وش يضيق صدرك بالبر؟

[مطر سهيل]

السلام عليكم
تقبل الله منا ومنكم صالح الاعمال
نحن نعشق الطلعات البريه خاصة اذا سيلت الارض وربعت ولقيت لك اخوة على الدين والمله ,واكيد ان كل واحد بهاالمنتدى قد كشت , ودي اسأل وش اللي اذا صار لك بالبر ضاق صدرك وكرهت الكشته ؟
انا بالنسبه لي ( العجاج والغبار ) احس انه يحوس الكشته ولا يهون اذا قعد يبترم فوق رأسك راعي بل اوغنم يرقبك
ابي رأيكم ؟

[حد السيف]

السلام عليكم ورحمة الله وبركاتة
شكرا على هذا الموضوع الشيق
عندي اضافة ليش رايح للبر مبسوط وراجع متنكد

[كحيلان 11]

ما يضيق صدري الإ اذا جاء واحد يطب في العشقب ويفحط
ودي امسكه وادبغه لين يذن مع اذنه

[القصبي]

السلام عليكم ورحمه الله وبركاتة
موضوعك حلو مرة
انا مااحب اذا كشت وجاني غبار وطير عفشي ياهو يضيق صدري مرة
والشي الثاني اذا طلع معك احد وقام يحرك الضوء وعلى بالة انة يعرف كل شي وهو من جنبها يالله المستعان
شكرا

[هـآوٍي]

القصبي وانت الصادق اذا كان كل شوي يمن عليك بكل شي اذا قلنله قم سو هالشي قال انا مسوي الحاجه الفلانيه ..
قم انت سوها والله ودي اتركه بالبر الحاله وامشي خله يعرف ان الله حق ..
تحيـآتـي

[imksa]

الا جاك واحد يطلطل في الغدا ( او العشا ) زان ؟؟؟؟؟


واذا خلص وانتفخ بطنه قال ( ياخ مهوب محكور )


ودك تشق بطنه وتطلع اللي كله



فمان الله

[ملاعب الريح]

أكثر شي يضيق صدري القراطيس والقمايم (وأنتم بكرامه) اللي يتركونها الكشاته بعدهم ............

[مهاجر11]

انا والله مايضيق صدري الا الحوسة والرفالة

[سيد النشاما..]

وأنا مايقهرني ألا................................!!!!!
لاقمت تكرف وتشتغل وتصلح وترقع و ......و.......و....... ((والباقين متكين يتضاحكون))
لا......؟؟؟؟؟؟؟؟؟؟
ولين أصلحت لهم شيء؟؟؟؟؟ بدت العيارة هذا ملح قليل هذا ملح كثير هذا سكر واجد هذا سكر قليل هذا....هذا....((طيب قم أشتغل وصلحه أنت))

تحياتي لكم


محبكم المخلص أبو مهان

[فايز العامر]

موضوع طيب...

أكثر مايضيق صدري، الاخويا الرفلان...

بصراحة ودك تدفنهم وتطلع روسهم وتخليهم بالبر لحالهم... كم مرة تمنيت إني ماطلعت بأسباب رفالة بعض الشباب الاتكاليين الله يهديهم ...

لكن،،،
الحياة دقات،،، وكل دقة بتعليمة،،، واللي ما يتعلم من اللي فات،،، ما لحياته قيمة...





رعاد،،، أخوكم...

[القصبي]

بعض الناس تقهرك
وحطوها قاعدة في روسكم ماينقدك في البر ولا يغثك الا اللي موب يشتغل تلقاة منسدح ويضحك وانا تدهر ومتعب نفسك على ناس ماتسوى وياكثرهم صدق من الجيل التالي وفي الاخير يقول رزك مافية ملح بس مايعرفون الا انتقادات اما مدح ولو انة بالحسي مايعرفون سبحان الله اوادم ماادري وشلون
طيب وش طلعك معي ولا تبي تعثني
والله اني عانيت كم مرة من هالاشكال ورى ماتصير زيي انا اذا صرت مااعرف شي قلت تراني مااعرف اما كل اعرف لة وانا من جنبها وفي الاخير اخرب عشاهم او شاهيهم مالها داعي ذا الحركة تبي تصلح شاي او اي شي ثاني رح بلحالك وتعلم الين تعرف تسوي صم تعال معي وسوى لنا شاهي
سلام

[طحنون]

مايغثني بالبر
ألا الملاقيف اللي تضيق به الوسيعه ويجي يمرمن عندك ويطالع بعيونه جعلها بحطبه فيها ويمر ولا يسلم بعد
وتقول جاي يدورشي ضايع
هاذا
والشي الثاني انه يروح معك ناس حقين اتكيت هاذا ودك تربطه هووالاتكيت حقه بحبل وتسحبه لين يعافه ويصيررجال خشن

[الدهماني]

انا انغث لا جيت مكان زين والوصخ مالي المكان

تجيني كآبه واجزم ان الناس اللي كانو موجودين فيهم انانيه غير طبيعيه
ما يحبون الا وناستهم فقط

[المواكب]

اولاً - تأخير الصلاة
ثانياً - الموضوع حلووووووووووووووو مره ه ه ه ه ه ه ه انا يضيق صدري بالبر الرجال الا يقول لاهله اني كاشت وهو طالع يخدم عليه بين ( ثقيل الدم بالبر والعجاز ) .
ثالثاً - الا يطلع للبر اول مره يبدا يامر وينها في المكان والمسافة لا ويزعل اذا قلت ما عندك سالفة .
رابعاً - العجاج والهواء و الديم طول الكشته .
خامساً - تغير الراي بسرعه ونت توك واصل المكان الا تبي .
{{{ وصلى الله على سيدنا محمد وعلى صحابته اجماعين }}}

[Mohammad]

الى يضيق الصدر الانانى والبخيل...نعوذ بالله منهم....توبه