السلام عليكم ورحمة الله وبركاته ،،
ليتك بدأت بالسلام وليت العنوان أوضح من كذا ..
مثلاً (طريقة تنظيف الثروتل لليوكن 2009)
إضافة إلى التأكد من حاجتك لها يمكن مشكلتك في البواجي أو فلتر الهوا أوحساس الهواء MAF (اختصار Mass Air Flow )
أو غيرها حسب حالة موترك.
عموماً الثروتل في الجمس والشفر الحديث (وأنا أتكلم عن السييرا والسلفرادو وبطبيعة الحال اليوكن والتاهو) الكتروني يعني مافيه سلك بينه وبين الدعسة ويتم التحكم فيه بالكمبيوتر وهذا يعني انه يحافظ على معدل ثابت للضغط بحيث كل ما زاد الوصخ وقل تدفق الهواء يزيد فتحة الثروتل..
هذا بإختصار عمل الثروتل الالكتروني حسب ما أعرف..
المشكلة إذا جيت تنظفه لازم ما تلمس القرص الدائري الي يفتح ويسكر نهائياً ولا حتى لمس خفيف لأنه بمجرد يتحرك بينحاس ولازم برمجه بالغالب مع العلم قد يرجع مع الوقت ولكن مهوب أكيد بعضهم مشى 70 كيلو قيادة عادية وضبط وبعضهم 150 وبعضهم 200 كيلو ..
بالنسبة لي نظفته في موتري (2012 جمس سييرا) أكثر من خمس أو ست مرات وبرمجته مرتين لأني مصمم اني أفهم كيف يتم تنظيفه وكيف أستغني عن البرمجة بعد التنظيف ..
طبعاً شفت مقاطع يوتيوب كثير لكن أغلبها للثروتل القديم الميكانيكي اما الالكتروني قليل جداً وكلهم يجمعون على عدم لمس القرص الدائري نهائياً !!!
بالنسبة للطرق فيه ثلاث طرق جربتهم بعضهم أكثر من مره بالترتيب:
الطريقة الاولى:
سويتها أكثر من مرة بس نسبة النجاح 50% تقريباً
1-تفك اصبع البطارية السالب (أهم خطوة وأكرر أهم وأول خطوة !!)
2- تفك خرطوم الهواء من الفلتر ومن الثروتل.
3-تفك سلك الكهرب من الثروتل وترا فيه زي الأمان يعني بحركتين تفكه لازم تسحب القطعة الداخلية ثم تضغط على الراس ويطلع معك
4- تفك الثرول وله أربع مسامير قياس 10 ملي الظاهر.
5- تحمل الثروتل برفق ولا تحرك فيه شي وتضعه على لوح أو شي يسرب وتنظفه ببخاخ أي سي ديلكو ACDelco من الجهتين كل ما نزل الوصخ تقلبه وتنظف وهكذا لين ينظف قدر المستطاع وأهم شي لا تتحمس وتمسح أو تحاول بخرقه أو فرشة أسنان هذا كان في الثروتل الميكانيكي اما الالكتروني حساس جداً بهذلني واضطريت أبرمجه مرتين والمرة الأخيرة تحملته وضبط بعد اسبوع وزود.
6 ترجع تركب كلش بالتريب بحيث تكون البطارية آخر شي.
7- تركب وتسمي بالله ثم تفتح السويتش لآخر شي قبل التشغيل وأنت رجلك فوق الدعسة وتضغط الدعسة للأخير وترجع ترفع رجلك خلال خمس ثواني (يعني بهداوه) مرة وحده فقط وتخلي الموتر على هالوضع خمس دقائق لا تشغله ولا تطفيه خله يبرمج كمبيوتر لعل وعسى ما يسوي لك مشكلة.
8- تشغل ولا تدعس شي نهائي وتخليه شغال من خمس إلى 10 دقائق كل ما طولت أفضل.
بعد كذا تجرب تشوف القيادة وحاول تكون طبيعي بدعساتك لأنه مفروض انه في طور التعليم هالحين وبيجلس الثروتل مرتفع شوي بس محتمل وهذا زين الموت إذا جلس يشحط إلى 3 ولا عاد تقدر تعشق وهذي صارت معي.
واذا سوا كذا وصار من يوم يشتغل يوصل الضغط 3 معناته عملية التنظيف فشلت ولازم برمجه..
عشان تسوقه لازم تشغل وتعشق فوراً قبل يرتفع الضغط عشان يقبل ثم الله يعينك تروح لمركز أي سي ديلكو التابع للجميح هناك البرمجة بـ 150 ريال برمجة ثروتل فقط !!
انتبه ترا البرمجة ثروتل فقط ماعليك من كذب بعض الورش يصفق منك 500 ريال ويقول لازم برمجة وهو كذاب برمجة الثروتل لوحدها موجودة وكانت عند العيسى زمان والحين راحت منه وكالة الجمس وموجودة في مراكز ACDelco
اسم برمجة الثروتل الي تحتاج بالضبط عشان محد يتفلسف عليك
Idle Relearning
بالعربي (إعادة ضبط وضع الاستعداد) تقريباً كذا.
تبي تعرف وش معناتها بالضبط؟
سلمك الله ومن يقرأ الثروتل من المصنع مضبوط على ضغط 600 بالضبط وهذا يستلزم من القرص الي داخل الثروتل انه يكون مفتوح بنسبة 16% بالضبط وهذا يومه نظيف..
وش يصير إذا الثروتل توصخ؟
الكمبيوتر يزيد الفتحة عشان يحافظ على أداء ثابت وضغط 600 وعشان كذا يبدأ يزيد الفتحة 17% - 18% -19% وهكذا وأكثر ما شفت 22%
طيب لما تسوي له تنظيف بتختلف الوزنية صح؟
هذا الي يخلف الكمبيوتر عندك ما عاد يدري كم يخلي الفتحة بالضبط وليش يصير كذا ما أدري لكن هذا الحاصل !
بس الي لاحظته من موتري انه إذا حرصت أسوي عملية تنظيف دورية قبل توصل النسبة لفوق العشرين انه يستجيب أفضل بس اذا زادت النسبة يكون التنظيف مخاطرته أعلى.
مراقبة النسبة تتم عن طريق قطعة البلوتوث الخاصة بفحص الأخطاء وعن طريق برنامج بالجوال وفيه مواضيع عدة تحدثت عنه هنا بمكشات وغير مكشات.
برمجة الثروتل الي ذكرت مهمتها انها تقول للثروتل ارجع طبيعي وخلك على نسبة 16% وضغط 600 ..
.
.
الطريقة الثانية:
يفضل يكون وجه الموتر نازل في هالطريقة..
1- تفك اصبع البطارية السالب!!! أهم خطوة
2- تفك خرطوم الهواء فقط.
الآن الثروتل يظهر أمامك
3- تنظيف الثروتل من الخارج فقط باستخدام البخاخ المذكور وتكرر العملية كل شوي لين يروح الوصخ كله الي تشوف من دون مسح أو لمس فقط تبخ البخاخ وهو راح يذوب الأوساخ بعدين تبخ ثانيه وثالثه وهكذا لين تفضي العلبة عليه.
4- ترجع تركب كل شي والبطارية آخر شي.
5- نفس الخطوات 7 و 8 من الطريقة الأولى ترجع تطبقها هنا.
.
.
الطريقة الثالثة:
هذي سويتها آخر مره ونجحت ولله الحمد ولو ان الثروتل ما رجع طبيعي ولكن دخل مرحلة التعليم وغثني اسبوع وزيادة الضغط ما يرتفع كثير لكنه شاحط شوي واذا دعست بنزين يجلس فتره ما ينزل علطول بس الحمد لله ضبط بعدها.
1- توقف الموتر بحيث يكون وجه ناااازل أفضل لك عشان بخاخ التنظيف والأوساخ تطلع برا ما تروح داخل.
بالنسبة لي دقيت ريوس على عقم
2- تفك خرطوم الهواء (لاحظ ما جبنا طاري البطارية!!)
3- الآن الثروتل ظاهر أمامك .. نفتح السلف من دون تشغيل !
4- بمساعدة شخص أو باستخدام شنطة العدة أو أي شي ثقيل نضغط على الدعسة عشان ينفتح القرص الدائري حق الثروتل !!
5- نبخ وننظف براحتنا أهم شي ما نلمس شي !
6- نترك الدعسة ونركب خرطوم الهواء.
7- نفس الخطوات 7 و 8 نطبقها هنا أيضاً وبإذن الله تنجح الطريقة.
الطريقة الأولى والثالثة شفتهم باليوتيوب لميكانيكيين أصحاب ورش وطبقتهم.
علبة التنظيف بخاخ أي سي ديلكو ACDelco بـ 15 ريال ما يجي بأكثر.
في حال نجحت بالتنظيف مبروك عليك والتكلفة 15 ريال!
في حال احتجت لبرمجة رح لصيانة ACDelco بـ 150 ريال بإذن الله وبيكون المجموع 165 + ثقافة ومهارة مكتسبة بالفك والتركيب.
ماعندك استعداد توسخ يدينك وتتعلم على موترك وتنمي مواهبك؟!
شف لك ورشه بحول هالسعر وخلهم هم يتعلمون على سيارتك!
هذا ما لدي فإن أصبت فمن الله وحده، وإن أخطأت فمن نفسي والشيطان.
والسلام عليكم ورحمة الله.