مقبل على الشراء ومحتار بين الباترول و الـgx

[NISTOY]

السلام عليكم ورحمة الله ..

انا يا اخوان قدر الله علي وسويت حادث وموتري انعدم والحمدلله سلمنا .. والان ناويلي على جيب ولاني ملتزم بمبلغ معين فانا محتار صراحة بين بطل الدروب ( se2 ) والمفخرة gx تحديدا ..
حاولت اني اطلع الفروقات بينهم وخرجت بالتالي

الباترول 2013 se :
v8 اوتوماتيك
320 حصانا بتسارع عجيب ماشاءالله
داخلية فخمة جدا رغم عدم توفر الشاشات
مرتبة السائق كهربائية
الموتر اريح وارسى على الخطوط
العزل افضل من نظيره المفخرة
المقصورة الداخلية اوسع ..


الـgx :
v6 اوتوماتيك
عزم مقبول لكن لا يقارن بالباترول
مقصورة جميلة لكن لا تقارن بمقصورة الباترول
موتر رساوته جيدة والعزل مقبول نسبيا
الموتر اعتمادي وصبور اكثر من غيره لا سيما في البر والنفود
سبير علاق " يعني شكل خارجي اجمل نسبيا "
شبابي اكثر c




وايضا الباترول 14 تغيرت اصطباته وشبكه ( تغييرات مقدور عليها ) .. واضيف الى ذلك اني سمعت ان الباترول يتهرقل ديكوره بعد فترة ويحتاج تربيط كامل .. وفي المقابل الجي اكس يعيبه انه منتشر بكل حدة واصلا اغلبها g من 2008 ومحولة 12 , 13



وعشان كذا انا محتاج مشورتكم يا اخوان .. مع العلم اني مستخدم للموتر طول فترة دراستي بالجامعة .. يعني 7 سنوات اذا ربي يسّر

[سقم المعادي 1]

معوض خير

استخر وشف اللي يجوز لك كلهن جيوب ماعليها كلام

و دامك بتدفع مبلغ و قدره شف لك الافضل مواصفات

[بومالك]

اللاند اصرف اذا تبيه للبر . بطل الدروب مع اني من عشاقه الا انه شكله غلط للبر كبير حبتين . تبي احيرك اكثر . فكر بصالون الفتك .او البرادو سته سلندر ياهو موتر خفيف نفس بالحيييل بالحييل عن تجربه بس يكون قير اوتو.أنشط فئة السته سلندر لتايوتا بدون منازع والله لايقربه لا ربع ولاغيره بس عيبه يفصل على 190 وخلفيته. والحمدلله على السلامه

[محمد 2002]

من كتابتك اشوف انك ميال للباترول ما عدا الشكل الخارجي
بخصوص الإختيار أقول وبالله التوفيق
أول شيء استخر الله سبحانه
ثم اتجه لمعرض تكون فيه السيارتين وقلب هذا وقلب أخوه والأكيد ان قلبك بيختار أحدها طع قلبك واشتر لأنك مستخدم وأذواق الناس تختلف وصدقني موضوع مثل هذا بيجذب المتعصبين لكلا الشركتين وكل بيمدح موتره ويذم موتر غيره
المهم بعد الاتكال على الله إذا شريت أمن تأمين شامل لأن السيارات الجديدة كلها صيانتها وقطعها غالية في حالة حدوث حادث لا قدر الله أو عطل كبير وفقك الله وسهل أمرك

[التعـ King ـديل]

تبي نصيحه مجرب

توني بايع هدد 13 فاكه وكاله على يدي واخذت بطل الدروب 13

فررررررررررررررررررررررررررررررررررق شااااااااااااااااااااااااااااااااااااسع بين الاثنين والله اني ضايع في الهدد لا راحه ولا رساوه بالخط عكس الباترول

[الشولة]

السلام عليكم أخي الكريم
الصراحه موضوعك هذا أحسه راح يكون أرض خصبه للمتعصبين لكلا السيارتين.
أنا لا أمتلك سياره يابانيه و بعيداً عن التعصب بحط لك وجهة نظري:
1- عليك بصلاة الإستخاره في كل أمورك و من ضمنها شراء سيارة ولا بأس من تكرار الإستخاره إلى أن يطمأن قلبك لإحدى السيارتين.
2- عليك بالتجربه و هي خير برهان فقد تظهر لك مميزات أو عيوب لا يراها أحد غيرك و أعتقد أن السيارتين متوفره في محلات الإيجار.
3- أن تكتب في ورقه مميزات كلا السيارتين و عيوبهما و تقارنهم لتعرف أيهم أنسب لك.
أما من وجهة نظري فإن الباترول هو الأفضل وذلك لأنك تحصل على مواصفات أعلى بكثير من اللاند و السعر متقارب، ولكن لازم تتأكد من الصيانه لأني سمعت من ميكانيكي أنه أسعار قطع الغيار غاليه وليست متوفره بكثره و السبب تغير الوكيل.
إذا كانت رجلك حاره و تجهد السياره فأنصحك باللاند لأنه راح يكون أصبر عليك و السبب هو أنه أقل قوه فيكون عمره الإفتراضي أطول، سعر بعد الإستخدام أتوقع إنه لصالح اللاند في السوق السعودي.
أتمنى لك التوفيق مهما كان إختيارك و كلهم سيارتين ممتازه.

[التمسساح]

والله ياخوي انا وغيري لا نعلم الغيب بس مدري ليش احس انك منزل موضوع علشان تسوي فيه فتنه بين الاعظاء ياخي هذا انت بنفسك ذكرت كل عيوب وحسنات الموترين وانت اذا كنت تبي تشتري ماهو بس كلام انت اللي تبي تستخدمه ماهو الناس يعني اذا شريت اشتري اللي يجوز لك ماهو للناس يعني اذا انا قلتلك هذا احسن وغيري قال لا هذاك احسن تبي ترد علينا يعني ياريت درئ للفتنه ان المشرفين يقفلوا الموضوع وروح اشتري اللي يجوزلك يكفي موضوع تعديل اللكزس

[راعي الجيوب 1]

تبي نصيحه مجرب

توني بايع هدد 13 فاكه وكاله على يدي واخذت بطل الدروب 13

فررررررررررررررررررررررررررررررررررق شااااااااااااااااااااااااااااااااااااسع بين الاثنين والله اني ضايع في الهدد لا راحه ولا رساوه بالخط عكس الباترول

.................................................. ........................................
كلام سليم 100/100 لعلمك مجرب آلتايوتا من موديل 80 لأكن بكل أمانه بطل الدروب البترول لا يعلو عليه شي رساوه قوه مشي ماتقارن أبدا ! كلامي هذا من واقع تجربه للباترول

[sgl2002]

اذا انت بالرياض فيه محل بتقاطع نكاس مع طريق الدمام يأجر اللاند الجديد والباترول الجديد


جربها نصيحه كل واحد يومين

[ابن كديميس]

الباترول مايقارن اصلا بالهدد ولا فيه وجه مقارنه الباترول افخم ولا هو عنده ولاكن الهدد شبابي اكثر ولافيه فخامه ونصيحه بما انك طالب خذ هدد وقير عادي تراه اطلق من الاوتوماتبك بالبر واقل صيانه واكثر اعتماديه .والهدد افضل لك من الباترول لان الباترول افخم وصيانته مكلفه اكثر من الهدد .

[ابن عكاش]

الراي اولاً واخيراً لك اذا بتاخذ لاند لاتاخذ الا 8سرندل وكلها سيارات جيده انت من يحدد

[أطلال نجد]

ابن عكاش عطاك الرأي و لا يهون باقي الأخوان

بالنسبة لي الباترول أفضل من جميع النواحي و أهمها القوة والثبات و الفخامة

[محمد 2002]

أحسن حل أعطاك اياه الأخ sgl
استأجر الموترين وجربها

[باوزير]

دامك طالب في الجامعة خذ سيارة صغيرة توديك و تجيبك مثل اف جي اكستيرا برادو شاص او نيسان شاص

[abusummer]

مادامك وصلت لهذه الاسعار يمكنك تاخذ رابتر بيبسطك احسن من الثنين الي ذاكرهم