موضوع مخصص لمشاكل الثلاجات والبطاريات والتمديدات !!!

[سلمان القريني]

السلام عليكم ورحمة الله وبركاته
اخواني عندي استفسار عن ثلا جة الرماية٦٠ لتر
هل يوجد بها زر تشغيل ٠

وكيف اركب لها قاعدة تركب بحوض الشاص ٠
ارجو من عنده العلم لا يبخل علينا

[راعي هدد 2007]

السلام عليكم ورحمة الله وبركاته

اخواني عندي استفسار عن ثلا جة الرماية٦٠ لتر
هل يوجد بها زر تشغيل ٠

وكيف اركب لها قاعدة تركب بحوض الشاص ٠
ارجو من عنده العلم لا يبخل علينا

يا القرينى اسمع وانا اخوك انا مركب ثلاجه انجل فى حوض شاص ولاعندها اى مشكله 60لتر بس اهم شى القاعده تكون مركبه تركيب صح اى اهتزاز بتخرب فيه واحد يمدد ويركب قاعده على مستوى عالى وسؤالك عن زر اتشغيل اكيد فيها وانت ركب زر فى الغمارة زياده واسلم وسلم

[الزبيرة96]

السلام عليكم ورحمة الله وبركاته

اخواني عندي استفسار عن ثلا جة الرماية٦٠ لتر
هل يوجد بها زر تشغيل ٠
وكيف اركب لها قاعدة تركب بحوض الشاص ٠

ارجو من عنده العلم لا يبخل علينا

ياهلا باخي سلمان

اعتقد ان التشغيل اذا فريت الفرار
ولاكن احسن حل انك تضع فاصل عندك بالغماره مع مؤشر اذا دقيت الزر اشتغلت
هذي طريقتي بالثلاجات واريح لك
بالنسبه للقاعده فصل على نفس المقاس مع وضع شدادين لربط الثلاجه جيد ويمنع الاهتزاز والمطامر .
وهذي صوره اعتذر من صاحبها>>>>>

لعلي وفقت بالرد
اتمنى لك التوفيق

[ابوسلطان28]

السلام عليكم ورحمة الله وبركاته الموضوع ومافيه عندي ثلاجه صيني احترقت وبا احولها كهرب وشغلها علي المحول هل ابتضبط شغلتها ولا لا وشكرا

[عرق المضهور]

ابوسلطان هل هي فريزر او تبريد
وكم خط هل 12فولت و220فولت
وماهو اللذي احترق هل الكمبروسر او ايش
ارجو الاجابه ليتضح الامر

[ابوسلطان28]

220 فولت احترق الكمبرسر فريزر اباقلبها كهرب هل المحول يشغلها او لا على السياره ونكان يشغلها وش المحول

[سدير.com]

السلام عليكم
لاهنتو يأاخوان كم رقم راعي الزلفي وشكرا

[سلمان القريني]

اخوي راعي هدد بيض الله وجهك والله يسلمك من الشر

[سلمان القريني]

اخوي ابو محمد الزبيره لاهنت على الرد وبيض الله وجهك افدتني الله يجزاك بالخير

[المقدر]

استفسار وش افضل مكان لتركيب البطاريه الاحتياطيه للاند كروزر 96
واي احسن الدقمه والا منظم رفيق الدرب لشحن البطاريه

[المقدر]

السلام عليكم
الاخ اللي طلب رقم راعي الزلفي . حمدان الحمدان
جواله 0504224000
ولكم جزيل الشكر

[قنااااص]

يذكرون كهربائي سعودي اسمه حمدان الحميدان في الزلفي محله تحقره فتحه وحده وصغيره لاكن مبدع الرجال بمعنى الكلمه وسهل الله علي واشتغلت عنده شغله لايعلى عليه بصراحه لافي الفنيشنق ولا في المواد ولا في التعامل الله يذكره بالخير
طبعاً انا تقريبن صرت خبير في الشغله مع كثر التعامل مع الورش وشغلة تركيب البطاريتين وطبعاً مع بعض الأعطال اللي واجهتني في بعض التوصيلات عرفت الشغله وفهمتها و اعتبرها الأن شغله تافهه ومافيها ذاك الأبداع يعني عشان العالم تستصعبها لاكن زي مايقولون ريالك يخدمك وعشان كذا اروح اركبها عند اللي متخصصين فيها

اشترى واحد من ربعي وزي مايقولون مثل اخوي لاندكروزر 2010 قبل شهرين بالتحديد وحب انه يركب بطاريه اضافيه بالملحقات طبعاً وكلني الشغله
انا طمرت لورشة رسام راعي اشيقر على طول لأني سمعت عنه من كذا شخص ويمدحون شغله وفعلاً الرجال شغله مرتب وحلو لاكن يعيبه الغلا شوي وما ألومه في الغلا لأنه تحكمه المواد اللي يركبها لاكن بوضح لكم الفروقات الحين بين الثلاثه هاذولي كلهم وانتم احكمو من بتركبون عنده:

المواد جميع المحلات الثلاثه ياخذونها من محل في شارع الريل أسمه سنا متخصص في توصيلات الهواتف والكهرباء والأسلاك وغيرها مادري عن الكلام الجديد اللي سمعته عن سوافي انه صار يستورد من الصين لأن اخر خبري به أوائل العام الماضي لاكن محل سنا مايبيع الا جمله وتكلف على الورش هاذولي
يعني لو رحت تبي منه 3 متر سلك 10 ملي مايبيعك يقول لك خذ اللفه بسعر 900 ريال مدري عاد كم فيها من متر لاكن لفه كبيييره
لو بغيت مشكبيات مايبيعك بالحبه يقول لك خذ كيسه فيها 100 مشكبيه بسعر 20 ريال

يعني لو حبيت تشتغل بيدك لسياره وحده راح تكلفك اذا تبغى مواد نضيفه فلذلك توجه للي يشتغلون في البطاريه الأضافيه احسن لك
ولاتتعب نفسك بالبحث لأني فريت الصناعيه والريل والغرابي كله ابي احد يبيع بنفس جودة المواد اللي عند سنا ومفرد موب جمله ماحصلت مافي الا سنا وبالجمله


نرجع للفرق بين الثلاثه بحكم اطلاعي على المواد اللي يركبونها كلهم وبحثي في المحلات وتسعيراتي للقطع قبل شهرين :
سوافي يركب البطاريه الأضافيه بدون علبة فيوزات 950 ريال والبطاريه اندونيسيه
رسام (راعي اشيقر) 900 ريال والبطاريه باقادر fp
راعي الزلفي 700 ريال إلى 650 ريال والبطاريه اندونيسيه لاكن افضل من اللي يركبها سوافي نوعيه ممتازه

افصل لكم الشغله بأسعار تقريبيه مع هامش الربح اللي ياخذونه الثلاثه
سوافي: 250 ريال بطاريه+دقمه 150 ريال+كرسي البطاريه50 ريال+تمديدات اسلاك ومشكبيات 100 ريال=550 ريال يعني يكون ماخذ 400ريال شغل يد

رسام: 350 ريال بطاريه+دقمه 150 ريال+كرسي البطاريه 50 ريال+تمديدات اسلاك ومشكبيات 100 ريال=650 ريال يكون ماخذ250 ريال شغل يد

حمدان (راعي الزلفي): 250 ريال بطاريه+دقمه 150 ريال+كرسي البطاريه 50 ريال+تمديدات اسلاك ومشكبيات 100 ريال=550 ريال يعني يكون ماخذ 150 ريال شغل يد

لمبة الكبوت:
سوافي120 ريال للمبه: لمبه تجاريه 10 ريال+اسلاك ومشكبيات 20 ريال+قاطع وقاعدته 15 ريال+علبة فيوزات ألزااااميه يركبها لك 20 ريال =65 ريال يعني ماخذ شغل يد 55 ريال
رسام 120 ريال للمبه: لمبه تجاريه 10 ريال+اسلاك ومشكبيات 20 ريال+ قاطع ألماني وقاعدته20 ريال+ علبة فيوزات إلزاميه يركبها لك 20 ريال=70 ريال يعني ماخذ شغل يد 50 ريال

حمدان(راعي الزلفي )متوفر عنده نوعين للمبه:

80 ريال للمبه: لمبه اوسرام اصليه15 ريال+اسلاك ومشكبيات 20 ريال+قاطع ألماني وقاعدته 20 ريال بدون علبة فيوزات=55 ريال يعني 25 ريال شغل يد
120 ريال للمبه: لمبة تويوتا اصليه حقت نورعالي لاندكروزر 97 بـ 30 ريال+اسلاك ومشكبيات 20 ريال +قاطع ألماني وقاعدته 20 ريال+20 ريال علبة فيوزات=90 ريال يعني ماخذ 30 ريال شغل يد


جميع الورش الثلاث يستخدمون الريكم (تغطية الأسلاك بالبلاستيك الحراري بدون شطرطون) وجميعهم يلحمون الأسلاك بلحام رصاص في النهايات (المشكبيات)

جميعهم يستخدمون سلك 10 ملي ومن نفس المصدر يشترونه اللي هو سنا لتوصيل البطارية الأضافيه

جميعهم يتسخدمون دقمة الجمس لتنضيم البطاريه الأضافيه وكلهم نفس الدقمه يستخدمون




الفرق اللي حسيته من الثلاثه وبأضرب مثال سلك الثلاجه
سوافي يمدد لك سلك الثلاجه بسعر 120 ريال ويستخدم سلك 5 ملي وكافي جداً للثلاجه لاكن النوعية رديئه نوعاً ما (العازل ضعيف)

رسام يمدد لك سلك الثلاجه بسعر 120 ريال ويستخدم سلك 10 ملي وبصراحه فوق استخدام الثلاجه ويكلف عليه مواد لاكنه في النهايه بيحمل سعرها على الزبون ، الثلاجه لاتستهلك الا 5 امبير وسلكها اللي يجي شد بلد معها 3 ملي فأنا كزبون مانيب بحاجة سلك 10 ملي وفي النهاية انت بتحمل قيمته على ضهري ياراعي الورشه

حمدان يركب سلك الثلاجه بسعر 120 ريال ويستخدم سلك 5 ملي وجودته عاليه وهو نفسه اللي نصحني استخدم سلك 5 ملي ويركب لك فاصل في الطبلون وكتاوت عشان مايحمل زياده على الفاصل ويعطي ثبات للكهراء وقال لي اذا تبي سلك 10 ملي اركب لك بـ 140 بنفس الطريقه فاصل وكتاوت ماعندي مشكله في النهايه انت اللي بتدفع لاكن انت موب بحاجته


يعجبني في راعي الزلفي شفافيته واسعاره اكثر من ممتازه وتعامله راااائع وفي الموعد يخلص شغلك والشخص اصلن فني متخصص كهرباء سيارات وعنده شهاده من المعهد الملكي ويشتغل شغلات ثانيه كهربائيه غير البطاريه الأضافيه زي مثبت السرعه وغيرها بينما سوافي ورسام بس شغل بطاريه اضافيه وماطور ومحول يعني الشغلات المعروفه

رسام يضيف لك اشياء زياده ويحملها على ضهر الزبون والزبون موب بحاجتها اصلن وتعيبه المقارنات يعني يقول لك شف السلك هاذا مايركبه الورشه الفلانيه والفاصل هاذا مايحطه فلان وكذا بالعربي يحسسك انه مخترع نظام البطاريه الأضافيه باسلاكه وكل شي وهو مصدرهم كلهم في المواد واحد اللي هو محل سنا خخخخخ يعني الغشيم بيروح فيها عنده بصراحه يعني تعامله شوي ماعجبني والناس ترا قناعات ونفسيات انا احكم على نفسي وتجربتي
وغير كذا الرجال هاوي وممارس وليس متخصص مثل راعي الزلفي

سوافي بعد ماكسب شهره صار يرى في نفسه انه الوحيد وصار يتضرب في الناس مايدري ان الناس صارت تعرف كل شي وتقرى وتطلع في النت وغيره وتعرف وش الزين ووش الشين يعني زي ماصار مع اخوي كاتب الموضوع



في نهاية الموضوع نرجع لموتر خويي الاندكروزر 2010 والحمد لله استقر الراي على التركيب عند حمدان اللي بالزلفي بعد مارفض رسام يركب لنا محول البطاريه الأضافيه اللي من رفيق الدرب وعذره أنه جهاز صيني وانا ماودي اخرب سمعتي على حساب جهاز مادري وشو يعني العذر ماعجبني حتى رفض ان يرى محتوياته وتكويناته ولو جينا للواقع اصلن موب مكسبه مثل ماتكسبه الدقمه والشغل القديم

توجهت لحمدان في الزلفي وأصريت عليه انه يفتح الجهاز ويشوف اذا كان ذو جوده واعتماديه عاليه والا لا بحكم انه انسان متخصص ودارس الكهرباء وفعلن فك الجهاز واشاد بجودت صناعته رغم انها صينيه وتكلل الفحص بعد تركيب الجهاز وعمل الأختبارات الازمه عليه وتبين انه ذو كفائه اعلى بكثير من الدقمه بعد ما جلست عنده السياره 3 ايام لعمل كافة الأختبارات الازمه وراح اوضح لكم فرق واحد:
الدقمه في احسن حالاتها ماتطلع لك الا 50 أمبير لشحن البطاريه الأضافيه اذا كانت البطارية الأضافية فارغه تماما وتستمر على نفس الجهد حتى أذا كانت البطاريه الأضافيه مليانه مما يقلل من عمر البطاريه
في حين ان منضم رفيق الدرب في حال كون البطارية الأضافيه فااارغه يصل إلى 150 أمبير يعني شحن أسرع ثم يقل تدريجياً اذا امتلت البطاريه إلى ان يصل إلى 3 أمبير في بعض الحالات واذا تم تعبئة البطاريه الأضافية تماماّ فإن الشحن يفصل

انصحكم بمنظم رفيق الدرب لأنه يحمل ميزات كثيره جداً وبإذن الله اذا كان لدي وقت سوف اضع موضوع متكامل عن ميزات منضم رفيق الدرب



في نهاية الموضوع اللي ركب عند سوافي لايضيق صدره ويقول والله بروح اشيل شغله كله وأشتغل من جديد الأسلاك ماعمرها تخرب مجرد انها تملّح أطرافها ألزم ماعليك انك تحكها وتنضفها وبس
وأن خرب عندك شي فالمشاكل المتوقعه فهي يامن الدقمه وأنصحك تغيرها حتى لو انها ماخربت بمنضم رفيق الدرب لأنه فيه مميزات افضل بمرااااحل من الدقمه أو يخرب عندك مشكبيه تكون توسعت او سلك مالحم زين في المشكبيه وياقل ماتحصل هاذي انت بس مجرد انك تفحص السلك عند اقرب كهربائي راح يصلحه لك
او لمبة كبوت محترقه بحكم انها تجاريه ركب اوسرام اصليه تلقاها في محلات الزينه وركبها عند اقرب كهربائي
اما مسألت انك تغير شغلك كله وهو مافيه شي حرااااااااام دافع فيه فلوس انت دامه سالك معك ومافيه أي مشكله خله ومافيه شي يدوم بدون مايخرب ترا


أتمنى اني افدتكم بتجربتي

منقول للفائدة

الله يعطيك العافيه

هذا الكلام ولا يهونون اخواننا المشاركين

تفصيل جميييييل

الله يعطيك العافيه اخي علي
والشكر ايضا لجميع المشااااركين وبارك الله فيكم

[الزبيرة96]

استفسار وش افضل مكان لتركيب البطاريه الاحتياطيه للاند كروزر 96
واي احسن الدقمه والا منظم رفيق الدرب لشحن البطاريه

على اذن اخي علي العساف صاحب الموضوع
حياك اخي المقدر......
الصراحه انا جربت رفيق الدرب ولاضبط معي تماما احيانا اذا فضت البطاريه الاحتياط لايقوم بتوصيل الكهرب باستمرار هذا ماحصل علي والى الان وهو عطلان
وسالت احد الشباب وقال غير الدقمه لادور ارخص وتتحمل ومداها طويل وهو يستخدمها من زمان.
بالنسبه لمكان البطاريه يكون بمقدمة الكبوت
وهذه صوره واعتذر من صاحبها
الموتر ديزل لاكن هل يختلف عن البنزين الله اعلم
بالنسبه للمكان الفاضي

لعلي وفقت بالرد
اتمنى لك التوفيق

[الزبيرة96]

220 فولت احترق الكمبرسر فريزر اباقلبها كهرب هل المحول يشغلها او لا على السياره ونكان يشغلها وش المحول

حياك اخي ابو سلطان
انا اشوف انك تركب كمبروسر 220فولت وتشغله على المحول بيتعبك من جهة صرف الكهرب ولازم محول قوي والواط اكثر والسياره لازم تكون شغاله او كل اشوي تشغلها تشحن
++++++++++
انا اشوف انك تغير الكمبروسر الى 12فولت افضل والصرفيه للكهرب اقل بكثير عن 220v
وهذي اسعار الموتور من فتره ولاادري هل تغيرت ام لا
الكمبروسر صيني اعتقد سعره من600 الى 700ريال والله العالم
والكمبروسر الالماني دانفوس1300ريال قبل فتره .

بالتوفيق يابوسلطان

[الكونغررس]

السلام عليكم×

كل عام وانتم بخير وتقبل الله طاعتكم





انا شريت الويكو الالكترونية 40 لتر جديدة نفس اللي بالصورة وانا جديد على الثلاجات وتمديداتها ومدى استهلاكها من الكهرباء مع العلم اني مددت لها واير لبطاريه السيارة واللي عندي استفسارات بسيطة جدا ومنها :






1_ انا اغلب رحلاتي للبر يومين الى ثلاث ايام متواصله هل عادي اشغل الثلاجة وهي بالسيارة لهذي المدة بالكامل مع العلم ان اغلب مدة تكون فيها السيارة طافية من المغرب لغايه الفجر ؟×

2_ كم تآخذ من الكهرباء سواء فولت او واط ومدى تأثيرها على بطارية السيارة ؟×

3_ هل من الضرورة وضع بطاريه اضافية للسيارة ولا مو ضروري ×؟×

4_هل هو طويل مدى التثليج ولا سريع وكم يآخذ من الوقت تقريباً ؟×

5_ انا اشتريتها من السنيدي مع الضمان سنة هل الكمبريسر الماني اصلي وحسب كلامهم اصلي بس نفسياً مو مرتاح ؟×



واذا في نصايح غيرها ياليت تذكرونها حسب خبرتكم ،، واكون شاكر للجميع×