مشكلة بالانوار الاماميه يوكن 2011

[m.shamsi]

أخوي خالد

وين موقعك

اذا في الشرقية ممكن أدلك على واحد يفحص السيارة بالكمبيوتر وان شاء الله يطلع البلاء

هذا في حال ماضبطت الامور في الوكالة لاسمح الله

[خالد الحفر]

m.shamsi

موقعي حفرالباطن اخوي وابشرك المشكله انحلت اليوم شريت من الوكاله قالو بطاريه وركبوها وهلحين الحمد لله الموتر ضبط وضعه كامل والبطاريه اللي شريتها من محل البطاريات جيت برجعها عيو يقولون خلاص مستخدمها وخلها ع الله اهم شي الموتر الحمد لله طلع عطله بسيط واشكركم اخواني على تعاونكم معاي وماقصرتو كلكم

[m.shamsi]

m.shamsi

موقعي حفرالباطن اخوي وابشرك المشكله انحلت اليوم شريت من الوكاله قالو بطاريه وركبوها وهلحين الحمد لله الموتر ضبط وضعه كامل والبطاريه اللي شريتها من محل البطاريات جيت برجعها عيو يقولون خلاص مستخدمها وخلها ع الله اهم شي الموتر الحمد لله طلع عطله بسيط واشكركم اخواني على تعاونكم معاي وماقصرتو كلكم

الحمد لله ياخوي

مافي شي تتعلمه ببلاش

مشاوريك على الورش والوكاله فتحت عيونك على أشياء ثانيه

وصدقني خرابات اليوكن كلها بسيطه ولله الحمد بس المشكله في تشخيص الخلل ودراستك للمشكلة

موفقين

[خالد الحفر]

m.shamsi

الحمد لله يارب والله يوم طلعت بطاريه ماهمتني باقي الامور كلها سهالات

[خالد الحفر]

ونرجع نرفع الموضوع من جديد وندور الحل لهالمشكله اللي بدت تقروش مخي وشكلي ببيع الموتر بسبب هالشي

- المشكله رجعت ترميش مو بسيط ع طول ترمش السياره داخلي وخارجي غيرت دينمو + بطاريه + تشييك على الفيوزات كلها = والحاله موجوده مااختفت

[mody s9]

اول شي شيك على اصابع البطاريه شدها مظبوط وشوف الاصايع اذ عليها ملح او مهتريه اذ كان الوضع تمام ان شاء الله حاول تتبع افياش الكهرب والسلك الموصل للبودي من البطاريه وموفق ان شاء الله .

[سوبرمان]

أخي الكريم خالد الحفر

السلام عليكم ورحمة الله وبركاته

صار لي تقريباً نفس المشكلة ولكن الذي يرمش هو الراديو تبع السيارة فأحياناً وأنا أمشي يرمش ويطفيء لثوان ثم يرجع وأيضا إذا كبست النور العالي أيضاً يرمش الراديو ، وهذه الشغلة صار لها تقريباً أكثر من عشرة شهور وأتعبتي كثيراً وماخليت خبير ولا ورشة كهرباء إلا وزرتها وجميعهم يفحصون ويقولون لي أن الكهرباء عندك ممتازه .
وأخيراً وبفضل من الله إكتشفت الأمر أنا بنفسي ماهو سبب هذه الرمشة وهو إرتخاء أصابع البطارية وحاولت أشد عليهم لكنها حتى آخر سِنّه تبقى تتحرك وأدركت أن المشكلة في الأصابع وغيرت الأصابع أول مرة ولكنها لم تضبط وأخيراً غيرت الكيابل السالب والموجب كاملين من الوكالة وبفضل الله عز وجل ضبطت .
هذه تجربتي مع رمش الأنوار وآمل أني أفدتك وتُحل مشكلتك وأتمنى لك التوفيق وحل المشكلة .

[خالد الحفر]

اخوي mody s9 حياك الله اولاً

والله ياخوك شديت عليها اكثر من مره ونفس الوضع ماتغير شي والبلشه اني جالس اصرف من هالفلوس على قلة سنع لا حلينا المشكله ولا وفرنا فلوسنا بس يالله مقسوم خير

اصابع البطاريه مضبوطه ونظيفه مابها نسبة ملح ولا مهتريه

[خالد الحفر]

اولاً- اخوي سوبرمان حيااك الله نورت الموضوع
ثانياً - والله ياخوك اصابع البطاريه جديده ورحت للوكاله ولمحلات برا يقولون زينه مايحتاج تغير كيابل السالب والموجب
- فكرت اني ادخله ورش عاديه بس اخاف يشلحون منه وديته لواحد سوري قال اشيك لك عليه وعلى الظفيره بس خفت من سالفته يقول ماتجلس عند السياره تروح وتجيها اي وقف ثاني ممنوع تدخل الورشه والبلشه خايف انها تسبب لي مشاكل

واشكر لك مرورك اخوي

[خالد الحفر]

والله مادري وش الحل مع هالمشكله قررت ابيع السياره بسبب هالمشكله عطونا حل قبل ماافرط بموتري والله نفسي متعلقه به ولكن المشكله خلتني اقرر البيع

[خالد الحفر]

ونرفعه وننتظر احد يحل المشكله

[خالد الحفر]

بعد مكالمة المدير الاقليمي تم الاتفاق ع ادخال السياره يوم الاحد الجاي للوكاله وفحص السياره يدوي للكهرباء

[ابوعلي911]

الله يساعدك يا خالد.....لو انك في الرياض كان قلت لك مر ورشة الجابري في صناعية الفواز

يحلون اي شيء في الكهرباء وتخصصهم من زمان.....ولي تجربه معهم وكانوا قدها

بالتوفيق

[خالد الحفر]

ابو علي911 اشكرك على مرورك اخوي ولكن الله يعين ياخوك يعلم الله ان المشكله من رمضان وهي معاي وهاذا حالي مع الوكاله اخاف اوديه ورشه يشلحون الموتر ووديته للوكاله جلس يومين وثلاث واربع ولا فادة بشي لهلحين وهذا حالي الله يعين بس

[essa2088]

اخوي اللة يعينك انا نسيبى صارت لة مشكلة باليوكن حقة طفي وما رضى يشتغل قعد بالوكالة اسبوعين الين طلعت المشكلة بواير داخل الطابلون فية التماس وتم اصلاحة وربك يعين