تقرير بسيط عن بواجي NGK للاندكروزر 6 سلندر ( وكيلها الجديد + الوصف بالتفصيل )

[سقم المعادي 1]

السلام عليكم


صبحكم / مساكم الله بكل خير

موضوع بسيط خفيف الظل (ماظنتي)

عن بواجي من شركة عريقه



شركة NGK اليابانية

تأسست الشركه في عام 1936 في مدينه ناغويا باليابان (معلومة بسيطه )


ماعلينا من هالحتسي ..

طبعاً البواجي عندنا كنت اخذها من وكيلها الحاج حسين اللي هو وكيل ميركوري و مازدا و مدري وش بعد

لكن رحت له قبل أمس الخميس 12-05-1435هـ و سألت عن البواجي الخاصة باللاندكروزر 6 سلندر و افادني الموظف انها غير متوفرة .. سألته عن امكانيه توفرها بالمستقبل قال ماعاد نستورد الآن فيه وكيل ثاني لها و عطاني اسمه فقط بدون عنوانه ولا رقمه
بحثت في قوقل عن مكانه و وصفه مالقيت شيء للاسف .. بحثت في مكشات مالقيت شيء ممكن يفيدني بالعنوان بشكل دقيق لكن فيه موضوع لاحد الاخوان فيه بعض التلميحات عن مكانه قلت بدق سلف و بدوره لين القاه .. عبيت فل و مليت الثلاجه من الزاد و اتكلنا على الله , صليت العصر في المسجد اللي عند دوار الخرج على طريق الامير سلمان و لبقت موتري برا الدواعيس اللي عند قطع الغيار و قعدت امشي على رجليني اخف لي و ادور هالوكيل وكل من نشدته ماعطاني علم ولا وجهني لمحل ماعنده شيء .. و طولت وانا ادور لين قلت اقول عود بس وتعال الصبح اخف زحمه من العصر تلقاه على راحتك .. وانا متجه للموتر شفت محل يبيع بواجي دخلت عليه قلت يمكن احصل عنده ولو انه ماهوب وكيل .. سألته قال لا ماعندي NGK .. تحصلها عند البابطين .. قلت بس بس ابوك للجنه هو البابطين ذا وينه محد يعرفه من ربعك اللي بالحته !؟
المراد ان الرجال وصف لي مكانه (من الفهاوه صرت مار من عنده يجي خمس مرات ولا انتبهت له لأن لون لوحته مشابه للون اللوحات اللي جنبه العتب على النظر) واعض ثوبي واركض له وادخل المحل والابتسامه شاقه وجهي
ناظرني الهندي وش ذا اللي عاضن ثوبه و رافس الباب علينا و جاي يوزع علينا ابتسامات
واناظر الرف اللي ورى الهندي الا اشوف هالمزيونات واقعد اتمقل بهن تقل بزر يتمقل بحلاو من ورى قزازة محل


جاني الهندي وقال هاه تنق وش تبي ؟!
و امد له الورقه اللي كاتب فيها رقم البوجي حق اللاندكروزر مكينه 4500 EFI

هذا رقم البوجي :

(( BKR5EKB-11 ))

جاب لي البواجي عدد 6 حبات .. قيمتها مثل ماهو موضح بالفاتورة :



و موجود لهم فروع غير الصناعيه القديمه , مكتوبة في الفاتورة تحت المبلغ ^

هذا كرتون البواجي :




لاصحاب اللاندكروزر من 98 - 2007 السته سلندر و راعين الربع والشاص الى 2009 اللي مكاينهم 4500 ايضاً لزوم يكون البوجي رأسين مثل ماهو بالصورة :





- طبعاً متوفر عندهم بواجي لجميع السيارات الامريكية و اليابانيه والالمانيه والكورية و اللي تبي , لكن لازم تجيب معك رقم البوجي المطابق لسيارتك من الكاتلوج او عن طريق الموقع الرسمي لشركة NGK :

http://www.ngksparkplugs.com

طبعاً الرابط هذا اللي حطيته فوق ^ .. مافيه مشاكل بالسيارات الامريكيه لكن بعض السيارات اليابانيه تختلف المحركات بينا وبين المواصفات الامريكيه مثلاً .. مثلاً انا سيارتي لاندكروزر 99 سته سلندر المحركه 1FZ اسمه حجمه 4.5
بعد البحث عنه في الموقع يطلع لي مكينه الفكسار 8 سلندر 2UZ مثل ماهو محدد بالاحمر

و السبب لأن السته سلندر غير متوفر باللاندكروزر في امريكا من 98 , فقط 8 سلندر بمحرك 2UZ اللي عندنا هو الفكسار

طيب كيف تطلع رقم البواجي المناسبه لسيارتك اذا ماكانت موجودة في الموقع ؟
ادخل موقع NGK الاسترالي بسبب مطابقه كثير من مواصفاتنا لمواصفاتهم

http://www.ngk.com.au/

بعد البحث عن اللاندكروزر بمحرك 6 سلندر في الموقع الاسترالي :



ظهرت النتيجه مطابقه و هذا المحرك اللي نحتاج نعرف رقم البواجي الخاصه فيه



طبعاً طريقه البحث ليست محصورة على سيارات تويوتا فيه مئات الشركات ماعليك الا تختار الشركه ونوع السيارة


طيب نجي للزبدة وين مكان الوكيل البابطين ؟

الوصف بالتفصيل :

و أنت على الدائري الشرقي وجهك جنوب .. أدخل مع مخرج 17 ورح يمين يصير اتجاهك غرب , بتجيك اشارات تعدها كلها الين تدخل تحت النفق .. بعد النفق تجيك الاشارة الاولى تعدها و الثانيه تعدها .. قبل الاشارة الثالثه يجيك محل قطع غيار ايسوزو على زاويه ادخل من عنده يمين ابتل لين يجيك حرف T خذ يمين و سيد مع هالشارع لين يجيك حرف T بيصير على يدك اليسار محل قطع غيار تويوتا .. البابطين وكيل NGK قبل تويوتا .. المحل يفتح جنوب

هذا الموقع بالضبط بالويكيمابيا :

اضغط هنا



الى هنا انتهى الموضوع و العذر و السموحه طولنا عليكم ..

نقاط اخيرة:

- يعلم الله مالي لا ناقه ولا جمل في المحل ولا اعرف راعيه لا من بعيد ولا من قريب لكن للفائدة للاخوان الكرام في مكشات لأني مانسيت فضلهم علي و لأني حصلت رقم بواجي سيارتي في مكشات لزوم نرد لهم الجميل
- حاولت اكون دقيق في الوصف (وصف شايب) لأني مالقيت في النت ابداً في اي موقع ولا منتدى فيه وصف للوكيل .. كل اللي لقيتها تلميحات (مكانه في مخرج 17 فقط) فـ بدال ماتضيع وقتك زي ماصار معي و خصوصاً ان مكان محلات قطع الغيار هناك زحمه وشوارع ضيقه ماتاخذ راحتك بالتدوير قلت اسهلها عليكم و اعطيكم الوصف ,

ما ارجي من هالموضوع غير شيء واحد ( دعوة منكم لاخوكم فقط ... )

الموضوع خاص بمنتدى مكشات .. رجاء كل الرجاء في حال النقل أن يتم ذكر المصدر تقديراً للجهد



-
-

[جديعان]

مااااااااااشا الله عليك وفيت وكفيت

[بدر العبدالعزيز]

السته سرندل يشمل الموديل من 98-2007 ؟؟؟

صحيح اخوي الغالي ؟؟؟

[ابونبيل]

فيه للهايلكس لان الوكاله وشد البلد كله دينسو

[بدوي جنوبي]

الله يعطيك العافيه على التقرير

يا ليت ترفع الصور على مكشات عشان اقيم الموضوع

[ابوذوق]

مضوع متعوب عليه صراحة بس البواجي هاذي تصلح gx 2004

[سقم المعادي 1]

مااااااااااشا الله عليك وفيت وكفيت

حياك الله و شاكر لك على ردك

السته سرندل يشمل الموديل من 98-2007 ؟؟؟

صحيح اخوي الغالي ؟؟؟

الله الله سته سلندر محرك 1FZ من عام 1998 الى 2007 في اللاندكروزر بنفس البواجي المذكور رقمها في الموضوع

فيه للهايلكس لان الوكاله وشد البلد كله دينسو

بالنسبه للهايلكس ماعلمتني كم موديله ؟
على كل حال مكينه 2700 حقت الهايلكس اتوقع والله اعلم ان اسمها 3RZ
هي نفس مكينه التويوتا تاكوما 2004
هذي البواجي المناسبه للمحرك ولك ان تختار بينها سواءاً عاديه او ليزر او اريدوم :


لكن تأكد من اسم المحرك هل هو فعلاً 3RZ لأني لست متأكد

الله يعطيك العافيه على التقرير

يا ليت ترفع الصور على مكشات عشان اقيم الموضوع

تم و شيك على الخاص بارك الله فيك

مضوع متعوب عليه صراحة بس البواجي هاذي تصلح gx 2004

تسلم يابو ذوق , نعم البواجي مناسبه للـGX 2004

[أحمد الدهمشي]

وعليكم السلام ورحمة الله وبركاته

بارك الله فيك على المجهود الطيب يستاهلون أهل مكشات
لكن ما ذكرت هالبواجي تستاهل كل هالعنوة
أبي أعرف فايدتها لا هنت .,

[مرير الشوق]

جزاك الله خير اخوي سقم المعادي

سؤال بسيط ..

احصل عند البابطين اسلاك بواجي للجكسار 2002 ؟

[سقم المعادي 1]

وعليكم السلام ورحمة الله وبركاته

بارك الله فيك على المجهود الطيب يستاهلون أهل مكشات
لكن ما ذكرت هالبواجي تستاهل كل هالعنوة
أبي أعرف فايدتها لا هنت .,

بالنسبه لي جربت البواجي اللي عند عبداللطيف جميل (دينسو) ولا جازت لي
اول ماركبتها حسيت بتحسن و بعد 15 الف بدأت تزيد الصرفيه و العزم يدج
و بعد البحث لقيت ان الـNGK افضل من الدينسو حسب كلام من جربها على اللاندكروزر و لثقتي فيها لأني جربتها على سياراتي اللي قبل احرص اني اخذ NGK ولا اذكر اني اشتكيت من زيادة صرفيه او تفتفه او عزم يدج بسبب بواجي ..
يعني مافيها فائده كلها بالنهايه بواجي لكن الجودة تفرق لصالح NGK اطول عمر و أقل صرفيه والاهم انها ارخص سعر من الدينسو

جزاك الله خير اخوي سقم المعادي

سؤال بسيط ..

احصل عند البابطين اسلاك بواجي للجكسار 2002 ؟

والله مدري وانا اخوك بس لو تتصل على رقمهم اللي في الفاتورة وتسألهم يمكن تحصل عندهم
بس اسلاك البواجي حقت الوكاله ممتازة يمكن المشكله من الكويل او من شيء ثاني عندك









-

[ابواديب33]

تنفع للفورتشنر 6 سلندر

[سقم المعادي 1]

تنفع للفورتشنر 6 سلندر

محرك الفورتشنر 6 سلندر
اسمه : 1GR-FE
نفس محرك البرادو في استراليا
هذا النوع المناسب له :








-

[stranger]

السلام عليكم
انا مريت المحل الموجود في صناعية العاصمة سيارتي جمس 2002 وطلبت البواجي منه بدون رقم ( طلب مني الاستمارة وادخل رقم الهيكل واعطاني البواجي ) يعني انك تقدر تلاقي البواجي المناسبة اموترك عن طريق رقم الهيكل

[طلال الفدعاني]

السلام عليكم يعطيك العافية أخوي ما قصرت عندي استفسار تصلح البواجي هذي على جيب اكسبلورر فورد ٦سلندر مديل ٢٠١٠ ويليت تعطينا وش فايده كل نوع والله جيزاك خير

[ابوراكان تبوك]

يعطيك العافية ع الموضوع

جربتها من سنتين وبصراحه حقها قليل فيها حتى صوت المحرك يصفى والتشغيل أسرع وخصوصاً اذا طقيت معه صفاية جديده فرررررررررررررق عن بواجي تويوتا اللي اتحدى انها تمشيك 10آلاف صح
للعلم ممشاي عليها الحين تجاوز 30ألف تقريباً ماشاء الله وبغيرها قريب