(استشارات مطبخ مكشات) أي استفسار انتسبوه هنا

[ls460]

السلام عليكم ورحمة الله وبركاته

ياحبي لمكشات وياحبي لكم بعد

المهم نخش ع السريع علطول

أي استفسار أي مشكلة أي سؤال عن أي طبخة اسدحوه هنا

من طبخ الذبايح(اطبخ إلى أربع ذبايح أنا مرة وحدة(قولوا ماشاء الله)

إلى كشنة الرز

والبيض

وحتى الحلى

اسألوا وأملي هو إفادتكم

رز

سليق

جريش

مرقوق

حميس

مقلقل

كودو

كلوب

بيض شكشوكة

خبز

زعتر

انتظركم يالأحباب

وأول سؤال إذا مانشط الموضوع بالاستفسارات هو :

أنت تطبخ الرز وغفيت عنه من جد واحترق وش تسوي وريحته نشبت في الرز وش تسوي ؟

وترقبوا كيف تطبخون بوقت قرب قدر الكاتم بقليل قريباً إن شاء الله وبدون الكاتم .

[أبو ستري]

الله يجزاك خير .
الحميس لو كان على لحم حاسي تحترق المقادير واللحم ما أستوى ..
هل من رأيك أسلق اللحم قبل ..؟؟

والإ عندك طريقة سحرية

[أبو ستري]

وأول سؤال إذا مانشط الموضوع بالاستفسارات هو :

أنت تطبخ الرز وغفيت عنه من جد واحترق وش تسوي وريحته نشبت في الرز وش تسوي ؟

اضع خبر داخل القدر ويشفط ريحة الحراق ..

[اخوكم بري]

طريقة عمل الجريش بالتفصيل لاهنت
الكمية اربع اشخاص

[ls460]

الله يجزاك خير .
الحميس لو كان على لحم حاسي تحترق المقادير واللحم ما أستوى ..
هل من رأيك أسلق اللحم قبل ..؟؟

والإ عندك طريقة سحرية

هلا أبو ستري هلا بك والله

اكيد تحترق المقادير واللحم ما نطبخ تدري ليه ؟!

لأني إذا طلعت مع شباب واستلموا الطبخ تلقاه كل شوي يفتح الغطاء ويشوف اللحم كل دقيقة او دقيقة ونص

الحميس يالغالي على لحم الحاشي (الصغير خرافي )

الطريقة كالآتي :

قطع اللحم بشكل طولي طول أصبعك الصغير وسخفه شوي أو على شكل مكعبات صغيرة وتسلق اللحم على موية بس لا تضيف له أي شيء(ملح أو بهارات) حتى يستوي .

وتفرغ الموية تماماً ثم تضع بصل (يفضل يكون أبيض) وفلفل باردأخضر وحبحر (فلفل حار) والطماط ابتعد عنه لأنه يغير الطعم إلا إذا كنت من هواته

واضف قليلاً من البهار والملح

قلب اللحم مع هالمكونات حتى تذوب شوي وبالهناء والشفا.

[عبادي البر]

مشالله علييك يا طباخ المنتدى
طريقة عمل الضغوط بالدجاج الله لا يهينك

[ls460]

أخوكم بري


تبي تطبخ جريش مرررة وحدة

ترى طبخه يطول

لكن ماعليه أنت شكلك مفتون فيه

إن كنت تريد تاكله في البيت في الرياض فلايردك إلا القرية النجدية عندهم جريش يحبه قلبك (خرافي )

أما إذا كان في البر فالله يعينك يبيلك تطبخه أربع ساعات

لكن نعلمك الطريقة

جريش (3/4) وفيه انواع والأفضل التركي وفيه واحد اسمه لقمتي

إن كنت تبيه أبيض ناصع البياض أضف له نصف كأس رز مصري

وإن بغيت على لونه الأشقر (الأصلي ) لاتضيف له أي شيء .

يلزمك في الحالة عين غاز+قدر يكون غطاه متراص مهب متعرفط من كثر الرزح والدبج في العزبة

أو صاجه إن كان بتطبخه على الجمر(بس هذي للمحترفين)

المهم وش يميز طعم الجريش عند الناس وإقبالهم عليه ؟!

شيئين اثنين هما اللون لا يصير أبيض (يحوم الكبد ) وشئ الثاني لازم يكون له حموضه

والحموضة هذي تجي من اللبن أو الجبن الحامض او اللبنة أو الخل والليمون أكيد

نبداأ العملية

بسم الله

افرم لك كمية لا بأس لها من البصل بشكل صغير جداً (البصل مهم للنكهة )

وخذ لك كمون

وليمونتين

وطلع حليب المراعي (اطن أنه الأحسن من ناحية الحموضة )

وكيف تخلي اللبن حامض ؟

هو أنك تطلعه من الثلاجة وتخليه يدفأ وهذا يرفع من حموضته ويخلي الحموضة مرتفعه(وهذي مناسبة لمن يحب اللبن الحامض أنك لاتخليه بارد وطلعه قبل الغداء بنص ساعة عشان تدوخ صح .

ويبغالك سمن أو ودتس

أو بالإمكان أنك تحمس لك لحم في قدر الجريش وتطلعه

المهم تكب اللبن في القدر وتخليه لين يسخن وانتبه ما تحركه لأنه بيتروب ويتكتل (يطلع له كتل )

واضف له الجريش لين مايغطيه اللبن

ومن ثم قصر على النار أكبر قدر ممكن وافصل بين القدر والغاز بصاج حديد (اللي كنه مقلى ومخرج من كل الاتجاهات شكله كنه خبر تميس محرووق )

وغط القدر بقصدير وفوقه الغطاء وخله يطبخ على نار هاااااادئة مرررررة

وافتحه كل نصف ساعة وحركه فيه إلى ان يتجانس مع اللبن واضف له الكمون والملح وعصير ليمونتين وإن اردته حامض اضف له جبن حامض أو خل

وخله إلى أربع ساعات

وترى الجريش كل مازاد طبخه زاد حلاوته ولذته

وبعد أربع ساعات جب لك حبحر أحمر يالله الجنة طويل ولا تفقشه انتبه واغمسه في الجريش إلى أن ينضج

وخله حول عشر دقايق

وجب لك مجرشة خشب وطلع الحبحر وابدأ اضرب بالجريش (قد تحتاج إلى تمليحه هنا بشوي من الملح )

واجرشه إلي أن تحس أنه تجانس ومن ثم حط عليه كشنة مسويها قبل أنت ببهارات وبصل وسمن

ومن ثم حطه في بوادي صغار(صحون صغار )

وبالهناء والشفاء

[نمر بن حثلين]

الله يقويك اخوي
عندي استفسار

مادري شلون اتصرف اذا طبخت اللحمه بالكاتم وفتحته عشان انكب الرز

وطلعت المرقه خانسه










وفتشت العزبه واثر ما فيها ملح !












وجيت اكب الرز واثر مافيه رز !















وجيت اشب الدافور اثر مافيه كبريت !














وجيت مرو وقدحتهن واثر الغاز مخلص
















وجا اعصار وطار بالقدر

















شلون اقدر اتصرف اخوي واكمل الطبخه ؟




المعذره اخوي حبيت امازحك وعجبتني فكرة الموضوع واقدم لك الشكر ومتابعين لاجاباتك ونستفيد منها

[اخوكم بري]

الله يجزاك كل خير كفيت ووفيت
وكل عام وانت بخير عقب الزحمه

[ls460]

اخوي أبو ستري


نعم صحيح

والأفضل أنك تقطع عليه طماط ني على شكل حلقات وتخليه فوقه فترة وتغطي القدر

طيب وإذا صار مامعك لا طماط ولا خبز ولاحتى بطاطس

افتش القدر وخل البخار يطلع منه على الأقل تروح ريحة الحرق

[ls460]

مشالله علييك يا طباخ المنتدى
طريقة عمل الضغوط بالدجاج الله لا يهينك

هلا أخوي عبادي يا حبيلك

المقادير:بصل +ثوم(على حسب الرغبة يكون مطحون ومفروح ) +طماط أو صلصة إن كنت من هواة الإحمرار +ملح+بهارات+ليمون أسود +دجاج مقطع انصاف (يعني الفخذ لاصق بالصدر)+إن أردت أن تضيف هيل او دارسين أو مسمار على حسب رغبتك)+رز.

الطريقة :تحمس البصل وتكب الدجاج عليه وتحمسه سوا وتضيف له الطماط (الطماط دائما مايطرد ريحة صناج الدجاج خصوصاً المجمد منها ) تقلبه جميع إلى ينضج الدجاج قليلاً .

تضيف ماء حار بقدر ما يغطي جنحان الدجاج الطافية . وتضيف الملح والبهارات والاضافات الأخرى مثل الليمون الأسود

تغليهن شوي .

ومن ثم تضيف الرز(بعد ما يتخمر بالماء وبعد غسله ) تغلق الكاتم ومن ثم احسب 25دقيقة بالضبط ستسمع أن صوت الغليان ذهب وبدأ صوت حسحسة عندها أنت لك خيارات .

إن أردت الرز معبط (كأنه سليق ) فانكبه على الأبلام علطول .

إن أردت جاف قليلاً أضف عليها 8إلى عشر دقايق وإن أردت أجف أكثر أصبر أكثر

بعد الانتهاء سقط حبحر إن أردت في القدر بعد ما تنسم للبخار ....

(فيه ملاحظة أن ما هما كانت النار قوية زادت سرعة نضوج الرز يعني قو النار باللي تقدر عليه البخار اللي داخل القدر بيمنع من الاحتراق ) ...

وبالهناء والعافية

ترقبوا دجاج بالكريمة بالبر أو دجاج بالجبن

وترقبوا طريقة عمل الكودو في البر


والمسلوقة مع خبز القرصان في البر

وطريقة عمل الرز النثري في البر

وطريقة الشوي (المحتكرة لنا )

[عبادي البر]

تسلم يالذيب والله يعطيك الف عافية على الوصفة الممتازة

والله انك فتحت نفسي على المضغوط وشكلي بروح لاقرب مطعم وادق لين يطلع من خشمي.\

وشاكر لك الطريقة

[ls460]

تسلم يالذيب والله يعطيك الف عافية على الوصفة الممتازة

والله انك فتحت نفسي على المضغوط وشكلي بروح لاقرب مطعم وادق لين يطلع من خشمي.\

وشاكر لك الطريقة

العفو ياعبادي

شكلي شغال هنا أشهوي هالعالم

المهم زين يطلع مع خشمك ولا يطلع من مكان ثاني

[مدور ربيع]

تسلم اخووي ... ماشالله الله لايضرك

الا الكودو وش سالفته بالبر <<< ( اول ماشافه يحسبه تسوي عرض لجهاز كنود )



ولاهنت اخوووي

بغيت خلطة قرص الجمر وطريقة تزبيطه بالبيت ( يعني بالمشب )

وشااااااااكرين اخوي لس فاكر احمممم قصدي اخووي ال اس

[::الرهيب::]

السلام عليكم...

والله إنك "قرم"... :d

يبغاااااالي رجعة,,,

راجع لكم إصبروا لاتاكلون... :d

أخوكم
الرهيب