هذي علوم النفود الكبير وذبحة ذيب نقذة ؟؟!!

[الطرس ممدوح]

يالله صبحهم بالخير حي الله الغالين أعضاء وزوار منتدانا الغالي . حبيت أضع بين أيديكم رحلتي المتواضعة للنفود الكبير وتذكرت أبيات للشاعر ابونعيم عن الشمال يقول فيها

نهوى الشمال ودايم فيها نرقب .... خص ليا صارة طعوسه نديـــــه
عقب المطر تكثر بها اللــــــب ..... أتصير خيرات أرضها لك جلـيه

((وسلامتكم))
وكانت الانطلاقة يوم السبت30/2/1434هـ من بريدة – الأجفر – تربة حائل – جبلة النفود – الحيانية – بعدها تم الدخول للنفود الكبير بالأتجاه لقليب السبيعي- هجرة الظوي – هجرة رطيان – هجرة نقذه - هجرة حفر النفود – هجرة الرديفة – جبة – العليم – عذفاء – الرمثيات – الحيانية – جبلة – تربة – الزبيرة – البعيثة – قبة – أبا الورود – الأسياح – بريدة وقطعنا مسافة تقريباً 1700كم .

((وكانوا أعضاء الرحلة))

((الأمير أبوسامي – أبوعلي – الشاعر أبونعيم – محدثكم الطرس ممدوح))

((وانتم عارفين الحرص على الرفقة الطيبه اللي ترفع الراس شرواكم وكما قال الشاعر ابونعيم))

أشفق وأطالع راعي الطيب بالعيـــــن ..... وآخذ وصاف الجود ولاأحد إحتكرها
ومرافق اللي لأظلم الليل يضويـــــــن ..... يضفي على دنيــاي قولــــة قمرهـــا
إحرص على الطيب ورافق هل اللين ..... اللي على الرفقه يقوم بعبرهــــــــــــا
رفقة هل المعروف دايم عناويــــــــن ..... وإعرف ترى العنوان بان بسطرهـــا
مقيولتن قبلي منول وهالحيـــــــــــــن ..... مالك ومال اللي قليل ثمرهـــــــــــــــا
رافق هل النخوات جلاية البيـــــــــن ..... محزمك بالشدات حزت خطرهـــــــــا
اللي على درب المناعير ماشيـــــــن ..... اللي تقود الجيش لأظلم سفرهــــــــــــا
وجنب دروب أهل الشجر والثعابيـن ..... أنصحك لاتمشي وجنب لأثرهـــــــــــا
مالك ومال اللي مسمين غاويــــــــن ..... هــذي نصــيحة يالـفتى وإعتــبرهــــــا

((ومحشومين عن البيتين الأخيرات))

وآسف على الإطالة واعذروني على القصور يالغالين ونبداء معكم الرحلة بسم الله مشينا من بريدة بالأتجاه للأجفر

وصلنا مفرق الأجفر

أبشركم الحمدلله وصلنا الأجفر واخذنا من الملحمة لحيمة حاشي بري صغير توه مذبوح

وبعدها توجهنا لتربة حائل مع مفرق قرية المياه بين الأجفر والخوير

الحمدلله وصلنا تربة

بعد تربة تم التوجه للحيانية

وجلسنا بين جبلة والحيانية لإنتظار بقية الربع وتم نصب الخيمة

تم تصليح القهوة والشاهي وجهزنا الفاكهة تفضلوا يالربع حتى يجهز الغداء وهذا ابوسامي يقهوينا الله يجزاه خير

وهذا مقطع فيديو

لطفاً ياحلوين عدم الرد حتى يكتمل الموضوع

[الطرس ممدوح]

تفضلوا يالربع على الميسور وأعذرونا على القصور الله محيكم










وفي الليل خلينا العشاء خفيف وصلحناه بالطاجن ومكوناته نقاقن دجاج وقرع وبطاطس وكوسة مع قرصان بدال الخبز ياسلام سلم




















وهذا فيديو للطاجن









لكن الجو بارد واضطرينا نسخن الماء بالغاز مباشرة من التانكي





أصبحنا واصبح الملك لله وهذي لحظة طلوع الشمس











تفضلوا الله يحيكم القهوة والحليب والكليجا جاهزات











بعد الفطور توجهنا للحيانية للتزود بالبانزين والماء لان دخولنا للنفود من عندها بتجاه مارد السبيعي تقريباً 55كم كلاها صحراء لكن قبل نمشي جازلي عرق الإرطى سبحان الله الخالق طالع من الأرض وراجع ثانية














لطفاً ياحلوين عدم الرد حتى يكتمل الموضوع

[الطرس ممدوح]

وهذا قصر الحيانية القديم



وبعد انتظار الربع حتى يكون دخولنا جميع وهذي هي الطرق اللي نتنقل فيها بين الهجر وموارد الماء







الربيع بس تشوفه بالمذاري

















ابشركم الحمدلله وصلنا مارد السبيعي وهذي الاحداثية









لطفاً ياحلوين عدم الرد حتى يكتمل الموضوع

[الطرس ممدوح]

وبعدها تم الأنطلاق لهجرة الظوي او الضوى ورطيان وتبعد تقريباً 40 كم

وتغدينا على عجاله لأن الوقت ضيقو أبشركم الحمدلله وصلنا لظوي وهذي الأحداثية

وبعدها توجهنا لرطيان التي تبعد عنها قرابة 500 م وهذه الأحداثية وتم الصعود لها وهي أكبر بقليل من الظوي وفيها مدرسة

وسمية رطيان على كلام واحد من اهلها كان على جال البير شجرة ارطات وهذي صورة للبيل لكن الأن حطو مكينة لرفع الماء للخزان

وهذي صورة للمقبرة الله يغفرلهم ويرحمهم ويجعل قبورهم روضة من رياض الجنة وكل مسلم

وبعدها اتفقنا أن نتجه لهجرة نقذة وتبعد عن رطيان حوالي 20كم لكن الوقت داهمنا وقلنا خلها بكرا وهذا مكان النوم

تفضلوا يالربع الله محيكم القهوة والشاهي جاهزات تبون دله بهيل او بدون هيل وشاهي بسكر او بدون سكر او زنجبيل كلش موجود الحمدلله على النعمة ويجعلنا من الشاكرين

تفضلوا يالربع على الميسور وأعذرونا على القصور

أصبحنا واصبح الملك لله تفضلوا يالربع القهوة والحليب مجهزات الله محيكم لكن الماء جامد وهذا ابوعلي وابوسامي يقولون شوفو الثلج

الله يعطيك العافية يالشاعر

بعد القهوة والفطور تم التوجه لهجرة نقذة

لطفاً ياحلوين عدم الرد حتى يكتمل الموضوع

[الطرس ممدوح]

وحنا متجهين لنقذة وقبل ناصلها تقريباً بـ 5كم عثرت على جرة قلت يالربع عندي جرة تشبه جرة الذيب



أبشركم وصلنا الحمدلله نقذة وتم التوجه لبيت ابوزاهي جزاه الله خير الجزاء على الضيافة ولزمو علينا بالغداء هو واولاده والله رجالاً شرواكم وسألناه عن جرة الذيب قال البارح ذبحه واحد من الجماعة عند غنمه وقلنا له وينه قال تلقونه على الغضاة بعده كيلو عنا وبعد الخروج منه تم التوجه للذيب لكن نسينا نعبي منها بانزين











بعد ذلك تم التوجه لحفر النفود ويبعد عن نقذه تقريباً 95كم وجازلي درب البل وانتم كرامة ورسمة الدمال وهذا يدل على وعورة الأرض صارت جوادهن مثل سكة كرا ماشاء الله



وحنى متجهين للحفر واجهنا مطلع صعب بالصعود ولا صعدن السيارات حتى تم تفريغ قليل من هواء الكفرات وهذا المكان الوعر



وبعد الصعود تم التوجه لحفر النفود لكن صار بانزين سيارتي يالله يوصلني حفر النفود وبعده عنا قرابة 50كم قلنا خلونا ننام قبل الغروب ازيلنا ونعين من الله خير ولصار بكرا يحلها ربك وشوفو جمال الغروب سبحان الله













تفضلوا يالربع الله محيكم على القهوة







لطفاً ياحلوين عدم الرد حتى يكتمل الموضوع

[الطرس ممدوح]

أصبحنا واصبح الملك لله قمنا الصبحية واثر كلش جامد زجاج وحديد السيارات والأرض والعفش والماء أشد من أمس ومانستفيد من الماء حتى خروج الشمس ولازم قبل الليل تدخل ليات الماء داخل السيارة علشان ميتجمدن



















تفضلوا يالربع القهوة جاهزة هذا ابونعيم يقهوينا الله يجزاه خير







حركنا بعدها لحفر النفود وابشركم وصلنا لرفيقنا ابومناور رجال شرواكم وهو ساكن لحاله على المارد الله يجزاه خير ضيفان الله يبارك بماله وعياله وسألناه عن ايهم اقرب العليم او جبة قال جبة تقريباً 85كم والعليم حول 100كم وهذي احداثية حفر النفود





قلت للعيال خلونا نروي من المارد لكن وجدنا المفاجأة ماصب الماء قلت لبوعلي شكلة فيه شيء من الداخل مسكر لكن صار الماء متجمد وبعد المحاولات خرج لنا قالب ثلج



وبعد ماغلقنا الماء تم التوجه لبيت ابومناور ومن ثم توجهنا لجبة لأن كانت الخطة التوجه لحفر النفود وبعدها العليم لكن البانزين اجبرنا نتجة لجبة وبعد حفر النفود تقريباً 35كم اقطعة سيارتي



وتم سحبها لكن الأرض وعره وبعد الأتفاق قال الشاعر انا ادخل لجبة واجيب بانزين قلت اجل انا اصلح الغداء على بال تجي ان شاء الله





لطفاً ياحلوين عدم الرد حتى يكتمل الموضوع

[الطرس ممدوح]

وهذي مداعبه معها سبحان الله الخالق





جلس الشاعر قرابة ساعتين ونصف لأن المسافه ليست بالسهولة وهذا ابوعلي يترقب ويراسل ابونعيم واخبرنا انه جاء المنقذ بعد الله



هذا المنقذ ابونعيم



جهزت الغداء على عجالة



وهذا ابوسامي الشقردي يعبي السيارة بانزين



بعدها توجهنا لجبة لكن مرينا هجرة الرديفة لأن الخط يمر فيها وتبداء منها رادمية قرابة 45كم حتى السريع سكاكا - حائل







شوفو وشلون يرعون حلالهم أهل النفود من وعورة الأرض



هذي الرديفة وهذي أحداثيتها وابشركم بياصلهم الكهرباء









وصلنا الحمدلله جبة وعبينا بانزين واخذنا بعض الأغراض وتم التوجه للعليم ويبعد عنها تقريباً 110كم وهذي أحداثيتها





وصلنا مفرق العليم لكن ياجماعة لأحد يدخل معه لأنه تحت الإنشاء المدخل اللي مزبوط هو بعد 20 كم تجيك المحطة ادخل من وسطها وتشوف الرادمية اللي توديك للعليم






لطفاً ياحلوين عدم الرد حتى يكتمل الموضوع

[الطرس ممدوح]

نمنا قبل العليم 5كم تقريباً وبعد القهوة والفطور تم التوجه للعليم وتشاهدون جبل العليم واضح من بعيد




وصلنا العليم وهذي أحداثيته





لكن الحفار وش وصله المكان هذا تراه ياجماعة قبل يطلع الخط السريع حق الجوف لكن اتوقع جايبينه عن طريق الجوف قطوعة







بعد العليم تم التوجه لعذفاء وتبعد عن العليم قرابة 115كم وابشركم الحمدلله وصلناها وهذي أحداثيتها






وتم التوقف وتغليق المواتر من المحطة



وهذا الطريق كان ردمية جيته قبل كم سنة لكن يوم جينا لمها المره هذي واثره مزفلته ومن عذفاء لسكاكا الجوف 150 كم



بعدها تم التوجه لقرية الجبيله على معتقد كذا اسمها قريبة من عذفاء وبعدها مسحية تقريباً 30كم وبعدين تشبك بخط الحيانية وقيصومة فيحان





وبعد المشوار جلسنا نتغداء تفضلوا الله محيكم وأعذرونا على القصور الطبخ عجله





وأسف على الإطالة
واشكركم على حسن المتابعة ومروركم الذي زاده عطراً

وحبيت اذكركم لآتنسون الدعاء لأخواننا المسلمين في الشام ومالي وفي كل مكان اقل القليل نقدمه لهم ركعتين في جوف الليل بالدعاء لهم

[XRAY MAN]

ماشاء الله عليكم وش زينها من تمشيه وكشته

لكن البرد يكرهك البر كله

[NissaN 1990]

ماشاء الله تبارك الله تقرير كامل ووافي

[راعي الاشعثه]

مشاء الله تبارك الله.. لجمال التقارير البرية نصيب منك اخوي الطرس... متالق ومبدع دائما يالطرس وتقرير جميل وامتعتنا بشرحك الوافي يالوافي.

[][ســهم][]

ماشاء الله تبارك الله
تقرير رائع بمعنى الكلمة عن النفود الكبير
سلمت يداك على الموضوع
رحلة موفقة ..

[فتتتك vt]

ماشاءالله رحله موفقه الله يجمعكم ع خير

[مشعل_1001]

رحلة موفقة
الله يجمعكم على الخير

[بحرالوفا]

كفو يالقروم الحقيقه ليتني معكم اول مره اشوف رحله من المنقطعات ذكرتني بمراويحنا اول قبل نقلة الطيروغرابيل الصقاره مع حبي للمقانيص واهلها فلاكن هذولي ابيات للمشاركه معكم

ياالطرس ممدوح التحيه لك اجلال

ياراعي الهمه تقبل سلامي

منهاجكم لوذكر(ن) بعض الحوال

تطري على بالي سنين(ن)قدامي

الله يمتعكم على كل ابوحال

واقبل سلامي يالخوي واحترامي