السلام عليكم ورحمة وبركاته
اسعد الله صباحكم ومساكم بالخير والمسرات
تذكرون زمااااااااااان وحنا صغار يوم نسسسحب الكراتين ترى ماحنا مجانين لاهذي سلمكم الله نسميها سيارة من الشفقة على سواقه السياره
هذا طول االله عماركم على طاعته قديم يمكن قبل 30سنه كنت انا اول من امتلك سيارة من نوع جيب لكزس في نظريتي الحين واللي ماعرفناه الا الحين وابشركم اعرفه بس ماقد لفيت طارته للحين
المهم ماودي اطول عليكم الجيب اللكزس اللي اسرد لكم سالفته هو كرتون البرتقال او أي كرتون البرتقال او أي كرتون المهم من النوع الجيد ثم اجيب لي حذاء ( زنوبه ) اكرمكم الله وعلبة صلصل لونا صغير وصيخ طويل من شبك غنم امي الله يرحمها ووالدي وجميع اموات المسلمين وافتح ورشة عمل اجيب الكرتون واشب النار واحط علبة الصلصل فيها وبعدين احط العلبه على الحذاء كرمتم ثم اضغط عليه تطلع شكل دائره وهذي هي الكفرات صناعة يدويه مانحتاج لابن شيهون بعدها اجيب الصيخ واشق الكرتون من جهه واطلعه من الجهه الثانيه على شان اركب الكفرات فيه اثنين امامي واربع خلفي واشق الكرتون من النص واربط فيه حبل واسحبه في نظري هذيك الايام احس انه افضل من السياره ولااحد قدي لاسحبته وقمت افحط فيه عععععععععن عنننننننننن واحمل عليه الحطب واذا جيت من عند خط سيارات ولا جرف اهدي لين اطلع منه واركب له اريل طووويل واذا سمعت ان احد عنده ذبيحه من الجيران ولا عندنا رحت اراقب واتمنى ان تكون الذبيحه تيس تدرون ليه لان التيس في آخر الذنب غره ويقصونها مع الجلد وانا اروح آخذها من شأن اركبها في راس الاريل من فوق زينه واقول للعيال هذا ريش نعام وكنت افرح لاجاني احد من المدينه ومعه عيال صغار ع قدي كنا نقول لهم حضر على شأن يشوفون الكرتون واقعد اتفقد الكفرات لايكون مبنشره ويتجمعون اووووووخص كيف سويته كذا تكفى بنأخذ دورة طيب بس لاتفحطون عليه ولا تبعدون شوي وترجعونه
ومرة جاني ولد اختي يطلبه بيحمل عليه حطب رمث قلت خلاص بس لاتاخر علي وراي مشششوار راح وانا بس على الباب انتظر متى يجي واقول بنفسي الحين يمديه يفحط عليه لانه ماهي سيارته شوي الا هو جاي ومعه المبروك واقوم اخاصمه ليش تأخرت علي ماقلت لك ان عندي مشششوار ,,,,,, اوووووووم المششوار هذا ههههه
ويوم من الايام يجيني اخوي الكبير الله يحفظه قال لي خلك قريب بنروح انا وانت مشوار عاد هالمرة على سيارة صحيح مو خروطي
واروح لامي رحمة الله عليها واسلم عليها قلت يمه انا بروح مع اخوي مششوار امانه معتس لايأخذه احد ولا تعطينه لين اجي . قالت طيب بس طلعه عني براء
المهم تكشخت بذاك الثوب متعفط مطلعه من الشنطه ماعندنا كوي البس وتوكل والشماغ البرتقالي انتظر يوم جاني اخوي وشافني كاشخ قال لي انت ليش كاشخ لايكون تحسب اني بخطب لك نرى بنروح انطرح الحشو ونوسمها ههههه
مشيت معه بكشختي يوم رجعت للبيت الا الحاله اللي ماودك يشوفها من يعزك ويغليك سيارتي رايحه فيها آكلتها المعزا ماباقي فيها الا الشششاصي وذيك الليله ماحالة الصديق حالتي محزن ومبرطم تسسني فاقد لي غااالي عاد دور كرتون الحين يجيك مافيه الا انك تدعي ان احد يجي مسير علينا ومعه كرتون برتقال ,,,, عاد انتشرت سيارات الكراتين وصاروا اللي حولي كل واحد معه كرتونه يوم دروا عني كلهم جوني يواسوني واللي يواعدني بكرتون واللي يواعدني بدوره على كرتونه وان لاجاء كرتون انه من نصيبك وراحت ايام طفولتنا وانتهت السسسالفه والكرتون ماشفته ههههههههه
وسسسلامة الجميع
تحيـــــــــاتي
15 نوفمبر 2015 - 16:514 نوفمبر 2015 - 21:27
 |
رد مع اقتباس
..
المشاركة الأصلية كتبت بواسطة قوافي
..
