هلا وغلا يابو جارالله عيدك مبارك
بالصراحه موضوع شييق جدا واحبيت اشارك معكم بهذا الموضوع
حيث اني من جيل حار جاف شتاء بارد دافي صيفا حالة الموج تدفق هواء ساخن بارتفاع مترين عن سطح البحر مغتدل الرطوبه ( تصدق عاد) اني مادريت ان للبحر سطح الا الحين وانا ماشفت فيه ولاغرفه وشلون يجي مدري
انا يابو جارالله لاحق على الجيلين
جيل الدنانه وجيل التتكنلوجيا اذا كان هذا مسماها صحيح حسب نطقي ومع ذلك انا افضل الدنانه على الوتساب حيث انها ادات ملهيه ورياضيه اما العاب الكمبيوتر ياخوي مافيه أي نوع من الرياضه ماغير الواحد يبني شحوم من الجلوس لساعات طويله البزر لاشفته تقول مثيله ضب معمر 500 سنه بهالجحر كل سنه يجدد جحره
اما بخصوص الزواج فالزواج من اول شختك بختك تشوفه امك وانت اللي تبي تعرس عليه
ولا سالت امك عنها هي زينه قالت راعية بيت تطبخ وتنفخ كني ابفتح مطعم
وتقول امك بعد تراها حرمة نشيطه يمه انا ابيها تطلع ابلك ورمل انا ابي وحده جميله فيها انوثه
اشعر انها زينه قالت وش تبي بالمايعه وع اتركه عنك ثم اذا دخلت عليها اذاهي زينه وبمواصفات امك مع الشغل والنفاذ فرحت فرح شديد اجتمع العسل مع الدبس
جنة (؟ )ثغب وثيل
والبعض اذا دخل وشاف زوجته قال بسم الله الله يقاصرنا ويقاصرهم بالاحسان بس الواحد يصبر ويحتسب الاجر ويعيش حياته اذا دخل قال باسم الله واذا طلع قال باسم الله ومايشوف شر
والجيل التالي يشوف زوجته بكامل المساحيق وادوت الزينه ويقول بس هذا جميله بالحيل وهي كلها معجون وسمكره لو تاكل مطب طاح كسرة معجون يعني غش بغش لاو التكلفه لاتقل عن مئة الف ريال وش تخلي وش ترقع وهو عليه ديون يقعد خمس اسنين وهو يسدد اقساط الدتسنين اللي شراهم لجل العرس ويقعد سنه حتى يتعود عليه ومع هذا يفطر من المطعم ويتغداء من المطعم وثيابك تغسلها عند الغسال وياحيلة الله مالك الاالصبر
واليامنها حملت وجابت ولد ردت بك ولا قلت شي قالت الله يخليلي وليدي انتم يارجال مالكم خاتمه طيب اصبري شوي لما يكبر وليدك ويشتغل انا ابكد عليك 25 سنه لم يكبر وليدك
اما حريم اول حلاه يجي تالي عزالله انهن يصونن الرجال لم تصير رجليه تقل سير مكينة بلاكستون منقطع ومع ذلك تتحول الى العطف والحنان وتهتم فيه اكثر واكثر وتقول ابونا هو راس مالنا الله لايخلينا منه
الله يرحمنا برحمته
اشكرك من جديد يابو جارالله على الموضوع والله يحفظك
مع السلامه
اخوك الصغير
ابو جلمبو