دعوه عامه لكل مكشاتي .. لرفع ثقافة المحافظة على البيئه .. اتمنى الدخول

[ابوعزآم]

السلام عليكم ورحمة الله وبركاته ..


حبايبي المكشاتيه .. انا كل ما رحت لمكان للبر بكشت يضيق صدري من هالمناظر اللي تضيق الصدر .. الباغات والقواطي .. وحوسة الفياض من المكشاتيه الله يهديهم ..

يا أخي الحفاظ على البيئه أمر مهم جدا ..

الشخص اذا راح لفيضه وشاف له محل وش زينه يضيق صدره من المكان ووساخته .. ويضطر انه ينظفه ..

والأهم من هذا كله أهل الحلال يدعون عليكم .. يا أخي انت تدري ان اهل الحلال كل مابغوا يرعون بحلالهم بالفياض يضطرون لتنظيف المكان من الأكياس والمخلفات البيئيه والدسم ( باقي الأكل المكبوب )


يا أخوان لازم نتكاتف ونتعاون ونزيد الثقافه بيننا وبين اصحابنا وأقاربنا وأبنائنا ..


المفروض الشخص من يوم ينزل من سيارته يعلق له كيس زباله وانتم بكرامه بغصون السدر والطلاح .. وكل شخص يضع مخلفاته فيها ..

وبعد ماتنتهي الرحله بيكون عندك كيس او كيسين كله مخلفات وأنت كذا حافظت على مكانك وتركت المكان للشخص اللي بعدك نضيف وأيضا اهل الحلال مايتضايقون .. ومالك الا الأجر .. وبعد كذا تأخذ مخلفاتك وماتولع فيها بالنار لأنك كذا تسبب مخلفات وأضرار اكثر من قبل .. بتشويه المكان بشكل قوي .. انصحك أنك تأخذها معك وترميها بمكان مخصص لها اذا ماحولك شي .. اقل شي حظها بعيد عن منطقة الربيع وولع فيها ..


اتمنى منكم المشاركه وطرح ماهو مفيد والأهم نشر هذه الثقافات بين أبنائنا واخواننا وأصدقائنا ..

وبكذا نكون قد حافظنا على بيئتنا ..


تقبلوا مني كل الموده والإحترام ..

[جراند شروكي]

مساك الله بالف خير ابو عزام ،،، وكثر الله امثالك ،،، وهذا والله اللي نبيه ان الواحد قدر المستطاع يجعل معه كم كيس زباله وتعتبر من ضمن اغراض تجهيز عزبة الكشته ،،،،،،
والله يا جماعة الخير انه يضيق صدرك لا مريت شعيب والله فيضة ربيعها يفتح النفس وتلقى علب ووساخه مخربه منظر المكان وتضطر انك تغير مكانك بسبب هالمهملات اللي في كل مكان ،،،،،
موضوعك ممتاز وبارك الله فيك
وعندي ملاحظه بسيطه : اتمنى كل واحد يعود ابنه على هالعاده الزينه وهي والله تربيه من الصغر ،،، انا وانت واخواني الاعضاء وكل واحد ينقل هالفكره للجميع ونكون تقريبا وصلنا رساله حلوه وتربيه نبويه حثنا عليها المصطفى عليه الصلاه والسلام ،،،،
تقبل مروري واسف على الاطاله ، اخوك : ابو طلال .

[ابورايف]

موضوع قيم وهادفه

الأمر بسيط جداً ولا تحتاج أجتهادات

كل ماعليك أن تدع المكان نظيفاً

وبذلك أتقيت اللعنات من البشر والحيوانات والدواب

أخي العزيز/صاحب الموضوع

أقدر لك كل كلمه كتبت وسطرت بهذا الموضوع
كما أقدر فيك أهتمامك وحرصك بالبيئه والمحافظه عليها
وهذا ليس بمستغرب عليك

كل الشكر لك

[ذائع الصيت9]

موضوع ممتاز بس لو تضع مسابقة بين ابنه هذا القترح

[ابوعزآم]

بما ان موسم الامطار والربيع مقبل حبيت ارفع الموضوع ,,

[حسـام]

[CENTER]

تأمن بالله نفايات العام الماضي من البلاستيك والالمنيوم
والتي تم جمعها طوال الموسم بعد التزكين على العامل بفرز التفايات أول بأول
ووضعها في أكياس .. وفي أخر الموسم تم وضعها في كراتين كبيرة
ولاكن تم وضعها في أحد مستودعات المخيم ولاتزال موجوده الى اليوم في مستودع المخيم
ولاكن جارى توصيلها لاقرب مكان لجمع النفيات وتكريرها قريبا

[نوفيتا]

وعليكم السلام
موضوع جدا رائع واشكرك على تفكيرك الصائب وفي وحله ووقته
والمشكله ايضا هي البلديات لا تختار بحكمه موقع لكب النفايات وانتم بكرامه هذا اكثر شي لاحظته في براري حائل وخلف القرى بكل صراحه 85% من المخلفات في البراري سببها البلديات لا تقوم بدفن القمامه ولا يقومون بتسويرها بشبك او حاجز جداري بل فقط بكومة من التراب فقط لا اكثر
اسف على الاطاله ولك اجمل التحايا والتقدير
اخوك __ ماجد الشمري

[speed62]

تسلم يا ابو عزام على حرصك وغيرتك على نضافة بلدك
الله يوفقك ونحن معك بهالفكره الطيبه