استفسار عن اسعار القوارب ( الشرقية )

[باسم الشمراني]

السلام عليكم

انا رجال ابغى استرزق الله و اشتري لي طراد

و اصير اجاره يعني اطلع فيه رحلات بحريه حداق

ابي من اصحاب الخبره شورهم في الشغله

و ابي اعرف اسعار الطرادات الجيده في هذي الشغله

و هل تنصحوني ولا لا

[باسم الشمراني]

للحين ولا رد ؟؟

[الفرضة]

هلا فيك ومرحبا بوجودك معانا في المنتدى
إذا أنت راعي بحر ومتمرس فتوكل على الله الشغله حلوه وفيها رزق بشرط التمرس وأخذ خبرة
ونصيحة لا تبالغ وتاخذ الغالي وبالتالي صعب ترجع راس مالك وبتاكل منك الصيانة

جرب البحر وأطلع وهجول صدقني في ناس كثير تراجعت بعد عدة محاولات

وحط في بالك قليل دائم أبرك وأريح من كثير منقطع وأنا أقصد من ناحية التأجير وحجم الطراد
بعض الناس يقولك خذ طراد كبير ومكاين كبار علشان تشيل عدد وتأجر بأكثر
وبعدها صيانة وتكاليف أكثر
بإمكانك تأجر قريب وبأسعار مناسبة وبطراد وسط أو يميل للحجم الصغير وتاخذ رزقك وتروح تنام وأنت مرتاح
الزباين كثير وأنا شخصيا أكتشفت أن أغلب الناس مايهمهم كبر الطراد والتجهيزات بقدر ما يهمهم السعر ومرونة صاحب الطراد
وحط في بالك أحيانا يجيك مواسم هوا ورياح تجلس أحيانا شهر وزيادة ما تقدر تأجر أو تطلع بحر
فلا تاخذها شغله أساسية وتاخذ قرض مثلا وتورط نفسك
أنصحك في البداية تاخذ طراد 22 قدم ويكون مكينة وحده 75 أو 85 ياماها تلقى أحيانا مستعمل بحدود العشرين أو زيادة علشان اذا ما ناسبك الوضع ما تخسر كثير
افحصه واستشر اهل الخبرة وتوكل على الله واطلع في البداية وخذ خبرة واعرف اماكن الصيد وطرقه وتعلم كيف تتعامل مع بعض الشغلات الميكانيكية للمكاين اقل شي 4 شهور ويمكن أكثر
بعدها إذا حسيت إنك تمكنت من نفس ومن الطراد وأخذت خبرة وعرفت تتعامل مع مواقع الارصاد توكل على الله وابدأ أجر في البداية تاخذ اثنين فقط بسعر رمزي من باب التجربة وشوف كيف تعامل الناس وطلباتهم وش يدريك يمكن من أول مرة تأجر يجيك واحد يرفع ضغطك وترميه في البحر هههههه وتكره الشغله
والله كم واحد أعرفه اشترى طراد وخسر ومن أول وثاني مره يأجر ما عرف يتعامل مع الناس وتقفل معاه بسرعه وبطل يأجر وخسر كثير بطراده

في بعض أصحاب الطرادات وبالذات الجبيل لما أخذ خبرة وعرف الصيد وبالذات الكنعد ماصار يأجر وصار يصيد ويبيع سمك أبرك له من وجع الراس

أفكاري ملخبطه لكن حبيت أرد عليك وأفيدك والله يوفقك ويختار لك الطيب

[حسين الاحمد]

السلام عليكم ورحمة الله وبركاته

اخي الكريم اسمع كلام الفرضة وحطه حلقه بودانك صراحه كلامه حكم واما با الاسعار بتلقالك مثل ما قالك با العشرين او اقل وجرب وان ما مشى وياك الوضع بيع وانشاء الله منت خسران اما با النسبه لبداية التاجير تعديل على كلام الاخ الكريم بس بنقطه لا تغلط غلطتي وتحط الوقت مفتوح المقصود بمفتوح عند المأجر يعني كرافك في البحر بيطلع اعيونك وهذا الامر حصلي وتندمت في بداية تأجيري للقارب اي نعم في دخل ولكن والله لو حسبت الدخل من ورا الطراد بتشوف الطول با لعرض يعني جهد بدن وتعب وتصليح وفي النهاية لا حفت برجولها ولا خذت راغب علامه ههههههههههههههههه وانا ما اقولك الموضوع هذا على شان اخرب لكن من واقع خبره في التاجير في زباين وربي ول ما يدفع تبي تطلعه مرره ثانيه وفي زباين اعوذو با الله ما ودك انه يتواصل معاك ولا ودك عرفته وطلعت معه . وخلني اذكرلك شغله في زبون ههههههههههههه قالي خل نطلع قلتله الجو مو زين وانشالله ما يقره موضوعي لانه بيعرف نفسه المهم قلتله والله ما تصلح الطلعه ولا فيها شي هويات وارتفاع با الموج قالي ابي اطلع اهو ويا الزلمات الي معه المهم على مسئوليته طلعت ويمن وصلت الموقع بعد جهد جهيد قالي رجعنا الوضع ما يساعد المهم رجعنا ويمن اقوله هات الفلوس قالي لا يا اخي ما استفدنا وعطاني قيمت البانزين فقط تخيل انت فا منها ما يركب اي زبون الا العزيزين علي الا وحسابي بمخباي وادق سلف بعدها خلاااص المؤمن ما ينلدغ من الجحر مرتين فا المراد من ورا القصه انتبه وخلك حذر وان كان مصدر رزقك الوحيد منها فا القليل الدايم ازين من الكثير المنقطع وان كان لا والله بتاخذه كمدخول ثاني بس على تفرغك يعني فا انا اشوف ماله داعي اذا بيبهدلك وبتحط فيه اكثر من انك تطلع منه

الطردات با الشرقيه زينه ورخيصه بس نصيحه اذا عندك خبره با الطردات والمكاين لا يردك الا البحرين
لان اخويانه فيهم تزايد غير طبيعي في اسعار الطردات
والسلام خير الختام
اخوك/ حسين الاحمد

[Ababidoo]

ألأخوان الفرضة ...وحسين الاحمد...
بارك الله فيكم وجزاكم الله خير على ماتفضلتم به نصحاً وارشاداً لأخيكم وكثر الله من أمثالكم....

[احمدوعبود]

ما قصروا الأعضاء بارك الله فيهم
ولكن اذا عندك قدرة لشراء جديد وانت لديك رغبة وخبرة بالبحر أنصحك بالجديد

[سائح الشرق]

الجديد الجديد ... على ماقال احمد وعبود ... اخاف تتوهق في مستعمل مكروف وتكره البحر بسبب كثرة الاعطال ..