مرحبا بكم في منتديات مكشات |
مركز تحميل الصور | رادارات المناطق | |||||
تنبيه : منتديات مكشات تمنع عرض أو طلب الأسلحة أو الذخائر بكافة أنواعها ، كما تمنع طرح مواضيع عن أي أسلحة عسكرية |
لا تعقد الأمور يابو شيري ترا الثلاجه راس مالها 400 ريال والطلعه حدها 3 أيام ولا يومين والهدف منها تبريد الماء
وأنعام الله واجد وتخفيف الاكل في البر لازم
وان كان الدعوه فيها صيد على القدر دايركت ولا على الصاج هو وقت تبريد ولا تجميد
وترا الثلاجه تشيل لك 4 كيلو تقريبا في الفريزر
وترا يابو شيري انا ناقل تجربه فقط ما بعد حكمت عليها بالنجاح المطلق وقاعد اقول للشباب اصبروا لين يجي القيض وانزل لكم تقرير كامل بإذن الله مع ان بعض الشباب جرب لان السالفه 400 ريال وما هو خسران شيئ اذا مشت معه ولا حطها بالبيت ولا قلبها احسن حافظه للثلج
ليس الهدف من ردي عليك هو انتقاد يا ابو شيري انت من الناس اللذي تعجني تقاريرهم انت مبدع والله بدون مجامله
وليس الهدف مصلحه شخصيه لتعارض كلامك مع تجربه اعجبتنا
لامجامله في النقاش حتى يستفيد الجميع
اتكلم لك عن تجربه يا ابو شيري
عبيت الثلاجه لحم ودوبها تسكر حتى بالفراغات كان فيه علب ماء صحه يعني مافيه نفس وحطيت التبريد ع الدرجة قبل الاخيرة
والحمد لله 48 ساعه
والتبريد اساسا بدون مواد حافظه يمشيك 7 ايام وانا حدي في البر اصلا 3-4 ايام وتكفيني هذه المده اثناء موسم الطيور
انا مشكلتي ما اوثق
بموتري بطاريه وحده 80 امبير لكن كل 3 ساعات تمشي السياره اصلا مايحتاج اشغلها
جهاز رفيق الدرب والبطاريه الاحتياطيه لها شهر مشتريهم ماركبتها باقي
لاتوثيق ولاتركيب هههههههههههه زول
ما هي مسألة تعقيد
بس أتكلم بجد اللحوم تحتاج تجميد وإلا تفسد وتصبح غير صالحه للأكل
( جميع أنواع اللحوم بشكل عام صيد أو غير صيد ) إلا في حالة استخدام الملح وأعتقد ما احد يستخدم هالطريقه
أما بخصوص تقول الصيد على طول للقدر ممتاز أتفق معاك
لكن صيد الطيور في الغالب يكون فيه شي غير اللي بالقدر
والتبريد ما راح ينفعه وهو بريشه
اما بخصوص قسم التثليج فيها يشيل 4 كيلو !!!! فهو لا يكفي أطلاقاً لطلعه تستمر أسبوع ومعك تيس أو هرفي مقطع وأحياناً تشتريه من المرعى
لا تفهمني أنني أعترض على التجربه بالعكس أنا مؤيد ومتابع
وأتمنى تنجح مع العلم أنني قلت سابقاً لو فيه فريزر بنفس الحجم ونجحت لكون أول من يطبق
تجربتك وخبرتك وحضرتك على عيني وراسي
لكن أنا شخصياً مقتنع أن بفصل الصيف اللحم ما ينفع معه التبريد نهائي حتى لو بثلاجة المطبخ بوسط البيت
وجرب اذا دخلت الكنه حط لك قطعة لحم صغيره بصحن بالثلاجه الجزء السفلي وليس الفريزر
أما في الشتاء فأنت لا تحتاج الثلاجه نهائي لو تعلق الذبيحه بالهواء الطلق كافي
ما شاء الله يابو راكان تجربه موفقه خذ لك بطاريه متنقله وشف الفرق في مدة التشغيل بس اهم شيئ خذ 80 أمبير
للمعلوميه وحسب مقياس درجة الحراره بروده الثلاجه تصل الى الصفر مئوي تقريبا على اعلى بروده وداخل الفريز ناقص عشره
المره الجايه يابو راكان وثق الصيف جاي وأغلب الشباب ما يقتنع الى بالصوت والصوره
اسئل الله التوفيق للجميع
كلام جميل يابو شيري لاكن طريقة الاستخدام والحاجة لا تحكم على نجاح التجربه قد تنجح مع شخص وقد لا تنجح مع أخر
المحك والفصل و الحكم في نجاح هذه التجربه هو اذا طقت حرارة الجو فوق الأربعين بعدها نشوف تجربتها في تبريد الماء وتجميد اللحم واختبارها من جميع النواحي ان شاء الله
لذلك ادعو الجميع للمتابعه
فائدة للأخوة وخاصة للمتخوفين من زيت الفريون
أخوي يعمل في وزارة التجارة وشرحت له الوضع
فسأل أحد المهندسين عندهم في إدارة المختبرات
وشرح له كامل الفكرة أن الثلاجة صغيرة
وفريونها R134a وأنها ستستخدم للسيارة
فأفاد بأن هذا الفريون أفضل الأنواع وأبردها
وهو نفسه فريون السيارة ولا يتأثر بالاهتزاز
وقال : قل لأخوك يتوكل على الله وهو متطمن
وأوصى بالحرص على حماية الفريون ومواسيره
من أي ضربة أو عفط وأنه يجب حماية منطقته
السلام عليكم
والله يا أخي ما شفنا ثلاجه بالبيت وبالسعوديه تبريدها او تفريزها فاشل
الا اذا انعمل لها صيانه غير مضبوطه فلا يستفاد من كلامك وردك.
الا اذا انت بدوله اخرى غير السعوديه فيمكن لعدم ثبات التيار الكهربائي .
----
ردك ما فيه لغه ارقام ولا تفاصيل مقنعه
وصاحب الموضوع واضح في طرح موضوعه من خلال طرحه تفاصيل بالآرقام .
مع فرضية ان الصيف له رأئي اخر مقاوم للتجربه لمجاملتك فقط.
--------
ردك ذكرني بنشرة الأخبار الجويه
( عبيلة وشواله 45 درجه ميئويه ورح عاد صدق او ما تصدق)
وحبه على راسك .
﴿ وَضَرَبَ اللَّهُ مَثَلاً قَرْيَةً كَانَتْ آَمِنَةً مُطْمَئِنَّةً يَأْتِيهَا رِزْقُهَا رَغَداً مِنْ كُلِّ مَكَانٍ فَكَفَرَتْ بِأَنْعُمِ اللَّهِ فَأَذَاقَهَا اللَّهُ لِبَاسَ الْجُوعِ وَالْخَوْفِ بِمَا كَانُوا يَصْنَعُونَ ﴾
اللهم لاتؤخذنا بما فعل السفهاء منا
انا قمت هاليوم بالبدء في اجراء تجربه.
راح ان شاء الله تكون رائده في موقع مكشات
وبقيمة لا
تتجاوز الألف ريال او اقل
وكله بفضل فكرة اخونا صاحب الموضوع .
اكرر له شكري وتقديري وأحترامي الجم .
بخصوص رد أبو شيري فإنه معه حق إذا يبي تجميد فهي لا تفيده
لكن في الغالب الكشتات الخفافية من 3 حتى 4 أيام لا تحتاج تجميد اللحم إذا كانت كما قال الأخ تصل درجة الصفر وحولها
عموما الفكرة لا يلزم تناسب الجميع لكنها تناسب شريحة كبيرة من الكشاتة
هههههههههه كنه شد معك النقاش عموما انت ع بعضك لك محل التقدير والاحترام وتعليقك ع هذا الموضوع له لمسات لكن بدون تجربه واحترم وجهه نظرك
بالنسبه لفصل الشتاء ماجت ع الذبيحه حتى ماء الشرب ماتحتاجه كثير ولايكثر الاستفسار ع الثلاجات الا ع ابواب الصيف والاغلبيه يستخدمها للماء والعصيرات والفواكه كلـــن حسب احتياجه لكن هذا الاغلبيه
انت يا ابو شيري مصر على فشل هذا المشروع ما ادري ليه
انا لايهمني ان فشلت التجربه لكني ابحث عن حاجتي فقط وكل السالفه والله ماتعدت 300 ريال بدل ما اسطل لي مبلغ 2300 قيمه ثلاجة منزل ويدوبها تأخذ 30 حبه ماء صحه ابو نص ريال
وبالعكس ثلاجه المنزل ام 2300 تكد 15سنه واكثر وصيانتها ولا شيء
الحمد لله الامور بخير لكن موردين ثلاجات البر ما ادري ليه قالعينها في السماء واستغلو الناس اللي تشتري
لو تفكر في الشغله ثلاجه الرحلات كلها
1- ترمس ابو 150
2- مواسير فريون
3- كمبروسر ومروحه وشوية اسلاك
وصلى الله وبارك على ايش هذا المبلغ
ولاني راعي طلعات بالاسابيع اغلب البشر كشاتهم من يومين الى ثلاث وبفصل الربيع والاجواء المعتدله قليل اللي يطلعون بعز الصيف للبر وانا منهم ولو كنت 24 ساعه في البر ماعندي مشكله اشتري مهما كان قيمتها
بالنسبه لي احتاج الثلاجه للماء وللطيور في المواسم ولي تجربه معها خلال الايام المقبله لموسم الطيور ان وفت ياسلام وان ماوفت ماهي بذيك الاهميه يعني لازم تثلج ههههههههه
بارك الله فيك يا اخي قناص على تعليقك على هذه النقطه المهمه بالنسبه لي وكان هذا ردي قلت
( حسب خبرتي المتواضعه )
وانت بإستفسارك اكدت لي هذا الشيء اللذي كان محل حيره كنت متخوف لتعطل الثلاجه او انفجار الفريون وهذا يشكل خطر لاقدر الله لتعطل الثلاجه اثناء مشي السياره
السلام عليكم ورحمة الله وبركاته
شريت ثلاجه مستعمله دورين (مثل الثلاجات الكبيره ) فريزر فوق وتحت براده .
ارتفاعها تقريبا متر (اصغر مقاس من هالنوع) .
المهم قمت بشراء كمبريسر صغير وقوته 75 وات وله اسم معين عند اهل قطع الغيار او رقم وهو ( 1/10) واحد على عشرة .
ويعتبر اصغر مقاس يباع عند هالمحلات .
المهم جرى اليوم تركيبه والثلاجه تعمل على 220 فولت وهي الأن شغاله تمام التمام بعد حوالي 7 ساعات شغل من اجل تجربة ان الكمبريسر الصغير اللي ركبته كتوليف ...راح يشغل ثلاجه دورين كان راكب عليها كمبريسر اكبر حجم من الأساسي .
بكره ان شاء الله او بعده راح اقوم بتجربتها على محول ( الف وات ) وراح اشغلها على بطاريه 8- امبير واشوف كم من الوقت راح تشتغل , واذا نجحت التجربه فسوف اطرحها هنا او في موضوع مستقل من اجل التوضيح بالصور ولمنفعة الجميع .
الى الأن تكلفة الثلاجه من الأثاث المستعمل (30 ريال ) على اعتبار اني شريتها وكمبريسرها خربان .
شريت كمبريسر مقاس ( 1/10) بمية وثلاثين ريال
وكذلك مروحة تبريد بقوة 7 وات ب 45 ريال
والتركيب 100 ريال
المجموع 305 ريال .
نقول البطاريه 250 ريال
والمحول مثلا 500 ريال
المجموع راح يطلع 1055 يا بلاش .
ثلاجه مناسبه .
انا متفائل بنجاح التجربه مثل اخي صاحب الموضوع
ولاكن اصبرو علي الين اتأكد من كل شي ثم راح نتابع من يريد تطبيق التجربه سواء عبر المنتدى او بالأتصال .
جايينكم ياالتجار الجشعين
الله يبيض وجهك يابو البر والله يرفع من قدرك مثل ما رفعت الموضوع ودعمته بتجربه وفكره غير مسبوقه وأنا متفائل جدا وأنتظر نتائج التجربه وان شاء الله سيفتح الله بها أبواب خير للناس فهذا هو المرجو من الابتكارات الي تسد حاجة الناس وتبعدهم عن جشع التجار ولهيب الاسعار
الفكره وأنا أخوك تجر فكره والحمد لله قطعنا مشوار طويل للهدف
انت تتكلم عن كمبروسر يستهلك 75 واط وهذا الشيئ بالنسبه لأهل المكاشيت يعتبر ذهب
لذلك انا متأكد ان الجميع ينتظر النتائج بفارغ الصبر وأنا أولهم وحتى لو حققت التجربه نجاح بنسبة 50 بالمئة فهذا بالنسبه لي نجاح
الله يوفقك وننتظرك
الذين يشاهدون الموضوع الآن: 1 (0 من الأعضاء و 1 زائر)