أبشروا بالخير يالقصمنجية؟

[الهارف]

بسم الله الرحمن الرحيم

السلام عليكم

صح أكثركم ما يدري وش أنا أقصد؟؟

لكن اللي انا اقصد فيه خير وبركة على القصمنجية


الان الساعة 11:35 مساء الموافق الأثنين 17/11/1423هـ





















أقبلت علينا سحابة كبيرة تبرق وترعد وان شاء الله تبي تغطي على كل القصيم


وان كان أحد منكم يعرف القشيعين الواقع جنوب محافظة الرس

راشه عليه والساهبة والسحقان ونفود رامة ويقولون محيوة جايه رش شوي

والجاي أكثر إن شاء الله

والداث ودخنة والأحمدية هذي جايه مطر ما شاء الله


واذا طلع الربيع فيها انشاء الله

ما أبخل عليكم بالصور والاحداثيات واللي ما يبي احداثيات نعطيه توصيف



وسلامتكم.......



تحياتي

[نفل]

تسلم والله اخوى الهارف على الاخبار الطيبة والله يبشرك بالجنة انشاءالله

[الخادم]

اخوي الله يبشرك بالنعيم
اثلجت صدري 0

الله يجيب الخير عليكم بصلاة الاستسقاء انشاء الله يوم الخميس ليعم بة المملكة انشاء الله ان يرحمنا برحمتة0

اخوك
الخادمight: ight: ight: ight:

[الهارف]

آمين الله يسمع منكم اخواني


وان شاء الله يجيكم ما جانا

[شباط]

الاخوان في المنتدي
ماذكر في خبر الاخ الهارف مبالغ فيه وغير صحيح
نعم كانت هناك بروق ورعود ولكن المطر كان حفيف لدرجة انه لايذكر على الاماكن التي ذكرت
فانا من سكان تلك الاماكن
لذا نرجوا من اعضاء المنتدي تحري الدقة والمصدقية في الخبر لان هذا المنتدي له مصدقيته عند رواده
كذلك ارجوا من المشرف العزيز بخذف خبر الاخ الهارف باسرع وقت .

[نقا هشال]

الله يبشرك باالخير ياالهارف

والله يعم بنفعها جميع ارجاء البلاد

[راعي الحزم]

1- السلام عليكم ورحمة الله وبركاته
2- مبطين عن الوجيه السمحة وشلونكم عساكم طيبين
شدني موضوع الاخ العزيز بخصوص الامطار وتباشير الخير وحبيت اعقب على ما كتب اولا اشكر الاخ العزيز الهارف على ايراد الموضوع ولو ان فيه مبالغة بقوله سحابة كبيره ومن ها الكلام المنتشر بين الناس صحيح استبشرنا خير وشفنا البرق ولكن جاء مطر خفيف ما نقعت الارض منه والسحب كانت متفرقة وصغيرة مثل اخيال اخر الصيف عموما ترى الاخ الهارف ما ذكر اسيول يا شباط هو قال رش فقط واقراء الموضوع صحيح هذا الي يذكر والا السيل يذكر روحه تعلمك به الوديان والشعبان اذا فيضت على بعض ( الله كريم ) وعلى ذكر المبالغة الحقيقة
انني لاحضت المبالغات منتشرة في هذا المنتدى من فترة في موضوع الامطار والربيع والله يا جماعة
رحت هذه السنة لكل مكان ما شفت الربيع الي تذكرة بالمجلس لابالشمال ولا بغيره وعموما الوقت مبكر للحكم على العشب تونا بشباط لكن قريت للاخوان سيول غزيرة ونروح ولا فيه أثر السيل يا جماعة ماهوبخفي سقا الله ايام مضت وادي الرمه يجي قبل اخياله تكفون شبعنا مبالغات الزعبية صارت جنة ولقيناها مغبره والوسخ في كل مكان ما قولكم بواحد شد الرحال لها واخيرا يبحث له عن مكان اخر بجانب الزعبية احسن منها لكن الناس اذا ذكر لهم محل ما تعدوه ولقد ضحكت كثيرا عندما قرأت الردود على موضوع الاخ العزيز
الذي كتب عن ربيع الزاقلة وصور مشكورا بعض الصور الجميع يطلب الاحداثية مع العلم انهم كلهم او بعضهم قد مر بها وهم ذاهبون الى الزعبيه هي الفيضة الي قبل الزعبية ياجماعة ماتجي 3 كيلو شرق خط الزعبية
يمر بوسطه عموما ياجماعة اسف على الاطاله هذا غيظ من فيظ ومشكورين على سعة الصدر

[الهارف]

السلام عليكم

الحقيقة انا مو من سكان المناطق هذيك

وانا جاني خبر ان فيه كذا وكذا على القصيم

وانتم ماشاء الله على طول فزيتوا بي لا ما فيه كذا انت تبالغ وما ادري ايش

طيب على هونكم قولو لي انه ما صار كذا وخلاص مو تقولون

انت تبالغ والمنتدى له مصداقيته وما ادري ايش

الحين أنت حطيتني اني أكذب وانا ما أكذب انا قالي واحد من الشباب

وجيت أبشركم نفس اللي قالي

عاد أنتم أبخص مني أنتم من أهل الديار هذيك

وخويي هذا أنا اوريكم فيه

واتمنى انكم ما زعلتو مني



نحياتي