طلب معلومات عن التندرا

[أبو فروة]

السلام عليكم ورحمة الله وبركاته
مساء الخير على الجميع

ودي استشيركم عن التندرا باب واحد 2012 مكينة 5.7 اذا احد منكم جربه
عن راحته بالخط والبر هل هو يقارن براحة الجيوب الصوالين او مثل الشاص والهايلكس
هل هو موتر صامل
رايك فيه في النفود
هل فيه دف لوك
هل فيه معرض متخصص فيه يعني يستورده من امريكا لانه حسب علمي يستورد عن طريق الامارات بس حذروني من الكندي يقال قيره غير مخصص للسحب ولا فيه مبرد قير
النوع الافضل بينهن
تانكي البنزين صغير هل له حل

موديل 2013 نزل ولا للحين
كم سعره

[طواش]

نعم انا معي تندرا 2012 شاريه جديد 170 درهم الحجم الوسط باب ونص ممتاز ان مسكته خط اعجبك وان استعملته في النفود ممتاز الموتر صامل كانه صالون في البر شوي يطب يهازف لايوجد به دفلوك
موديل 2013 نزل ولا يوجد فرق

[كومبو]

السلام عليكم ورحمة الله وبركاته
مساء الخير على الجميع

ودي استشيركم عن التندرا باب واحد 2012 مكينة 5.7 اذا احد منكم جربه
عن راحته بالخط والبر هل هو يقارن براحة الجيوب الصوالين او مثل الشاص والهايلكس
التعليق الخلفي دفرنس وسست بس إنه أريح من الشاص والهايلوكس الدفرنسين
العادي وليس trd
هل هو موتر صامل
وشلون صامل
رايك فيه في النفود
ماشاء الله يمشي ممشى المرهمات في أم دكة
هل فيه دف لوك
لا حتى أقرانه مافيهم السيرا والسلفادور والتيتان لكن جميعهم فيهم تراكشن
هل فيه معرض متخصص فيه يعني يستورده من امريكا لانه حسب علمي يستورد عن طريق الامارات بس حذروني من الكندي يقال قيره غير مخصص للسحب ولا فيه مبرد قير
النوع الافضل بينهن
trd
تانكي البنزين صغير هل له حل
في واحد بدل تانكيه بـ 150 لتر صناعة وطنية وكلفه مع التركيب 4000 درهم
وفي شركة متخصصة بالتوانك أمريكية صنعت تانكي 178 لتر بس أغلى شوي وفيه مشكلة أنه معرض للضربات وليس مثل الوطني

موديل 2013 نزل ولا للحين
نعم نزل
كم سعره

ما أدري والله

[أبو فروة]

الاخ طواش
الله يعطيك من خيره ويكفيك شره
شكرا جزيلا ...

الاخ كمبو

التعليق الخلفي دفرنس وسست بس إنه أريح من الشاص والهايلوكس الدفرنسين
العادي وليس trd
حسب معلوماتي مافيه فرق بين الــ trd والعادي الا المساعدات هل فيه فرق في نظام التعليق بينهم

وشلون صامل
صامل بمعني انه ما يتفكك بسرعة

وجزاكم الله خير

[كومبو]

من ناحية صامل فهو صامل
TRD .. اضافة رياضية للتندرا على حسب طلبك او طلب البائع وهي اضافة مساعدات رياضية خاصة بالصحراء ..
وصاجات حماية على القير وتانكي البنزين وبعض الاكسسورات فقط وهي كاميرا رؤية خلفية وجنوط 18 المنيوم
وتبريد لزيت المكينة وتبريد خارجي للقير ..وقزازة تقسيمة للغمارة وللغمارة ونصف ..

والا المحركات نفسها مافيها تغيير ...

نقلًا عن راعي الجبيل (بوحمدان) ممكن تسأله هو بيعطيك العلم الأكيد

[باوزير]

في الامارات معرض المونديال مورد له من امريكا و يبيع قطع غياره اذا بغيت معلومات اكثر بتحصل فب منتدى تويوتا العربية

[أبو فروة]

الاخ كمبو / الاخ باوزير
جزاكم الله خير وماقصرتوا


افدتوني بهذه المعلومات

[0راعي الجبيل0]

ال TRD في التندرا مثل يوم نقول Z71 في الشفر هي اضافة من المصنع على حسب طلب البائع
وال TRD للغمارة معناته اضافة مبرد لزيت المكينة وصاجات حماية للقير والتانكي واضافة مساعدات بيلسن الرياضية والياي الامامي اقسى واكبر واضافة كاميرا وشاشتها في المراية مثل الاف جي والقزازة تقسيمة
واهم شي اللي بتاخذه يكون فيه زر TOW HAUL وهذا معناته ان القير فيه تبريد لزيت القير والكارونة 10.5 انش واهم شي في المحرك هو ان يكون 3UR-FE لان فيه محرك ثاني وهو 3UR-FBE وكلهم 5.7 لكن الثاني قطع غيار السكويا الخليجي ماتركب عليه من يخاخات وطرمبة بنزين وفلتر بنزين وكويلات ويصرف بنزين اكثر

موفق خير

تحياتي
ابوحمدان

[أبو فروة]

وال TRD للغمارة معناته اضافة مبرد لزيت المكينة وصاجات حماية للقير والتانكي واضافة مساعدات بيلسن الرياضية والياي الامامي اقسى واكبر واضافة كاميرا وشاشتها في المراية مثل الاف جي والقزازة تقسيمة

واهم شي اللي بتاخذه يكون فيه زر TOW HAUL وهذا معناته ان القير فيه تبريد لزيت القير والكارونة 10.5 انش واهم شي في المحرك هو ان يكون 3UR-FE لان فيه محرك ثاني وهو 3UR-FBE وكلهم 5.7 لكن الثاني قطع غيار السكويا الخليجي ماتركب عليه من يخاخات وطرمبة بنزين وفلتر بنزين وكويلات ويصرف بنزين اكثر

موفق خير

تحياتي
ابوحمدان

الله يجزاك الجنة يابوحمدان

حبيت اسألك عن نوع المحرك 3UR-FBE كيف اعرفه هل عن طريق البليته اللي بالكبوت و هل هو flex fuel ولا هذا بعد نوع غيرهم .

وتقبل مني احلى تحية

[0راعي الجبيل0]

^^^^^
هو الفلكس فيول flexfuel
وبعض الشريطية الله يهديهم يشيلون اللصقة هذي وحصلت بالسوق كذا واحد مشيوله منه
وتقدر تعرفه من كود المكينة لكن الافضل انك تدخل رقم الشاص في الموقع هذا وهو يعطيك معلومات عن اي سيارة تويوتا وتشوف الوضع الحقيقي للسيارة وفئتها
www.toyodiy.com

وبيجيك بعض الناس وبيقول مافيه فرق بينهم وانا اعطيك العلم لاني اشتغلت على النوعين من المكائن وصلحتهن وشفت الفروق بينها

تحياتي
ابوحمدان

[أبو فروة]

ابو حمدان الله يجزاك خير ويسهل لك امورك
افدتني بالمعلومات ... والله يزيدك
ماقصرت

[المتوكل]

ياشباب
هل معقول التاندرا TRDمافيه دفلك السكويا فيه وهوسياره عائليه
ابوحمدان الله يسلمك اكيد فيه والا مافيه