ارجوا الدخول والمشاركه لاهنتم ولكم من الدعاء

[حمدالعضيب]

السلام عليكم
ياجماعه عندي عشاء الخميس باذن الله
وناوي اخذ لي ذبيحه عنز كبيره في السن شوي وسمينه طلعا ذي رغبه الشباب اللي عندي
وبحطها في قدر ضغط عندي يتسع لذبيحه كبيره
وبيكون العشاء مرق ولحم فقط
اللي ابيه منكم
ماهي طريقه عمل مرق ماعمرهم ذاقوها افيدوني
ولو بعمل رز ماهي الطريقه

[معانق المزن]

وعليكم السلام

الي انت عازم شكلهم باكستانيين او افغان؟؟
مامرت علي شباب وطالبين عنز وكبيره بالسن!

[فهد الراشد]

ههههههههههههههههههههههههههههه
حلوه يامعانق المزن،
فعلا غريبه شلون شباب وعازمهم على عنز وكبيرة بالسن هههههههههههههههه
يارجل حتى الكاتم ما ينجض لحمه شلون عاد اكله،
نصيحه خذ لك تويس توه مفطوم، ويوفر عليك كانك تبي الرخص الغاز لأنه مايبي نار واجد وشكرا .

[ع العمرو]

شكلك تمزح مانت مسويها عنز وكبيرة بالسن هذي لو تشب عليه بخواثل ماكفاه وتبي تقعد بالقدر تقطق عليكم!! وتسمع سواليفكم وبعد ماتضيع وقتكم راح تتركونه ترجع للحوش حق الغنم سالمة غانمة! والله العالم.

( وهل فعلا شباب او!!)

[aalshamri]

موضوعك ماله اي قيمه ولا ارى طرحه في هذا المنتدى كرامه الضيوف ليس بمثل هذا الطرح الذي تم من قبلكم اذا كنت ما تعرف العلوم الطيبة اسأل شيبانك هم ابخص واترك شغل البربسة .

[أبوعبدالله الحربي .]

اتوقع انه مقلب بتسويه في خوياك

اعترف ياحمد

على العموم الراس صرفه لايشوفونه

[تزبطي]

والله انكم صراحه فيكم شوي قلت ادب

اكلتو الرجال بالتهكم واﻻستهتار ياللي ماتستحون صدز

يخوي الرجال عنده عنز ويبي يطبخها هو حر في
كرامته للرجال وتوجيبهم مانشدكم عن المواجيب والسلوم اصلحكم الله

اخوي طريقة المرق اطبخ اللحم طبيعي نفس الكبسه واذا قرب يستوي اللحم تفتح الكاتم وتلحقه الخضره


مثﻻ تبي تطبخ لحمة العنز وهي كبيره فوق رباع

عطها نار مدة 35 دقيقه منها عشر عاليه

ثم افتح الكاتم اوزن الملح اذا ناقص
ثم حط الخضره واكتمه وازعر النار حتى يتس ضعف النار وخله 15 دقيقه وبالعافيه عليكم


ولك اطيب تحيه

[O.162]

موضوعك ماله اي قيمه ولا ارى طرحه في هذا المنتدى كرامه الضيوف ليس بمثل هذا الطرح الذي تم من قبلكم اذا كنت ما تعرف العلوم الطيبة اسأل شيبانك هم ابخص واترك شغل البربسة .

يا اخوي وش دخلك فيه ام بغى يطبخ بقرره هو طلب الطريقه ما قال علمني سلوم المرجله والكرم
عندك حل للرجال وطريقه للطبخ ولا اسككت ماله داعي كلامك ذا

[مريقب العيفار]

الناس اللي ردوا على الرجال بتهكم مالهم داعي

هو طلب طريقة مرقة ما قال وش رايكم بالعنز

[امير المشاعر]

اخوي مرحبابك مابه خلاف دام ربعك قابلين فيها
المهم العنز يبيلها نار قويه وكثر من المحسنات مثل البهارات لاتخلي شي ماتحطه عشان الطعم
وفيه حاجه مهمه لحمتها بتكون سودا اذا معك مبلغ وقادر تشتري ابرك منها افضلك عشان تجملك عند اخوياك
وجعله عليكم بالعافيه

[باوزير]

لحم العنز قاسي و اذا كبير يطلع اقسى بس اذا تبيه يستوي خليه على نار هادية و يطبخ 3 ساعات ممكن يلين شوي

[مستر صحن]

السلام عليكم بحكم خبرتي السابقه ان اصحاب المطابخ السابقه كانو يضعون بندوال مع الحم وهو احد اسباب لي يجعل اللحم القاسي او الذبيحه الكبيره يجعله لين وانا قد جربته مع لحم الحاشي وضبط
تقبل مروري

[شقردي ون]

من افضل اللحم لحمة العنز اذا كانت عنز حايل
ماسمعتوا عن الحيل
الشاعر يقول
احدا عشاه القرص ومفطح الحيل***واحدا رغيد يلعط الكبد حره
والحايل هي العنز اذا حال عليها الحول ماجاها التيس

والله اعلم

[تزبطي]

من افضل اللحم لحمة العنز اذا كانت عنز حايل
ماسمعتوا عن الحيل
الشاعر يقول
احدا عشاه القرص ومفطح الحيل***واحدا رغيد يلعط الكبد حره
والحايل هي العنز اذا حال عليها الحول ماجاها التيس

والله اعلم

ههه اخوي شقردي
الحيل او الحاءل تطلق على جميع انثى ثديه ماتم تلقيحها من بهيمة اﻻنعام
عنز شاه ناقه بقره

هههه
وبالتوفيق

[الصيادالمليح]

مع ان الذبيحة غير مناسبة بسبب عمرها الكبير وصعوبة نضوج لحمها

ولكن عبي القدر ماء بحيث يغطي الذبيحة

و اطبخها بنار قوية لمدة 20 دقيقة وبعدها خليها نار هادئة و اطبخها لمدة 3 ساعات

و البهارات : ملح - كمون - 8 حبات هيل - 5 ورق الغار - 4 قطع قرفة - 15 حبة فلفل اسود - 3 ليمون اسود ناشف - حبة تمر

انتبه ان الملح لا تحطه بكمية كبيرة لأن الماء اذا تبخر بيتركز الملح في المرق