موضوع متجدد عن طريق الرياض بيشه الجديد

[مدرس في نجد]

السلام عليكم ورحمة الله مساكم الله بالخير انا بإذن الله بمشي الاربعاء القادم للجنوب وانا ساكن بالمزاحميه وابي الوصف كامل لاني اول مره امشي معه اخر شي وصلته الرين سيارتي دفع رباعي

وعليكم السلام ورحمة الله وبركاته
شف يالغالي من جهة المزاحمية مامشيت معه نهائياً
لكن تصل الرين من جهة الرياض تصل لقبيبان أمش واصل طريقك لمسافة 138 كم
تلقى محطة برودان على يسارك تزود بالوقود منها
حتى يتقفل معك الخط يمين يسار خذ يسار باتجاه صيحة وإذا وصلت صيحة أمش حتى تجيك المحطة وأسأل عن قمران وأمش مع أعمدة الكهرب حتى تصل لقمران
طبعا ً المسافة من صيحة إلى قمران 29 كم وللمعلومية الطريق متعب جداً كباطنيج وفيه نفود قبل قمران بسيطة
إذا وصلت قمران فأمسك أعمدة الكهرب حتى تلقى خط بيشة معترض
خذ يسار وأمش سيده ولمسافة 68 كم
(( طريق ممهد ممتاز أحذر من بعض اللفات وشغل النور لأن الغبار يصادفك في الطريق ))
ويمسك معك الأسفلت ويسارك هجرة العسيلة ويمكنك تعبئة البنزين من هجرة العسيلة
تمشي سيدة لبيشة من هجرة العسيلة إلى كبري حدا مفرق رنية يمين وادي الدواسر يسار بيشة سيدة واصل لبيشة من الكبري ولمسافة 114 كم
حتى يجيك كبري الجنينة وعلى يمينك جبل خشيم الذيب أمسك الطريق سيدة ولمسافة 38 كم حتى تلقى جبل الصايرة على يسارك
وأمسك من عنده يمين طريق الملك عبدالله وبكذا وصلت بيشة بالسلامة أن شاء الله
تقبل تحياتي

[مدرس في نجد]

الله يعطيك العافيه ويرحم والدينك

الله يعافيك ويرحم والدي ووالديك والمسلمين أجمعين

[مدرس في نجد]

كفيت ووفيت بيض الله وجهك
ماهي اخبار الوصله الاضافيه 22 كم

ووجهك أبيض
بالنسبة للوصلة 22 كم مابعد قمران
الشركة شغالة في الطبقة الطينية رص وقص بعض الجبال وصب العبارات الصندوقية وشغلهم متواصل وومكن يأخذ وقت لأن المنطقة جبلية طينية فقص الجبال وإزاحة الرمال تأخذ وقت وجميع المعدات متواجدة في هذه الوصلة بكثرة وكثافة

[مدرس في نجد]

يعطيك الف عافيه يا اخي مدرس في نجد انت والاخوان المتواجدين
انا سوالي بسيط ابي المسافة من الرياض الى خميس مشيط مع الطريق هذا الجديد ومتى تنصح بالسفر فيه مع العائلة وكمان هل يوجد فيه محطات او وشلون التزود بالوقود وشكرا

الله يعافيك
مابعد الرين إلى الرياض ماعندي علم بالمسافة لكن من الرين إلى خميس مشيط 634 كم
ولا أنصح بسفر العائلة معه فأهلك غالين على قلبك ولن ترضى بالمقطعه مع هذا الطريق وحط في حسبانك كل شيء من الأعطال
والمحطات موجودة في الهجر ومافي أي مشكلة في الوقود
نصيحتي بالسفر معه في شوال المقبل أن شاء الله

[مدرس في نجد]

الى اخي العزيز مدرس في نجد

لو تصطحب معك كامرا للتصوير وتتحف الاخوان بصور للمواقع ومفارق الطرق و ماتراه ذا اهميه للجميع

ولك مني جزيل الشكر والعرفان

حياك الله أن شاء الله خلال الفترة القادمة بإذن الله

[مدرس في نجد]

محدث الثلاثاء 1434/5/7 هـــ
من جهة الرياض
- الشركة شغلها متواصل في الوصلة الـــ 20 كم مابعد هجرة قمران بالقرب من الأرمض من خلال صب العبارات ورص الطبقة الطينية وقص الجبال وإزاحة الرمال
- من هجرة قمران باتجاه العسيلة بمسافة 29 كم مافي أي تقدم نهائياً
- بالقرب من أبيار العرمة يوجد هضبة معترضة للطريق قابلت المهندس اليوم وقال بأن الديناميت لم يعمل أي شيء في تفجيرها ولهم طلبية من أمريكا مادة تفتيت الصخور
- من العسيلة باتجاهـ قمران الأسفلت توقف على بعد 12 كم الطبقة الأولى والآن شغالين في الطبقة الأخيرة من الأسفلت من العسيلة وبالمسافة السابقة
- الطبقة الطينية تجاوزت اليوم مسافة 32 كم مابين طبقة طينية أولى وثانية وطبقة حجارة
- الطريق الجانبي للطريق ممهد وممتاز
- الشغل متواصل في صب جوانب كباري الفرشة وتم العمل في الكبري الأول
- المصدات الجانبية في كباري الفرشة ليس فيه أي تقدم



تقبلوا أطيب التحايا

[معي باث]

بيض الله وجيهكم ولاهنتو

كفيتو ووفيتو

[mmma123]

كل الشكر و التقدير لك
اخبارك ننتظرها بفارغ الصبر
حفظك الله

[ابو فهد وناصر]

الله يعطيك العافية على المعلومات المتواصله
عندي استفسار عن المسافة بين الحوطة وطريق الرين

[مدرس في نجد]

كل الشكر و التقدير لك
اخبارك ننتظرها بفارغ الصبر
حفظك الله

حياك الله ومنور الموضوع ودمت بحفظ الرحمن

[مدرس في نجد]

nter][COLOR="Blue"][SIZE="5"]79]الله يعطيك العافية على المعلومات المتواصله
عندي استفسار عن المسافة بين الحوطة وطريق الرين

الله يعافيك
على حسب ماسمعت أن المسافة ثمانيـ80ـــن كم

[ahmad1909]

يعطيك العافيه والمعذرة سوال اخير لو تذكر لي بس المناطق او الهجر اللي راح امر فيها لحد ما اوصل للخميس علشان ما اضيع وسلامتك

[مدرس في نجد]

يعطيك العافيه والمعذرة سوال اخير لو تذكر لي بس المناطق او الهجر اللي راح امر فيها لحد ما اوصل للخميس علشان ما اضيع وسلامتك

الهجر والقرى كالتالي
تصل من الحوطة إلى الرين
وبعدها قبيبان وتمشي من قبيبان لمسافة 80 كم باتجاهـ بيشة تلقى هجرة على يسارك وفيها مفرق للأفلاج تقريباً أن أسمها أم أثلة أو الهمجة وبعدها بـ 25 كم تلقى برودان على يسارك وعب من المحطه بنزين وبعدها تقريبا 30 كم تلقى الطريق تقفل معك وإجباري تاخذ يمين باتجاه حصاة قحطان يسار باتجاهـ صيحة وخذ يسار باتجاهـ صيحة واذا وصلت صيحة ينقطع معك الأسفلت وتمشي مع طريق مبطنج متعب مرررررررهـ باتجاه قمران مسافته 29 كم مع أعمدة الكهرباء وإذا وصلت قمران تمشي ممكن 7 كم يجيك خط بيشة معترض خذ يسار ويبدأ معك الخط تمهيده ممتازهـ وتلقى كبري وبعد الكبري سكن الشركة وبعد السكن تجيك هضبة معترضة للطريق تعداها بــ 2 كم وخذ يسار باتجاهـ هضبة على بعد 2 كم وهنا محطة بنزين أسمها العرمة وبعد ماتعبي بنزين أرجع لطريقك الأول وأمش لمسافة 45 كم ويمسك معك الأسفلت وبعدها بـ 12 كم هجرة العسيلة على يسارك واصل طريقك ولمسافة 18 كم هجرة النميص على يمينك واصل طريقك بـ 30 كم تبدا معك كباري الفرشة الثلاثة تتعداها بمسافة 29 كم يبدأ معك كبري حدا تقاطع رنية وادي الدواسر طبعاً يمين باتجاه رنية يسار باتجاه وادي الدواسر وهنا في الكبري سكن الشركة ومركز حدا يتبع لإمارة مكة المكرمة والمسافة من هجرة العسيلة إلى كبري حدا 82 كم واصل سيدهـ باتجاه بيشة ولمسافة 114 كم تقابل كبري على يمينه جبل خشيم الذيب وقرية الجنينة
واصل ولمسافة 38 كم تلقى جبل الصايرة على يسارك ومفرق بيشة على يمينك طريق الملك عبدالله وبإمكانك تدخل بيشة وتمسك طريق الخميس وبإمكانك تواصل طريقك سيدة حتى تلقى طريق بيشة معترض قدامك خذ يمين ولمسافة 5 كم وخذ يسار باتجاه الخميس والمسافة من هنا للخميس 209 كم تصل بالسلامة وتوقع في الطريق
:::::
:::
::
:
نصيحة لاتمشي مع الطريق في الليل نهائياً
:
::
:::
::::

تقبل تحياتي

[mmma123]

كالعاده كفييت وفييت بيض الله وجهك

[معي باث]

صباحكم عسل انا جيت امس مع الطريق روعه مررره ولا فيه مطبات ولا شي واصعب نا فيه شوي الوصله اللي من عند الابيار فييها تغاريز شوي والباقي امشي ١٢٠ وانا مرتاح