قصتي قصيره ولكن ما ادري كيف اصنفها :

لما كنت صغير ابوي كان ياخذنا لمزارع نصيد فيها انا و اخوي الي اكبر مني , والمزارع هذي معروفه بالابار القديمه ( القلبان ) المحفوره يدويا , وفي احد الابار كان فيه عامود حديد على الجال بينه وبين طرف القليب اقل من شبر , اخوي كان يتمسك فيه ويطل في البير يشوف فيه حمام والا لا , وفي يوم من الايام شافه ابوي وهاوشه و فهمه انه في اي وقت احتمال يطيح هو والعامود الحديد , وطبعا صغار و اخوي يدخل الكلام من اليمين ويطلعه من اليسار , واستمر اخوي كل مره يتمسك في العامود هذا ويطل في القليب تقريبا لمده 6 سنوات وهو يكرر الحركه هذي كل مره ياخذنا ابوي للمكان .

قبل فتره كنت في المكان نفسه وبالتحديد واقف عند القليب نفسه صاحبنا في القصه , محيط بالقليب 11 عمود حديد كلها نفس المقاس والشكل واللون الاحمر المتقشع , كلها موجوده الى الان ما نقص منها الا الي كان اخوي يتعلق فيه ويطل داخل القليب , طليت في داخلها لقيتها مدفونه والعامود طايح فيها على بعد 4 امتار تقريبا .

واذا حصل ومريت من عند المكان ان شاء الله اصوره واحط الصور