صــور للــربيع من مكشاتنا الأخير عقب عــيد الــفــطــر المبارك

[قرناس]

حياك الله اخوي شقران انت والشباب كلهم وياليت لو نحدد اسبوع من الاسابيع نكون كلنا هناك

ريان : ولا يهمك ازهلة

راع عنيزة : ( يالله يالله رز رصيص) 45 كيلو

الشباب اللي يسألون عن الإحداثية موجود فوق

[فرد حمزة]

كاتب الرسالة الأصلية العيد
مـــاشــــــــاء الله والله مناظر روووعة الله يسلم الاصيبعات اللي خبطت على الكيبورد لين جابتها .... وصراحة ما يحتاج اروح لها يكفي كل ما بغيت اكشت لمها بفتح هالصفحه واتفرج على هالصور ويكفي

ونصااايحك في محلها اتمنى انا نكون واعين وما تفوت علينا هالشغلات المهمه وانشاء الله اهل المكاشيت ما يحتاج من يوجههم لكن البلاء من ذولالالاك الله يبعدهم عنا مغير طبول ورقص بدل ما يشكرون نعمة الله .
ممكن دورة باليزر

الله يعافيك
الله يسلمك يا اخوي العيد
ويبارك فيك
وتستاهلون كل خير

[فرد حمزة]

كاتب الرسالة الأصلية السمح
إلا مسرور ومسرور ومبسوط ومسفهل ومستانس من هالصور الحلوة اللي فعلاً تخلي الواحد يضف عفشه ويمشي يتمشى في ديار الله الواسعة ...
أخوي فرد حمزة عز الله إنها فيضة جميلة وحلوة وزادها ماشاء الله جمالاً الامطار اللي جتكم وأنتم فيها ..
ربعي أيضاً جايين من هاك المناطق ( تحديداً الحجرة ) ومناطق أبوشظاظ والمسعرية ويعدون أشياء حلوة مرررة مثل هالصور اللي أتحفتنا بها ..
مشكور ياعيوني على هذا الجهد ولا أنس أن أضم صوتي إلى صوتك في تطبيق النصائح التي تكرمت وزودت المشاركة بها .... وبالمناسبة هذه النصائح تنطبق على كل مكان يجلس فيه الكاشت .. فإذا كان الإنسان يريد أن يجلس في مكان نظيف وجميل فليتركه هو كذلك أيضاً ..
ماقصرت وبارك الله فيك ...

هلا بك حياك الله أخوي السمح

الله يجعل أيامك دووووووم مسرور ومبسوط والله يبعد الهم عنكم
وحياك الله في هاكالديار وياليت تنسقون أنت والشباب اللي ناوين لها معنا ونطلع طلعه خاصة بأهل مكشات وترونا نسعد بذلك

الله جزاك خير على الثناء للنصائح وهذا من بعض ماتعلمناه هنا في مكشات

الله يبارك فيك

[فرد حمزة]

كاتب الرسالة الأصلية ((( الحر)))
اخوي فرد حمزه وش سويت فينا!!!

والله الي حستنا وعفستنا!!!

والله من صورك هذي وانا ماعاد اجمع !!!

اول صوره من العجله حطيتها خلفيه لسطح المكتب!!!

يوم شفت الثانيه وانا اغير بسرعه قلت هذي ازين من الاوله!!!

ويوم طلعن الباقيات ولا وش اطالع يوم طلعت الصوره الاخيره وانا اوقف وقلت ياولد اربط فرسك والله ماتعداها هذي الخلفيه!!! ( صارت سالفه)ههههههه.

يالربع وينا ووين هالروضه والربيع يالله تعجل بالاجازه!!!

لاكن الحقيقه ان صورك يالغالي ابلغ وصف لها!!!

وخص الصوره الاخيره!!!

اخوي فرد حمزه مشكور وبارك الله فيك عزالله انك( ضيقت صدري) ثم انشرح من زين الصور!!!


الف شكر يالغالي وتحياتي للجميع!!!

اخوكم((( الحر )))
13/10/1423هـ

((( الحر ))) يا جعلنا واياك أحرار من النار

أنت اللي وش سويتفيني وعفستني وشلووووون أرد على كلامك الطيب
لكن ما أقولك إلا الله يجزاك الجنه ياطيب
وبالنسبه للوصف والإحداثية ما قصر أخونا قرناس ونزله في ثاني صفحه من الموضوع ولا يمنع نحطه لك هنا بعد

وصف الزعبية وأحداثيتها :
طبعاً الزعبية لها طريقان :
الأول من طريق الحفر رفحاء وهو كالتالي :
اذا اتيت قرية روضةالهباس إحداثيتها ( شمال :29.08.853 جنوب 44.18.848 ) وهي على نفس الطريق تأتيك على اليمين وأنت قادم من حفر الباطن محطة اذا اتتك المحطة جنوبها طريق يؤدي الى الزعبية وأحداثيةالزعبية كالتالي :
( شمال 28.55.961 جنوب 44.08.766 )

الثاني من طرق لينة سامودة وهو كالتالي :
بعد ان تتعدى لينه متجه الى ساموده بعد 15 الى 20 كيلو تأتيك محطة نعجة قبلها بثلاث كيلو تقريباً مفرق عيوج لينه وهو عبارة عن مجرى شعيب كبير ( يعني مثل الخور ) تقريباً عرضه ثلاث او اربع كيلوا تقريباً على اليسار اي شمال لكن حاول ان تسلك ذلك لأنك اذا رحت يمين اوشمال سوف تقع في الصبرة ( حجرة ) تتورط فيها ، هذا الطريق يؤدي الى عيوج لينه احداثيتها كالتالي :
( شمال 28.49.000 جنوب 44.02.20 )
منها اتجه شمال تقع في فيضة الزعبية واحداثيتها ذكرناها سابقاً

ملاحظة / حاول أن تمشي على الوصف مع وضع احداثية الزعبية السابقة . وكذلك الموقع يشتمل على عدة فياض وليست فيضة واحده يعني كل المنطقة ذيك موسومة .

وتحياتي لك والله يعد عنك الضيقه ،،، والله أني كنت متردد أني أنزله حوفي على بعض اللي يشوفه يقول وحسااااافة مكشتنا اللي عقب العيد لكن توكلت وأستشرت الطيبين وقالوا نزله

[فرد حمزة]

كاتب الرسالة الأصلية هلكس
والله شي حلووووووو

وانا كنت موجود هناك ايام العيد
وازين ربيع شفته في ذيك المناطق
يعني مشاء الله كل الخيرر عندهم
وبدال ما الناس تسبحه وتهلل وقت المطر كان فيه ناس جنبنااااااا يعزفون العود والمراويس وما فيه الا اغاني
الله يهديهم بس
وانشاء الله ان السيووووول قادمه بأذن الله
وانا انصح اي واحد يبي يروح الى الربيع لا يتعدى لينه والي حولهااااا
ازين شي هي من بد المناطق الي حولهاااااااا
حتى الصماااان رحنا لهااا ولا فيه كلها شهباااااااا
الله يرزقناا بالمطر الطيب والربيع الزين


مع السلاااامه

الله يسلمك هلكس
مشاء الله موجود طيب ماسمعت نداي فرد حمزة ولا سمعت مجموعة ابو شنبات بالألغاز في الفضية
الله يهديهم والله ماقصروا جيران لها في الفيضة قامو يدورون على العزب والمكاشيت ويوزعون أشركه ومطويات
الخير بكل مكان
اللهم آمين الله يرزقنا بالمطر

يتبع بقية الردود قريباً

[Makrof]

السلام عليكم ورحمه الله وبركاته


اخوي فرد حمزة
سمعت عن فيضة الزعبية وام العصافير
وعن بلدة لينه
ابغى توصيف لهن اعتبرني بحرك من بريده

وسلامتكم

[قرناس]

أخي وحببي
Makrof

توصيف اللي ذكرت كالتالي :
لينه لها ثلاث طرق :
الأول: من جهة بقعاء ثم تربة ثم لينه وهو معروف
الثاني : من طريق ساموده وهو كالتالي قبل مفرق القاعدة بـ 60 كيلو تقريباً تأتيك محطة البطيحانية او البطيحان عن طريق الحفر الزلفي قبل المحطة فيه المفرق اللي يؤدي الى ساموده وهو طويل شوي خلك على هذا الطريق تأتيك بلدة لينه على اليسار وهذه احداثيتها
28.46.000N
43.44.000E
الثالث : من جهة رفحاء تقريباً 100 كيلو وهو كالتالي :
إذا كنت في رفحاء وأردت أن تخرج منها متوجه للحفر قبل نهاية السيدين تأتيك لوحة يمين مكتوب عليها لينه خلك معه على طول تطيح على لينه وهو مسفلت ورفحاء هذه احداثيتها
29.37.038N
43.29.016E

أم عصافير إذا هي اللي تقصد بين لينه ورفحاء فهي كالتالي :
لما تنطلق من لينه متوجه إلى رفحاء بعد 60 كيلو تقرباً تأتيك فيضة ام عصافير على اليسار
أما احداثيتها فهي كالتالي :
27.09.080 N
43.29.500 E
لكن على ما اعتقد إن ربيعها وسط


أما الزعبية فسبق توصيفها مع الإحداثية

أخوك : قرناس

[^eid^]

بسم الله الرحمن الرحيم
السلام عليكم ورحمةالله وبركاتة
مشــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــكورجزيل الشكروالتقدير
يا أخ فرد حمزه على هذا الصور وانشاء الله سوف اذهب الي هذا الفيضة قريبا لأرىهذه الفيضه في ام عيني.
اخوك ^عيد^.

[فرد حمزة]

كاتب الرسالة الأصلية صقر
السلام عليكم ورحمة الله وبركاته

مشكور اخوي فرد حمزة على الصور الجميلة والحقيقة انك سبقت الجميع بجلب الصور الجميلة من الفيضة
ومشكور ايضا على النصايح المخلصة واتمنى الجميع يتمشى بها لأن هذه الاماكن ثروة وطنية لنا يجب ان نحافظة عليها جميعا.

عليكم السلام والرحمة أخوي صقر
والله يبارك فيك
والله أنكم تستاهلون كل خير وعلم غانم

العفو ...

[فرد حمزة]

كاتب الرسالة الأصلية الخادم
ماشاء الله على هالمنطقة 0


تستاهل كل خير يافرد حمزة و انت راعي الاولة 0
أمل ان تعطعينا احداثياتها اليوم و غدا الاربعاء انشاء الله ابي اروح للروضة و حسب ماذكر و احد من الاخوان ان الصمان مابها شئ فعزل الله انة صدق انا مريتها اخر ايام اجازة العيد وما بها لا عشب ولا كشاتة و لا حلال الله يجيب الخير للمسلمين اجمعين امين 0

اخوك
الخادم

الله يعافيك أخوي الخادم
ما قصر فرناس رد بالإحداثية وصف الموقع

آمين الله يجيب الخير لديار المسلمين

[فرد حمزة]

كاتب الرسالة الأصلية نهار
الحمد لله رب العالمين على هالنعمه العظيمة اخي فرد حمزة ادخلت السرور على قلوبنا بهالقطات الجميله .

بيض الله وجهك وجزاك الف خير اعتبرها احلى هدية بهالعيد : الف الف شكر .

وبالنسبه للنصائح ماقصرة والله وصادق بما قلت هالنعمة يجب ان تحترم وتشكر .

وتقبل تحياتي وتقديري.

أخوي الكبير نهار ...

أيه والله يالله لك الحمد على النعمه والخير

وهالعيديه قليله بحقك حقك أكبر من كذا وأنا أخوك

العفو العفو عزيزي

وتقبل وافر أحترامي لك أخي الفاضل نهار

[فرد حمزة]

كاتب الرسالة الأصلية الصمان
اخوي فرده حمزة مشكور. ونحمد الله ان اكرمنا بحضورك معنا فمساهماتك لها نشاط دائم ومهما
قدمنا لك من شكرلاتكفي ودعوتنا لك بالتوفيق
اخوك الصمان

حياك الله أخوي الصمان

العفو ياعزيزي

ياخوي الفضل لله ثم لمنتديات مكشات

أمين والله يوفقنا وأياك والقاري

[فرد حمزة]

كاتب الرسالة الأصلية الشبارم
اخي العزيز فرد حمزه

السلام عليكم و رحمة الله و بركاتة و كل عام و انت بخير

اشكرك على هذه اللوحه الجميله و جعل اصيبعاتك الي ضغطت على زر الكميرا ما تشل,
قد ادخلت الفرحة في قلبي عندما شفت هذه الصور , عقب هالكلام الحلو سوئال من فضلك
ما هي احداثيات هذه الفيضة ؟

مادري فيه علوم عن الحباري في المنطقة

و لك جزيل الشكر

اخوك

الشبـــــــــــــــارم

وعليكم السلام ورحمة الله وبركاته
وكل عام وحنا واياكم والأمة الاسلامية بخير ونصر وتمكين
العفو عزيزي ،،،
وهذا قليلاً من حقكم علينا
آمين وأياك أخي الفاضل
والله يجعل أيامك دوم فرح وسرور
ما قصر الإحداثية نزلها قرناس مع الوصف
والله الصيد قليل بالكاد معدووم ...

وحياك الله أخوي الشبارم

[فرد حمزة]

كاتب الرسالة الأصلية راعي عنيزة
:: <=== هذا انا اول ما فتحت الموضوع امس وشفت الصور

وبدون مبالغه يمكن قعدت ربع ساعه بس اناظر واتمقل وانا في حالة من اللاوعي وعجزت ارد من هول المفاجأه

ومن الفجر اتصل علي واحد مهب مسجل بالمنتدى ويقول شفت الصور حقات ابو حمزه(منتب سهل صار لك شعبيه ومعجبين يا بو همام )

مشالله لا قوة الا بالله ربيع ولا في الخيال وانا رحت العام الماضي للبساتين وكنت اتخيل انها احسن ربيع لكن عند هذي الصور طلعت ولا شي

مع ملاحظه اننا للحين في اول الشتا اجل اجازه الاضحى وش بيكون الربيع بس لو الله يفكها من العابثين والمشبكين

ومشكور على النصايح الجميله يا جميل

يااااااااااااالقهر كتب الرد يوم رديت قال موضوعك فيه صور كثيره


حتى وأنت هاللحين في فيضة الزعبيه ما نسلم من حركاتك

اقووووووووووول سلالالالالالالالالالالامة عيونك من التبقق

الله يستر على الخير اللي في الفيضة وتصير محميه هي وشعيب الحسكي الله يستر بس

بتصير ربيع طيب بالحيل عقب عيد الأضحى لكن شكلها مالك نصيب من الزحمه اللي بتصير عليها

[فرد حمزة]

كاتب الرسالة الأصلية hiskol
شكراً أخوي فرد حمزة على هذه ألنصائح ألرائعة وعلى هذه ألصور ألأروع , وفعلاً هذه ألمنطقة من أفضل ألمناطق ألتي مريناها خلال أجازة ألعيد من حيث ألربيع وألأمطار .
وألله يديم على ألجميع ألصحة وألعافية .

هلا بك hiskol
العفو حبيبي

فعلاً كلامك في محله
حيث أستقرينا في آخر الرحلة في الفيضة ومالقينا أطيب منها بالربيع
اللهم آمين

وتسلم يا hiskol