وعليكم السلام ورحمة الله وبركاته ..
أولا اسأل الله أن يبارك لك عملك ، ويرزقك المال الحلال ..
وهذي بعض النصايح أتمنى انها تفيدك :
1- تختار إسم مميز للمخيم ..
2- عمل كروكي واضح ومبسط لموقع المخيم مع وضع وسيلة اتصال كرقم الجوال ويتوفر به واتساب أيضا للرد على الاسئلة والاستفسارات ..
3- تصوير مجموعة صور للمخيم من الداخل توضح أقسامه ومحتويات كل قسم وبأكثر من زاوية ولا تنسى التركيز على ذكر الأشياء المميزة التي قد تشد انتباه محبين المخيمات والخدمات اللي متوفره فيه ( مثلا شاشة LED مقاس 55 بوصه لمشاهدة المباريات + رسيفر الجزيرة الرياضية مثلا أو وجود خط انترنت أو ألعاب للاطفال في قسم العائلات ، ملعب طائره ، توفر أكثر من دورة مياه ، وجود سخانه ، وجود مطبخ به دبة غاز + مواعين الطبخ + جلسه خارجيه ...... الخ
4- عمل مونتاج مقطع فيديو للمخيم بسيط وجذاب مع تجنب الأغاني والمقاطع الموسيقية ..
5- ( أطب مطعمك ولا تطعم نفسك أو أهلك وعيالك بالحرام أو المال المشبوه ) لذا احرص على عدم السماح بإقامة المنكرات من أغاني وطرب وحفلات رقص شبابية اللي للأسف أغلب الشباب هداهم الله يشوفونها شي عادي ويعتبرونها نوع من أنواعه الفله ..
6- ابدأ بالتغريد بالصور المصورة مسبقا في تويتر والانستغرام مع التعليق عليها بأسلوب بسيط وجميل ..
7- الرد على الاستفسارات والتفاعل مع المنشنات في حسابات التواصل الاجتماعي ..
8- في البداية تحتاج للبحث عن بعض الحسابات المميزة للمخيمات والاطلاع على طريقة تسويقهم وطريقة العرض ومحاولة تقليدهم ولكن بأسلوبك الخاص اللي يميزك عنهم وليس نسخ لصق ..
9- ابتعد عن المبالغه أو الكذب في وصف ومدح مخيمك وليكن شعارك المصداقيه لتكسب توفيق الله وكذلك لتنال رضى وثقة الناس فيك ..
10- في ناس في مواقع التواصل الاجتماعي نظامها ( تابعني وأتابعك ) لذا ركز على الفلورز اللي يهتمون بمتابعة حسابات أشهر المخيمات وتابعهم وحاول تمنشنهم ..
11- اذا عندك سيوله ماليه تقدر تنشر اعلانات مدفوعه في حسابات التواصل الاجتماعي الشهيرة لتحصل على متابعين وينتشر اسم مخيمك وصوره في النت وكذلك جروبات الواتساب ..
12- بالنسبه للأسعار أنصحك تحدد أسعار معقوله لكل قسم وكذلك أسعار خاصه للي بياخذ القسمين مع بعض ..
13- بالنسبه للحجوزات الأفضل انك تاخذ مبلغ مقدما كعربون حجز لضمان جدية اللي بيستاجر منك ..
14- بالتأكيد حاول ان تكون أسعار وسط الأسبوع تكون أقل من أسعار الويكند ..
15- حاول أنك تكون قريب من عملائك وتكون علاقات معهم وتكسبهم وان يكون كلامك مع المستأجرين تحت شعار ( إن أعجبناك فتحدث عناً وإن لم نعجبك فتحدث إلينا ) .. فإنت ستحتاج لهم بالتأكيد في مواسم الكشتات القادمه ، وهم اللي راح يسوقون لك بطريقه مباشره وغير مباشره من خلال مدحك انت ومخيمك في سواليفهم أو ذمك انت ومخيمك وهكذا ..
16- أحيانا تصير أخطاء خارجه عن الارادة لذا حاول يكون فيه تعويض وليس بالشرط يكون مادي .. ( موقف صار لنا من فترة .. كنا مجموعة شباب مستأجرين مخيم في منطقة رشوش بالثمامة وفجأة خرب ماطور الكهرباء حق المخيم وقعد العامل يصلح فيه حوالي الساعه تقريبا وبعد اصلاحه تفاجأنا بأن العامل جانا معه صحن فيه مجموعة فواكه منوعه وكذلك دلة قهوة جاهزة من صاحب المخيم كتعويض عن الانقطاع اللي صار وبعدها نتفاجأ أيضا باتصال بالجوال من صاحب المخيم يعتذر عن اللي صار ومدى رضانا عن الهديه المقدمه منه .. فتكون لدينا انطباع ايجابي عن صاحب المخيم وشكرناه حقيقه على اهتمامه مع العلم ان سعر المخيم ما يتعدى 500 ريال تقريبا لليوم الواحد ( قسم واحد فقط ) ..
أتمنى اني أفدتك
تقبل مروري
أبوتركي