألأيام كان عليه عرض ومعه ضمان
أما الأن فهو من ( 370 إلى 390 ) ومازال يوجد عند الرمايه
اما البطاريه فقيمتها ( 145 ) ريال واللمبه فهي في ( 25 ) هذه للأيضاح وشكرا
اخيك ( باحث أثار ) الزلفـــــي

[مدالنظر]

تسلم يالغالي
وبالنسبه لمكان ساكو فيه ثلاثه على ما اظن
لكن اثنين ادلهم وسبق ان زرت محلاتهم ,,واحد على طريق خريص بجنب محل سعد الدين للحلويات ومذر كير
والثاني بالدائري الشمالي بين مخرج خمسه ومخج اربعه اللي هو طريق القصيم السريع
والامريكان بالكشااااااااااااااافات لاتعـــداااااااااااااهم (محترفين بالكشافات)
وجزاك الله خير

[عبدالمجيد]

عزالله الي شريته

[ابوسليمان119]

مشكورين على المعلومات الطيبة

اليوم ان شاء الله ابروح وأشترية لأني لي فترة وانا اهوجس فيه

بس احتري احد يجزمني علية

وشكلي جزمت علية

[خيال الصبحا]

السلام عليكم
الأخ غيّام شكراً على
مرورك وتعليقك.وأشكرك
على تعديل السعر وجزاك الله خير
الأخ باحث آثار أشكر لك مرورك وتعليقك
الأخ مدالنظر شكر على توضيح أماكن ساكو.أشكرك
الأخ عبدالمجيد والأخ مقلوب بالعكس الله يوفقكم.وشكراً

[الدبل الثقيل]

جزاك الله خير ياخيال الصبحا.....

يا اخوان نصيحه اللي بيشتري هذا الكشاف لا ياخذ الا من المقاسات الكبيره لو انها كبيره وثقيله لكن خذ من نور أما المقاسات الصغيره لا احد يقربها سعر غالي و نوره ماعندك أحد ... هذا من واقع تجربه وهذا رأيي الشخصي...

[أقلط]

لاهنت اخوي على المعلومات

وكما تفضل اخي.(البدل الثقيل)

المقاسات الكبيرة والا فلا..العام الماضي

اشترينا مقاس الصورة الثالثة..واشترينا كشاف اصفر اللون بنفس الحجم

اظن قيمته 26ريال..طبعا من ساكو.وفي اول كشته الى الدهناء

خرب الكشاف الغالي.وحتى الان لم يعمل وكان (مموه)

اما الاصفر الرخيص.. مازال يعمل ولا يصرف بطارية وقوي جدا(مع صغر حجمه)

وموقع ساكو بالرياض

الاول القديم..طريق التخصصي..قبل العزيزية وانت نتجه جنوب

الثاني..طريق خريص على اليسار وان متجهه شرق

الثالث..حي صلاح الدين..

الرابع...الدائري الشمالي..قبل وكالة العيسى للسيارات وانت متجه شرق (عالم ساكو)

للاحاطة

وفقكم الله

تحيتي وتقديري

[خيال الصبحا]

السلام عليكم
الدبل الثقيل - أقلط
جزاكم الله خير.

[منتعش]

الله يعطيك العافية على الموضوع وعلى الصور
والله يحفظك ويرعاك

[أبوسرحان]

السلام عليكم

خيال الصبحا
الله يعطيك العافيه
كشاف يبين انه قوي جدا وكانه مثل ماتقولون عز الله إنه يستاهل
أخوك أبوسرحان

[الرهدن]

السلام عليكم 00 ياجماعة الخير
ساكو غااااااااااااالين
روحوا للهامساكين00 مثل البرية والمقناص وغيرهم00
موجود عندهم وهذا رقم الوكيل00 إن كان على خبري ( للمصداقية )
مجموعة المصباح التجارية - مركز المعيقلية - الديرة - برج د - الدور 3 - مكتب 311
هاتف 4141000 تحويلة 300

*******************

الماقلايت عالمي والدليل إن فيه أرقام مثل السلاح ليكون عهدة00
له عندي قريب 10 سنوات00 ولايزال جديد
وعندي بطارية إضافية للرحلات اللي أكثر من يوم00
من تجاربي00
أحرص على عدم سقوطة لأن اللمبة تخرب00
وعدوه الشمس لأن لونه أسود فيحصل أن تفضى البطارية بسرعة00
لاتركنه بدون استخدام00 الإستخدام المتكرر ينشط خلايا البطارية فتعطيك وقت أطول
الشحن قريب 10 ساعات00 ومن الكهرباء أفضل بكثير من الشحن بولاعة السيارة00
يستمر مضئ متواصل قريب 40 دقيقة00
وسعر البطارية 125 ريال
انتبه عند أي رحلة تأكد من شحنه00
وكان سعره قديمآ 600 ريال 00 والآن 360 ريال
البطارية معي الآن لها 4 سنوات تقريبآ من الشحن المتواصل 00
لايقربكم الأنواع الصغيرة من هذه الشركة00 فهي كثيرة الأعطال وغير عملية00
الخلاصة /
حلال عليه الدراهم لراعي البر والمعنى00
والسلام عليكم00



أخوكم الرهدن00

والرهدن / طير صغير قريب من العصفور يعيش في مكة 00 والله أعلم 0

حكمة00

** لاتجادل الأحمق فقد يخطئ الناس في التفريق بينكما **

[المشراق]

أخي العزيز الكشاف اللي ذكرت أناشريته من عدة سنوات ويوجد منه تقليد وبدون شحن ( 500 ريال عندما شريته ) وعيبه الثقل فقد وقع على رجل ابني أصبعه الكبير وأسود الظفر حتى طاح 0
وقد وجدت كشاف مشابه له وأصغر حجم وأخف منه في البطحاء ( اسواق جمال ) ولمبته قويه حتى اني احطه في مخباي وامشي على نوره طبعاً الثوب خفيف وقال البائع أن ضمان اللمبة ( 90 سنه ) تسعون سنه , ونوره قوي يشبه الليزر ابيض وقيمته 85 ريال فقط وإن شاء الله انزل صورته والكبير لازال عندي وحطيته على جنب 0 طبعاً الكشاف ينشحن على الكهرباء فقط 220 فولت 0ولايوجد له شاحن سيارة 0

[خيال الصبحا]

السلام عليكم
ورحمة الله وبركاته
الأخ منتعش
أشكر لك مرورك وردك
الأخ alsr7i الله يعافيك وأشكر
لك مرورك وردك
الأخ الرهدن
أشكر لك ردك الجميل
والمعلومات الرائعه.ماقصرت
كفيت ووفيت وشـــــكــــــــــــــراً
أخي المشراق
ممكن معلومات عن الكشاف
وصوره له.وكم يستمر شغال.وبعض
المعلومات والصور.وشكراً لك على ردك