بع الجيب وشتر كامري دام حدق التنهاة تضايق هالعوائل المساكين

[فرغالي]

بسم الله الرحمن الرحيم
السلام عليكم ورحمة الله وبركاتة

بعد كم طلعه مع الشباب الاسابيع الى راحت لمناطق كثيره ... قررت امس الخميس اخذ العائله لمكان فيه ربيع وسهل الوصول اليه ومعروف انه مافيه غير خريم والتنهاة اسهل للعوائل لمشاهدة الربيع

وتم اختيار التنهاة وتمت الرحله امس الخميس وعند الوصول في الصباح شفت امة محمد هناك بدية اباري الصبات ادور مكان بين هالعالم ولكن وش اشوف كل الى ماخذ المكاناة الزينه والقريبه للقار هم الشباب وللاسف العوائل المساكين جالسين برا الفيضه على النفود بسبب كثرة الشباب الى ماخذين مكان هالعوائل الضعيفه

حريم وعجز واطفال جاين من مسافات بعيده علشان يشوفون الربيع وبالاخير مايحصلون بسبب هالشباب


والشي الغريب هالشباب طاق لك هالجيوب والهلكسات و الحوضه وخرته جاي لهالمكان السهل

توانك وهنقلين وشد وكناود وقارمن واناتل ونص اخراض الرحلات شاريه واخرته التنهاة تضايق العوائل

ترا مايحتاج تشري جيب الكامري تدخل ابسهوله
ولا يحتاج كنود ابشرك فيه ابراج جوال
ولا يحتاج قارمن فيه لوحات لتنهات
ولايحتاج عزب ترا فيه مطعم بالعتش قريب له
وشوله الخساير دام الدعوه التنهاة

والله شي محزن العوائل بالنفود والشباب بالربيع

انا شايف بعيني شي غريب والله

[المونديال]

انا معك
بس الربيع اعتقد في امكن كثيرة حتى لو قل العشب

[الوباله]

بعض الدروب تصعب على الدلوخ الي انت تشوف
يضيقون على العوايل والحريم وكبار السن لانها تصعب عليهم بعيدات المطاريش
مير الله يزينها
وانا اخوك

[GMC 111]

ياخي الشباب لهم حق مثل مالك حق ف المحل ومن سبق لبق طال عمرك

ومثل ما انت تبي القريب بعد الشباب يبون محل زين وقريب



تحياتي لشخصك الكريم

[ياكريم رحمتك]

الله يصلح الاحوال ويهدي الجميع

[فرغالي]

ياخي الشباب لهم حق مثل مالك حق ف المحل ومن سبق لبق طال عمرك

ومثل ما انت تبي القريب بعد الشباب يبون محل زين وقريب



تحياتي لشخصك الكريم

الحق للجميع مانقول شي وانا اخوك بس مهب بهاطريقه رح ابعد التنهاة كبيره وربيعه واسع

والعوائل مساكين مايقدرون يسابقون الشباب بالمكاناة القريبه

اذا انا وانت ماخلينا لهم المكان السهل من بيخليلهم

[alhosam26]

السلام عليكم ورحمة الله وبركاته
الحل عندي وانا ابو هندي خل التنهاة للشباب وبنروح لروضة خريم اقرب لنا بس من يقول للمجاهدين الى يحرسونها يمنعون الشباب من الدخول واذا حصل غن ودندن

[رحّال 9]

تعوذو من ابليس يانشاما والامر من سعه ان شاء الله .

التنهاه علشانها معروفه عند الكشاته صارت زحمه .

وبالنسبه للعوائل فيه عندك صلبوخ وهاك الدروب طيبه للعوائل .

وبالنسبه لسالفه بع الجيب واشتر كامري فهالكلام مايصلح ونا خوك حتى لو حصلت غشيم مايمنع تعلمه .

وترى الطرقيه تجي من بعد الفجر واذا صار وضعك عوايل لاتبعد الله يسلمك .

ولكن عذرك غير مقنع صراحه وين تبيهم يروحون ؟!


والتنهاه معروفه يافرغالي انها زحمه حتى الصمان الحين تحسب انك تاخذ راحتك !!

لكن الوكاد ان التجربه خير برهان والعوض في المقبله .

تحياتي

[الحبييب]

السلام عليكم
عالتك لها الحق في الطلعه والربيع والمكان الزين
لكن توقيتك له دور كبيير
والشباب لهم الحق انهم يطلعون با المكان الزين
لو انك لقيتلك مكان زين داخل الربيع كان مارتاحو الاهل ونا اخوك
ارجو انك تكون منصف في تعليقاتك

[العنابي 616]

اللي يبغى يطلع أهله و ما يبغى زحمه يختار الوقت و المكان المناسب
كل واحد يحسب حساب نفسه أما انك تقول للشباب ما يروحون للتنهاة هذي مبالغة
هالأيام هذي الشباب ابتلشوا بانفسهم وين ما يروحون قالوا لهم عوايل

[ذابل الريق]

كلامك اخوي حلو وبعض الردود حلوه
وانا اقول للكل حق في مشاهدة الاماكن الزينه والربيعيه والقريبه لا عزاب ولا عوايل وكذلك من بكر واختار المكان المناسب هو احق فيه ولكن يجب على الشباب عدم مضايقة العوائل وترك المجال لهم اذا وجدوهم في المكان قبلهم وعدم النزول بقربهم وانا وجهة نظري مولازم تخيم في وسط المحميه وداخل الروضه في اماكن قريبه بالامكان الجلوس قيها واذا اردت تتمشى وتجلس خذ لك فرشه وادخل داخل الروضه وتقهوى واطلع وترى الروضه مره كبيره
وفي الاخير هذي وجة نظر

[ابو مطحس]

حتى البر تبونا مانروح له اتقي الله بنفسك يااخي البر للجميع مو انت الي تحكمه عشان تقول روحو بعيد ولا قريب هذا مو من شانك ان ماعجبك المكان رح لمكان ثاني اما انك تبي تحكم المكان ماتبي يكون فيه شباب وانه يكون للعوائل هذا ان شاء الله انه بعيد عنك .

داخل الديره ومناشبينا وخارج الديره بعد تناشبونا


حسبي الله ونعم الوكيل ,,,,,,,,,

[صميدع]

كلامك سليم وعين العقل بس المتعارف عليه عند الكشاته من سبق لبق

[تميراااااااوي]

صراحة انا اذا بغيت اروح انا والعائلة اروح للشوكي ومجاورها وتصدقون الاسبوع اللي راح انا شايف كامري مع شباب داخلين بها الشوكي من اوله وشايف عوائل معهم فورد ميركوري
نصيحتي للعوائل انهم يبعدون عن اماكن العزاب والشباب عشان ياخذون راحتهم ويستمتعون بالرحلة
وصدقني العوائل يهمهم في المقام الاول انهم يطلعون للبر سواء كان فيه ربيع او لا

[فرغالي]

بعض الاخوان يحسبن اقول لاتروح للبر لا رح ماحد يمنع احد عن الطلعات للبر بس الكلام مراعات لبشر مثل الاطفال وكبار السن والنساء فقط الى حيلتهم على الربيع السهل الوصول له كان الوضع على انا لا مهب انا الى اروح لتنهاة وخريم لكن امر الله علشان هالعائله ماينطحون الصمان والحجره ومشذوبه وغيره