برمجة اكواد الباب - المفتاح - الرموت - حساس مستوى الهوى بالكفر( للأكسبلور)

[mad_4u]

2السلام عليكم
كوني احد ملاك اكسبلورر ومن الناس الي تحب تبحث عن السيارة قبل احطها بيد مهندس واقعد على راسة لين يخلص
المهم قدر الله وشريت اكسبلورر استخدام امريكي
عليه ازرار على الباب
المصيبة ان الكود مجهول
رحت لمبرمجين المفاتيح دلوني على الوكيل كاني ماعرف طريقة
رحت لاكثر من واحد مانفع
لي زميل بشركة فورد ببريطانيا موظف اتصلت عليه وقلت له سالفتي ماقصر قال عطني يوم واجيب لك العلوم
ثاني يوم جاب العلوم السنعة

المهم لجل تحصل على الكود يبيلك كشاف او فلاش الجوال
وتتسلف مراية صغيرة يفضل مراية بودرة المكياج تبع الحريم والبنات كون لها قاعدة وتنطوي
المهم مكانها ضيق وماتقدر تشوفة بالعين المجردة لذا تحتاج المراية لجل تعكس لك
الكود عبارة عن 5 ارقام مطبوعة على علبة الفيوز الثابته تحت المقود من جهة الرفرف داخل السيارة
اذا كان السيارة بها لوحة مفاتيح يصير تلقى ال 5 ارقام مطبوعة وتحتاج تركيز
الي من جدة وماعرف يطلعة يتواصل معاي واخدمة بعيوني
blackberry@0a0.in

بالنسبة للي يبون يبرمجون كود جديد الطريقة هي
1- تدخل ال5 ارقام في الباب اول مايفتح الباب مباشرة اضغط على 1/2
2- ادخل الرقم الجديد الي تبغاه يكون الرقم السري وهي 5 ارقام
تلقى بشكل الي الباب يتامن وينفتح وهذا يعني انه قبل الكود
انتضر 20 ثانية يطلع من نظام البرمجة
تقدر تبرمج 4 ارقام للباب مع العلم ان الرقم الاساسي ماراح يتغير ابد
--
استخدامات الكود
بعد ادخال الرقم السري
1/2 للبرمجة
3/4 لفتح باقي الابواب
5/6 لفتح الشنطة
7/8 مع 9/0 لتامين السيارة

------
برمجة الرموت
برمجة الرموت للفورد بسيطة وسوي امورك بنفسك
خد رموت جديد او مستخدم مو مهم اهم شيء يكون شغال
افتح السوتش تبع السيارة وقفلها بشكل متتالي لعدد 8 مرات
تلقى التامين تبع الباب يفتح ويقفل وهذا يعطيك اشارة انه دخل نظام برمجة الرموت
اضغط على زر تامين الابواب من الرموت وراح يتامن مباشرة
بذالك قبل البرمجة لو عندك اكثر من رموت تضغط على نفس الزر بعد الرموت الاول مباشرة
ملاحظة: لو عندك اكثر من رموت لازم كلها تتبرمج مع بعض في حال برمجة واحد لحالة يصير تلغي البرمجة عن الاخرى

--
برمجة مفتاح ثالث للسيارة
خد لك مفتاح فورد فيها نظام الامان تقريبا يكلفك 20 الى 30 ريال
لازم يكون عندك المفتاحين الاساسية
1- ادخل المفتاح الاساسي في السوتش وافتح السوتش بدون تشغيل السيارة لمدة 5 ثواني وقفل
2- ادخل المفتاح الثاني في السوتش وافتح السوتش بدون تشغيل السيارة لمدة 5 ثواني وقفل واسحب المفتاح
3- ادخل المفتاح الجديد في السوتش وافتح السوتش لمدة 60 ثانية راح يومض عندك علامة المفتاح بالطبلون وبعدها قفل واسحب المفتاح
ارجع حط المفتاح من جديد تلقاه تبرمج واتشغل ومبروك عليك
يشترط في البرمجية توفر المفتاحين
في حال ماعندك مفتاحين بجدة برمجة المفتاح 80 ريال بشارع الستين
بالتحديد مقابل الاندلس بلازا والسفارة الارترية واحد يماني يبرمجها ب80 ريال مع المفتاح

--
حساس مستوى الكفر
برمجته سهلة لاكن ممكن تتعبك خصوصا لو عندك مسجل غير مسجل الوكالة
1- افتح السوتش وقفلة لعدد 3 مرات متتالية
2- اضغط على دواسة الفرامل واتركة بشكل سريع
3- افتح السوتش وقفلة لعد 3 مرات وخلية بالمرة الثالثة بوضع الفتح
راح تسمع البوري يدق عندك دقة واحدة
وتظهر بالشاشة عندك اشارة لبرمجة الكفر الامامي يسار LF
تحتاج لمغناطيس قوي وصغير تحطة في مكان حساس الكفر بالعادة يكون مواجة البلف
في حال قبول البرمجة يدق عندك بوري لمرة واحدة وتنتقل للكفر الثاني مع عقارب الساعة
لما تكتمل ال 4 كفرات راح يدق البوري عندك مرتين متتالية وبذالك يكون الحساسات تعرفت على السيارة وتبرمجت وتختفي الرسالة من عندك
لاحظ ان عملية البرمجة هذي تحتاج تسويها لو غيرت الحساس او انفك الحساس من مكانة
البرمجة هذي في الوكالة مجانية
ممكن ماتقبل البرمجة في حال غيرت مسجل الوكالة او سويت عليها اي تعديل او اضافة كونه يستخدم نظام ترددي عبر المسجل للاتصال بالحساس

هذا اول موضوع لي اتمنى افيدكم بها وراح اعطيكم كل ماعندي عن المزيونه اكسبلورر لاني اعشقها

[؟ابوفيصل؟]

مشكور ماقصرت على المعلومات الهامه وابي منك الفايده انا عندي اكس بلور2007 غيرت كفرين اماميه نوع يباني موديل السنه بس طلع عندي صوت حنه في السياره من اول مااحرك السياره واكرر شكري لك

[m3ax]

برمجة الرموت
برمجة الرموت للفورد بسيطة وسوي امورك بنفسك
خد رموت جديد او مستخدم مو مهم اهم شيء يكون شغال
افتح السوتش تبع السيارة وقفلها بشكل متتالي لعدد 8 مرات
تلقى التامين تبع الباب يفتح ويقفل وهذا يعطيك اشارة انه دخل نظام برمجة الرموت
اضغط على زر تامين الابواب من الرموت وراح يتامن مباشرة
بذالك قبل البرمجة لو عندك اكثر من رموت تضغط على نفس الزر بعد الرموت الاول مباشرة
ملاحظة: لو عندك اكثر من رموت لازم كلها تتبرمج مع بعض في حال برمجة واحد لحالة يصير تلغي البرمجة عن الاخرى


الطريقة مو نافعه حاولت اكثر من 10 مرات ولا مشت معي الطريقة علما ان الجهاز كان شغال وفجاه معاد صار يفتح ولا كأنه قد تبرمج على السيارة من قبل

وغيرت بطارية للجهاز قلت يمكن فضت البطارية ولا فيه فايدة

[mad_4u]

مشكور ماقصرت على المعلومات الهامه وابي منك الفايده انا عندي اكس بلور2007 غيرت كفرين اماميه نوع يباني موديل السنه بس طلع عندي صوت حنه في السياره من اول مااحرك السياره واكرر شكري لك

ابو فيصل
مر على اقرب بنشري يكون عندة عدة امريكي
اطلب منه يفك الكفر وينتبه ان فيها حساس
في سير حديد حول الكفر من الداخل + الحساس والقاعدة تاكد من انها سليمة
في حال كانت سليمة حول الكفرين من قدام الى ورا وجرب ان شاء الله تروح الحنة
اذا مستمرة مر على ميكانيكي يشيك على الرمان تبع الكفر الامامي بعض الاحيان تجيب حنه وكل مازدت السرعة كل ما زادت الحنة
الرمان مايجي لحالة يجي مع الفلنجة وسعرة 850 ريال بالوكالة الواحد

[mad_4u]

برمجة الرموت
برمجة الرموت للفورد بسيطة وسوي امورك بنفسك
خد رموت جديد او مستخدم مو مهم اهم شيء يكون شغال
افتح السوتش تبع السيارة وقفلها بشكل متتالي لعدد 8 مرات
تلقى التامين تبع الباب يفتح ويقفل وهذا يعطيك اشارة انه دخل نظام برمجة الرموت
اضغط على زر تامين الابواب من الرموت وراح يتامن مباشرة
بذالك قبل البرمجة لو عندك اكثر من رموت تضغط على نفس الزر بعد الرموت الاول مباشرة
ملاحظة: لو عندك اكثر من رموت لازم كلها تتبرمج مع بعض في حال برمجة واحد لحالة يصير تلغي البرمجة عن الاخرى


الطريقة مو نافعه حاولت اكثر من 10 مرات ولا مشت معي الطريقة علما ان الجهاز كان شغال وفجاه معاد صار يفتح ولا كأنه قد تبرمج على السيارة من قبل

وغيرت بطارية للجهاز قلت يمكن فضت البطارية ولا فيه فايدة

تاكد من الفيوز عندك يمكن الفيوز الخاصة بالرموت في السيارة تالفة غيرها
او مر على اي كهربائي يفحص لك كل الفيوز ويبدل اي وحدة تالفة منها
وجرب
البرمجة مثل ماوضحتها سهلة وتتبرمج بشكل سريع ان كنت بجدة اقدر اخدمك
راسلني

[؟ابوفيصل؟]

راح اجربها اليوم وتاكد لوراحت الحنه بكون عضوفعال عندك في المنتدى جزاك الله الف خيرلانك تفاعلت معي

[ذئب الصحراء]

بارك الله فيك
الى متى ونحن تحت يد العمالة ويسلبوا منا 10 و20 وحنا أولى
اذا ما تعاونوا وحطينا معلومات السيارات وطرق حل مشاكلها مثل هالبرمجة سهلة وما تكلف وتعتمد على نفسك
اشكر MAD 4Y على طرحه الجميل تحت مظلة هذا المنتدى الرااااائع

[ابوشعيل97]

مشكور ماقصرت على المعلومات الهامه

[Forrd]

سويت البرمجة
وبالفعل الابواب سكرت وفتحت وهذا دليل على ان البرمجة تمت
لكن الريموت ما يفتح ولا يسكر
على فكرة عندي جهاز صيني من محلات الزينه اضفته لاني ماعرفت للبرمجة
مادري هل يمكن بسبب الجهاز الصيني ؟

[أبو هشام راشد]

مشكور على إفادتك وأبجرب التأمين هل هو مثل النوع التجاري عند فتح الأبواب يضرب المنبه

[ahmed..essam]

جزاك الله خيرا على المعلومات القيمة وننتظر منك اكثر

[سعد777]

يعطيك العافيه اخوي على هذه المعلومات القيمه
تقيم أعلى

[EXPLORER 2004]

السلام عليكم ....افيدونا يا اهل الخبره والاكسبلورر

في عندي مشكله بالموتر اكسبلورر 2004 اضطريت افصل البطاريه عدة مرات مره بسبب تصليح المسجل ومره صديق لالي نصحني ويا ريت ما نصحني . افصل البطاريه بسبب انها اللمبه حقت الطبلون وقال رح تعيد البرمجه وتختفي اللمبه المهم اعملتها مرتين وفصلت البطاريه هيك صار مجموع فصل البطاريه 3 مرات المره الثالثه جيت اشغل الموتر اشتغل بس جتني اشارة العده اللي في الطبلون ..حطيت القير على ال D ما مشي الموترطفيت تاموتر وشغلته عدة مرات المهم بعد 10 دقائق الامور تمام وما فهمت شو المشكله وبعدها بشهر تكررت نفس المشكله بعد فصل البطاريه بس اتاخر الموتر لين مشى تقريبا 4 ساعات والمرتين كانت اللمبه حقت اشارة العده في الطبلون ضاويه....

كنت سألت مهندس في حالة اني غيرت البطاريه شو الحل ,قال رح تتكرر المشكله وممكن تحتاج برمجه وفحص كمبيوتر

افيدونا يا اهل الخبره والاكسبلورر

[EXPLORER 2004]

الرجاء من اصحاب الخبره الساعده .....

[mad_4u]

سويت البرمجة
وبالفعل الابواب سكرت وفتحت وهذا دليل على ان البرمجة تمت
لكن الريموت ما يفتح ولا يسكر
على فكرة عندي جهاز صيني من محلات الزينه اضفته لاني ماعرفت للبرمجة
مادري هل يمكن بسبب الجهاز الصيني ؟

مرحبا عزيزي
تاكد من الرموت الي عندك
اذا الابواب سكرت وفتحت يعني دخلت للبرمجة لاكن تحتاج تضغط على الريموت حتى يتعرف
في حال ماتعرف ماراح يفتح او يقفل
افصل الجهاز الصيني وتاكد انه لما ركبة لك مافصل اي شيء يخص امان السيارة

مشكور على إفادتك وأبجرب التأمين هل هو مثل النوع التجاري عند فتح الأبواب يضرب المنبه

لا عزيزي التامين تبع الوكالة يختلف عن التجاري بشكل كاني كونه شد بلد

جزاك الله خيرا على المعلومات القيمة وننتظر منك اكثر

شكراً لك جزاك الله خير

يعطيك العافيه اخوي على هذه المعلومات القيمه
تقيم أعلى

شكراً لك اخوي سعد يعافيك ربي ويسلمك

السلام عليكم ....افيدونا يا اهل الخبره والاكسبلورر

في عندي مشكله بالموتر اكسبلورر 2004 اضطريت افصل البطاريه عدة مرات مره بسبب تصليح المسجل ومره صديق لالي نصحني ويا ريت ما نصحني . افصل البطاريه بسبب انها اللمبه حقت الطبلون وقال رح تعيد البرمجه وتختفي اللمبه المهم اعملتها مرتين وفصلت البطاريه هيك صار مجموع فصل البطاريه 3 مرات المره الثالثه جيت اشغل الموتر اشتغل بس جتني اشارة العده اللي في الطبلون ..حطيت القير على ال D ما مشي الموترطفيت تاموتر وشغلته عدة مرات المهم بعد 10 دقائق الامور تمام وما فهمت شو المشكله وبعدها بشهر تكررت نفس المشكله بعد فصل البطاريه بس اتاخر الموتر لين مشى تقريبا 4 ساعات والمرتين كانت اللمبه حقت اشارة العده في الطبلون ضاويه....

كنت سألت مهندس في حالة اني غيرت البطاريه شو الحل ,قال رح تتكرر المشكله وممكن تحتاج برمجه وفحص كمبيوتر

افيدونا يا اهل الخبره والاكسبلورر

مشكلتك برمجية تحتاج تراجع فحص للكمبيوتر يفحصون لك السيارة بس قبلها تاكد من كل الفيوز بالسيارة وغيرها بجديدة يمكن تحل مشكلتك