اريد الذهاب للعمره من الرياض بسيارة

[ماجد الشمال 1]

تكفون اريد الذهاب للعمره من الرياض بسياره انا والاهل ابي طريق سريع ومنين احرم من اي ميقات لاني ذاهب لرياض لمراجعة احدى المستشفيات هناك ومن ثم الذهاب للعمره ولا اعلم شيئ عن الطريق ولا اعلم اين ميقات اهل الرياض ارجو الرد السريع

[A7MAD-STYLE]

السلام عليكم ..

الطريق جدا سهل ولا يضيع وخصوصا اللوحات موضح بها اتجاه الطريق ( مكة المكرمة )

اذا انت ساكن في جنوب أو غرب الرياض أقرب شي لك تمسك الطريق الدائري الجنوبي ووجهك غرب واذا تعديت حراج بن قاسم ( راح يكون على جهتك اليمين ) ومصلحة الصرف الصحي ( راح تكون على جهتك اليسار ) وبعد ما تتعداهم بمسافة خلك ماسك الخط الوسط وبتشوف لوحه مكتوب عليها مكة المكرمه .. خلك سيده مع الخط لين يجيك الجسر المعلق .. واذا صرت بنهاية الجسر المعلق راح يجيك مخرج ( جدة ) ادخل مع المخرج وتوكل على الله ، الطريق سيده لين توصل قرب الطائف تجيك لوحه موضح بها مخرج مكة المكرمة مروراً بميقات ( السيل الكبير ) .. احرم انت والاهل من الميقات وبعدها اكمل الطريق لين توصل مكه المكرمه بإذن الله تعالى ..

الأفضل من وجهة نظري ان تصلي الفجر وتحرك من الرياض باتجاه مكه ..
الأجواء جدا رائعه في النهار هذه الايام والطريق أيضاً ، ووقت وصولك المتوقع بإذن الله للميقات بعد الظهر وبحسب توقفاتك وسرعتك .. ولمكه بإذن الله قبل العصر أو بعد العصر بقليل بحسب سرعتك وتوقفاتك .. وراح يكون وصولك لمكه بإذن الله على وقت تسجيل الدخول ( Check-In ) لأغلب الفنادق ..

وبما أن الحرم مزدحم قليلا هذه الايام بسبب موسم العمره فأنصحك بالإبتعاد عن الطواف في الأرضي وعليك بالمطاف الجديد ( الأدوار ) وبالنسبة للسعي فعليك بالمسعى الدور العلوي فهو دائماً أخف زحمه وأفضل تهوية

أخيرا أعتذر عن الاطاله وتقبل مروري
ولا تنساني من صالح دعائك
أخوك أبوتركي

[الاسعدي]

الله يسهل أمرك ويوصلك سالم وتقبل الله منا ومنك

جميع اللوحات بالرياض موجود فيها مكة المكرمة واتجاه الطريق.
واذا بغيت أي شيء تفضل هنا او الخاص حنا جاهزين . وما قصر أخوي أحمد

[ماجد الشمال 1]

جزاكم الله كل خير ورحم الله والديكم

[رمال النفود]

الاخ ماجد الشمال
ليتك تحدد مكان سكنك بالرياض ونعطيك الطريق إلى أن تخرج من الرياض وتمسك طريق مكة السريع وإذا مسكت الطريق السريع هنا ماعندك مشكلة تمشي مع اللوحات لحين توصل الحوية يجيك قبل الحوية مطار الطائف الاقليمي بعد المطار بمسافة ليست بعيدة تجييك لوحة مكتوب السيل الكبير (والسيل الكبير هو ميقات أهل الرياض) شاهد الخريطة هنا :
https://www.google.com.sa/maps/@21.5...2031,11z?hl=ar

تمسك المخرج لين توصل السيل الكبير المسافة ليست بعيدة ممكن نصف ساعة أو أقل . وتحرم بالميقات ثم تتجه لمكة جهة الغرب اللوحات هنا واضحة جدا ما تضيع بإذن الله.
وهذي الخريطة العامة لطريق الرياض مكة .
https://www.google.com.sa/maps/@23.2...75462,7z?hl=ar

وتقبل منا ومنكم صالح الأعمال .

[ماجد الشمال 1]

ساكن بشقه مقابل بلدية النسيم

[دغيم1]

ساكن بشقه مقابل بلدية النسيم

حياك الله أخوي
اسلك طريق خريص ( مخرج 13 ) باتجاه الغرب
اقطع الدائري الشرقي وانت مواصل سيرك غرب .
تأتيك وزارة الحرس الوطني على يسارك ، واصل المسير ،
بعد نزولك من كوبري الخليج _ واصل المسير تأتيك مدينة الملك فهد الطبية على يمينك ، واصل المسير ، حتى تأتي على مجمع كباري تقاطع طريق الملك فهد ، واصل المسير ،
واصل مسيرك متجها غربا على طول ، بعد ذلك ستجد نفسك تتجه لمخرج يتقاطع مع طريق الملك خالد ،
واصل المسير ، سيأتيك حي السفرات على يمينك ، وفندق الريتز كارلتون على يسارك ،
واصل المسير حتى تصل إلى طلعة القدية
تمنياتي لك بعمرة مقبولة ورحلة سعيدة وآمنه
تقبل تحياتي
أخوك / ابوفيصل

[رمال النفود]

عذرا على التأخر بالرد أخي ماجد الشمال..
لكن كما ذكر أخي دغيم فقد كفى ووفى .
تطلع على طريق خريص باتجاه الغرب (إلى داخل الرياض) وتتبع اللوحات الارشادية والاسهم باتجاه مكة وأخي دغيم شرح بشيء من التفصيل.

وبشرنا إذا وصلت بالسلامة .

[ماجد الشمال 1]

جزاكم الله خير كلكم تم ولله الحمد أخذ العمره بكل يسر وسهوله من الله ثم منكم وعذروني على تأخري برد

[رمال النفود]

تقبل الله منا منكم صالح الأعمال
ولا سوينا شيء اخوي ماجد .