اللي لة خبرة بالبوالين يدخل

[ذيبان_]

السلام عليكم

يا اخوان هل البالون خطير اذا انفجر او انسلخ ... يطير الرفرف مثلا ؟ ولا آمن

[المميـز]

:

اي كفر اذا انفجر او انسلخ يطير الرفرف الله يكفينا وياكم شر الكفرات

:

[كاتم الشكوى]

البالون الماكسس الفيتنامي يعتبر آمن
ولا يعرف البنشر
إلا دخل فيه شئ صلب مثل حديدة او ما شابه

[التعـ King ـديل]

البالون بشكل عام ماينفجر ولا يتصلخ مثل بافي الكفرات لانه نايلون كامل مافيه اسياخ

لذلك حتى لو نسمته على الجنط ومشيت عليه مسافه وعبيته هواء يرجع مثل ماكان وهذا من تجربه مشيت عليه حول 5 كيلو

ومره كنت مسافر ووطيت مسامير ضرب عندي كفرين طلعت المسامير وعبيتهم هواء ومشيت مسافه لين وصلت بنشر ورقعت الكفرين وكملت طريقي

[ناصح]

اعتقد خطورته في ضعف التماسك على الطريق

خاصة وقت الأمطار

[ابوفيصل5151]

السلام عليكم ورحمة الله وبركاته
كل موسم شتاء اركب طقم
البالون بشكل عام خطر قياده ولافيه اي امان على الازفلت
الحسنه الوحيده لايعرف البنشر في حاله يكون الهواء 20-25 فقط
حتى لو كان الكفر جديد قد يضرب عليك
اذا استخدام شخصي وفي موسم الصيف لا انصحك فيه نهائي .

[ابوفريحح]

ركب ماكسس ابوجمل ودربك خضر

[ببددررر]

من واقع تجربة إسواء كفر مر علي البالون من ناحية الاستخدام سيء جدا جدا ولايصلح للبر ولا الاسفلت نهائيا مدري وش اللي عجب الناس فيه عاد أهل الشاص البريمي معذورين بحكم الرزة ولا غيره لاشكل ولا استخدام

[الكدن1]

البالون شر لابد منه في البر ممتاز يخفف المطب ويريح السيارة في الاسفلت متعب بالصيف يحتمي مع السرعات العالية افضل كفر للمقاومات وامن كفر لتجريب السرعات العالية من حيث عدم الانفجار والبنشر لكن ثبات السيارة صعب لايصلح للتطعيس يحتاج مكينة قوية
هذا جواب تجربه

[شاق النفد]

البالون يصلح لموتر مايطلع من الخلا
ابشر بالرجه والثقل في الديرة
لاكن في الشعبان والصياهد رقم 1
ماتدري عن البطناج

[بدر الثوري]

لي الان سنتي استخدم البالون على ونيت سييرا
ولا لي نية اغيره ابد لاصيف ولا شتاء

اهم نقطتين في في البالون:
اعمل وزن كامل كفرات ومقصات اول ماتركب البوالين.
انفخ الكفر في اول اسبوع على ٤٥ او ٥٠ علشان يتمدد معك وبعدين ثبته على ٣٠

طبعا من مميزات البالون انه ما ينصلخ لان مافيه اسلاك حديد مثل باقي الكفرات

عيبه: قصر العمر، ماينرقع خارجي فقط داخلي وحراري



بالنسبة لسؤالك هل ينفجر او لا
الجواب: فيه احتمال ينفجر في حالة نفخت الكفر فوق ال٥٠ ومشيت على جلد او منطقة حجرية وهذي حصلت لواحد من الشباب

[المتلولس]

البالون مثل ماقلو الاخوان ميزته الراحه وممتاز بالحجرة وعذروبه الرجة و الثقل بالنفود وعمرة قصير

[متحدي النفود]

من تجربه البالون بالنسبه لي أفضل كفر ركبته من جميع النواحي لكن يعيبه قصر عمره

واعتقد أغلب اللي سبوه يملكون لاندكروزر او تويوتا بشكل عام

اللي معه باترول نادرا ما يسب البالون

أو اللي ما تعود عليه لانه تلعب فيه السكك حقت التريلات او اذا كان الزفلت سيء