XX. يالربع معاي بعير عمره15سنة مش راضي يركب

[صقار حيدان]

السلام عليكم

معاي فحل عمره 15 سنة قبل تقريبا شهرين كان يضرب
والآن مش عارف ليش مش راضي يركب على النوق
اذا جبنا له ناقة يجي يشمها ويروح

وش الحل

[عمادالثبيتي]

امكن الفحل فاتر
ما يضرب بسبب الحر
خلي الجو يبرد و يعود للضراب
و الله أعلم

[مريقب العيفار]

البعارين ماهي مثل المعزا والغنم

اغلب الفحول ما تضرب في الصيف

اذا ابرد الجو ان شاء الله بيضرب

واذا بعيرك من الزمول اللي تضرب بالصيف فيمكن الناقة ماهي ميسر

[تربة الشمال]

تو وقت هداد الفحول باقي عليه لاين برد االجو هاجت الفحول

[معانق المزن]

ماهو وقت ضراب الحين

الا اذا جملك مايمنعه الحر وشغال على مدار العام
هذا شي ثاني..

[خشكاري]

أطحن له حبة فياقرا مع المويه ههههه ..

أمزح معك يا أخوي ..

ان شاء الله أفادوك الشباب ..

[داموك 1]

يمكن يبي يجدد شبابه وانت عرضت عليه الفطر
شف لها بكره

[Mr.2BaC]

ماهـو وقت ضراب الحيـن باقي حول شهـرين
وانا اخـوك

[راعي سهوه]

انشهد ان البل بليت

[راعي ددسن1]

هههههه عمره 15

[العصيمي سلطان]

شهر ١ لا جا الشتاء يضرب

[العصيمي سلطان]

يمكن الناقة ماهي مجسر لان الفحل مايضرب الناقة الي موب مجسر وفي الصيف قليل جداً جداً من الفحول تضرب اما اذا برد الجو يضرب وتقدر تعرضه على طبيب بيطر متخصص على هذي المشكلة

[رجبشعبان]

يا خوك الفحول ما تضرب ي كل وقت الا القليل منها الفحول تهيج وتبي الضراب وقت الشتاء يوم يبرد الوقت وتبي تشوف جملك يهدر ويتفلت على النياق المجسره لانه يروح ريحتها .

[البدوي الفاهم]

توه صغير فحلكم
انا عمري 27 وباقي ما اعرست وبعيركم عمرة 15 وتبغاه يتزوج
وانا بعد مش مش عارف الوضع ايه

[ماجد ابو فيصل]

وانت كيف هديته قبل شهرين عز القيض وبعض الفحول لازم يستقري الناقه ياعني يشمها
وإذ عقلتها وبركة مايضربها خله لين يبرد الجو وشف عنه لان ضراب القيض ينقض عن البعير