سالفة دهام .... صادق و كذاب .... فعل طير ماله مثيل .... عطنا رايك يا صقار

[عبدالرحمن بن ذياب]

بسم الله الرحمن الرحيم

اليوم اتصل بي صديق عزيز و غالي علي دق الجوال رديت عليه و دار بيننا هالكلام
ابو صقر : السلام عليكم
انا : و عليكم السلام يا هلا
ابو صقر : كيف حالك
انا : بخير أبشرك على ما تحب بشرنا عنك
ابو صقر : و الله بخير الله يديم علينا و عليكم الخير
ابو صقر : كانك بمجلس رسمي
انا : و الله تقدر تقول بس اسلم
ابو صقر : أبد سلامتك كنا نسولف بالقروب اليوم و تطارينا بالطيور
و على قولة ابن فطيس
الله على الربطه يعين الصقاقير
.............. اللي تعد الريش و تعد الأيــــــام
يقطعون أوقاتهم بالتساييــر
............ وشوف المقانيص القديمه بالأفلام
انا : أسلم
ابو صقر : ومن قال سالم طريت لهم فعل دهام و علومه المهم
طريت لهم سالفته مع الكروان
يوم نزل عليها من السما من مسافه عاليه
و طقه ( طقه وحده) شلع بها من جنب رقبته لاخر ظهره
انا : ما شاء الله تبارك الله طيب
ابو صقر : و الله يا بو ذياب ان الرجال كذبني
انا : أفا لا والله منت براعيها يبو صقر علمك وكاد بس يمكن ما مر عليهم طير مثل طيرك
أو ان اللي كذبك مبتدأ أو ما توفق بالطيور
ابو صقر : و الله الرجال كذبني و شكك بكلامي و قالي بالنص انه يهد طيره على كراوين
و يلاقيه بعد ربع ساعه و هو حي ما مات
انا : و الله يبو صقر ان كان بتاخذ في خاطرك من هالكلام .....
ابو صقر : لا لا لا يبو ذياب أنا ماهمني كلام الرجال ومثل ما قلت يمكن ما مر عليه طير ساطي و يمكن ويمكن
و و و و لكنه غبني و شكك بكلامي
انا : أجل تدري يبو صقر حياك الله و حي علمك وحي نباك و حي ما جيت به أن بغيت الحق فأنا أعرف خال الرجال
و ان بغيت الشور خلنا نطرح الموضوع
بشكل كبير و موسع وناخذ راي أخويانا الصقاقير بمكشات و نشوفهم وش قولهم
خاصة ان بهم نخبة ماهيب بسيطة من الصقاقير
ابو صقر : شورك و هداية الله و ان قدرت تطرح استطلاع بيكون أفضل
انا : أبشر أبشر ما يصير بخاطرك إلا طيب
ابو صقر : تسلم تسلم لا هنت يبو ذياب
انا : الله لا يهينك و توصينا بشئ
ابو صقر : سلمت الله يستر عليك فمان الله
انا : فمان الله يا هلا ... يا هلا

هذا ما دار بيننا في قروب على الوتساب و نبي ناخذ رايكم في هالموضوع

طبعاً دهام ..... عسى الله يشفيه

حر فارسي طرح حفر الباطن يزود عن 17.5 فيه أثر قطاب يوم طرح

للعضو سليمان بن صقر العتيبي ( راع الطيب )

رايكم و سوالفكم و لا تنسوا التصويت

.

.

.

و سلامتكم .......

[طيار قطر]

والله ياخوي تصير عادي يامه طير يمسح صيدته وهي فوق توقع ميته يابسه

[سلطان 1]

لا بالله
يا عبدالرحمن
تصير وانا خوووووك.
وقد صااارت معي ومع غيري والله من طير
يطق صيدته طق في السماء وتحول الصيده وجناحها
علي ضهرها وبعضها تحول شلو ما تحرك.

[أبو فااارس]

تصير يابو ذياب وماهو شرط يحول عليه من السما نوب يتعاقبن مثل انه يطير الكروان صوب سيارتك وانت تهد ويلوحه الطير اللي ضاري لهالامور

[احمدالصالح]

نعم ، تحصل وقد مرت على اغلب الصقاقير هالحاله ودهام طير معروف وعسى الله يشفيه من ماجاه ،
ويعطيك العافيه يابو ذياب لطرح الاستطلاع تحياتي لك ولاخوي سليمان العتيبي
اخوكم / احمد الصالح

[عواد الشمري2]

ليش ماتصير الله يشفيه ان شاء الله

[ابو وافي00]

السلام عليكم ورحمة الله وبركاته
تصير ليش ماتصير
انا شايف مقطع لطير يضرب الحباره في السماء ويفك
جناحها عن جسمها
بحاول ادور المقطع وانزله ان شاء الله


تحياتي:
أبو وافي..

[عيد العازمي]

السلام عليكم ورحمة الله وبركاته

رايي شهادتكم باللي شفتوه يكفي


ويقدر صاحبك يبط عيونه قدام الرياجيل


دام السالفه فيها شهوود


تحياتي لك وللجميع

[رااعي بتار]

نعم يصير وياكثر ماصارت معنا

[البرنس الليبي]

انا سمعت ان فيه طير ضرب حبارى وقص جناحها ...نزل الجناح لحاله والحبارى لحالها ويقال عليها شهود ....اما الكروان ماسمعت مع انه صعب ولكنه ليس مستحيل لان الكروان خفيف مايتكي للطير مثل الحبارى وثانيا جلده ولحمته وعضلاته قويه اقوى من الحبارى .اذكر كروان عزلناه يمكن 6 مرات نعلم عليه ولاعنده خلاف وطياره ماتغير اما الحبارى كلكم تعرفون ادنى شي يذبحها .

[فاارس]

لا بالله تصير يابو ذياب : وفي طيورن واجد / مير شكل الرجال ماقد مره عليه هاللطيور ..
وعلى ماقال : اخوي ابو وافي ( فيه مقطع لطير منزل حباراه نصين من الجو )
دورته ومالقيته وبحاول ادوره وباجيبه باذن الله ( ويمكن فيه احد من الربع هنا واكيد شافوه بس نبي ننزل المقطع )
والله يشافي طير ( اخونا راع الطيب )

[وزاري]

[عادل الهلباني]

ماشاء الله والله يبارك له بطيره ..
لاهنت على هالموضوع "

[راع الطيب]

السلام عليكم ورحمه الله وبركاته
حيا الله اخواني من معارف واخوانا المكشاتيين والصقارين
اعذرونا عالقطعه ولاكن هالموضوع المبارك اللي جمعنا وياكم بهالمنتدي الغالي ع قلوبنا وقلوب الجميع
انا لم اشكك بكلامي او افعال الطيور ومعرفتها الطيور بحررررر معرفتها وعلمها من الناحيه العلميه وك اقتنا لها واهتوائها هوايه جميله وتجديد لعهد اجدادنا وتاريخ لنا كعرب ومسلمين
انا يوم كلمت ابو ذياب وفكرة طرح الموضوع وهو لجل شي وهو الاهم هو يتعلمون من هالنقاشات والحوارات من صقارين هالمنتدي لما عندهم من خبرات ومعرفه وعدم تعرض البعض من الاشخاص للرجال اذا هو معرفته ماتمشيه او ماقد مرت عليه
والشخص انا دعيته وقلت له حياك الله وهلا ومرحبا فيك بمجالسنا وفيه ناس معروفين علي هالحدث وابشر بالحق ومايلحق اذا انا جبت غير الواقع ولاكنه ما استجاب لدعوتي ورد عليها بالتكذب لما حصل وكان طرح الموضوع من اخونا عبدالرحمن كان جميل جدا ولعل الغير يستفيد


واشارككم ببعض من صور هالطير


وتقبلوا وجهة نظري الخاصه فيني واعتذرررر لو اخطين بشي
اخوكم: سليمان الدهاسي

[مقناص الكويت]

سلام عليكم
يأخوك مخلب الطير شفره حاده وشلون اذا جاك طيرن شاطر ويعرف يستخدمه
انا اشوفه عاديه وجد صارت معاي وشوف عيني وطبعا مايسويه غير الطير الشاطر
ورجال مشالله طيره شاطر والله يباركله فيه وبخصوص الي مو مصدق هذا غشيم وماله خلفيه بالطيور
وانا شوف عيني حباره نازله من دون جناح
وتقبل مروري