باسم الله الرحمن الرحيم
السلام عليكم ورحمة الله وبركاته،،
سوف ادخل في الموضوع مباشرة لكي لا اطيل عليكم اضافة انا ما احك راسي من الشغل الله لا يشغلنا الا بطاعته ورضاه
اخواني الكرام...
انا اعجبني موضوع احد الاخوان سفير الجزيرة الموضوع ( يا اخي مهوب لازم تنام وسط الفيضة )
بخصوص سلوكيات المتنزة للبر الي هم: انا وانت واخوي وخوك وولد عمي وعمك واخويانا .. الى اخوك في الاسلام الي لا تربطك به صله قرابة
الموضوع هذا يهم كل واحد فينا وهو لا يشعر بذالك وهي السلوكيات الصحيحة في التعامل مع الكشتات اما في فيضة ولا في عرق ولا في ضلع ولا حزم ولا سهل حتى على البحر والشاطي
يا اخوان يا حبايبنا القدميين والجديديين في الكشتات هناك عدد من السلوكيات ياليت نحرص نعيطها جانب من الاهتمام الحرص هذا راح ينعكس عليك ويفيدك انت في الجانب الاول وفي جانب اخر يفيد احد المقربين عليك اضافة هذا سلوك المسلم الصحيح
1- لا تدخل بسيارتك الروضة وتموت العشب ونشاهد هذا الشي اذا جيت الروضة تشوف الكشاتة متحمسين الله يهديهم يزورق بين اشجار الطلح كنهم ابل هاظله خذ لفة على الروضة ووقف ودور لك محل خارج الروضة وتعال طلق ارجوالك وتمش واستفد من الطلعه.
2- النوم خارج الفيضة ابرك لثلاثة اسباب:
* الاول/ ان الارض تنز من الماء ولا راح تتهنى في النوم والجلسة في الليل
* الثاني/ النوم سبحان الله في الفيضة او الروضة انواع الجن والكوابيس والاحلام المزعجة... اضافة ان الرسول علية افضل الصلاة والتسليم نهى عن النوم في بطون الاودية ومجمع السيل وهاذي تعتبر مجمع سيل الفيضة
* الثالث/ تخيل انك متطرف برا الروضة وقاعد تشوفها من بيعد منظر خلاب جداً ( وشكل كلمه خلاب واجد محد يعرفها هههه يعني زين جميل المنظر )
3-تخيل كل كشات دخل الفيضة وشب ضوء فيها يعني اسبوعين يبي يصير فيها جدري الفيضة.
4- النظافة حقيقة شهادة حق في تحسن كبير في المحافظة على المكان بعد مغادرتة وهذا بفضل والله ثمن والله منتدى مكشات وتاثيرة على الكشاته والحملات والنصائح وحرص بعض الاعضاء على هذا الجانب (وسوف احكي لكم قصة واقعية حاصله لي انا شخصياً اذا كشتت انا والاهل والاخوان وبعض انسابي - ازواج خواتي - نبي نهضل يعني نرجع لرياض اقعد انظف المحل اقسم بالله كانو يضحكون علي ويستهترون ويقلون كلام مضحك علي هههه وكنت اقولهم كلمه واحدة فقط - عشان اذا جيت لهذا المحل مره ثانية احصله نظيف لي .. وابشركم الحين لا كبيرهم ولا صغيرهم ولا بعد البنات الصغار الله يصلحهم يقعدون ينظفون المحل افضل من يوم نجي وهو عليه نفع فيهم الصرار والتحدي معهم وغيرتهم كلهم )
5- الاحتطاب الجار الي نشاهدة ما قلنا لا تحطب ولكن ياليت الاحتطاب يكون بالمعقول وعلى قد جلستك والكشتة .. اشاهدة حقيقة فيه بعض الكشاته تحصلهم اثنيين ولا ثلاثة وتلقاهم يشبون ضوء تقول عندهم قار يبون يسخنونه حرام يا جماعة الاسلام نهى عن الاسراف .
الرسالة الي وجهها الى ادارة المنتدى والمشرفين والاعضاء
والله ثمن والله ثمن والله
يا تاثير منتدى مكشات افضل من مائة حمله تسويها البلدية او اي قطاع اخر
اتمنى ان تقوم ادارة منتدى مكشات اطلاق حمله تغيير سلوك المتنزه الى الافضل
صدقوني راح تكون ايجابية بكل المعاني
واسف جداً على الاطاله
رد مع اقتباس
