صوره لمطربه السر رووووووووووووضه

[دباس]

[المطروشي]

السلام عليكم والرحمة,
اشكرك يا دباس على هذه الصورة الروعة,
سؤال,وين هذه المكان.
شكران,
الخ المطروشي.

[الليث]

يعطيك العافية على الصوره

وياليت وضحت للاخوان موقع مطربة ومنطقة السر عموما

فهناك من الاخوان من يجهل الموقع


تحياتي

أخوك الليث

[دباس]

روضه مطربه تقع شمال ساجر بــــــــــــــــــــ 36 ك م بالقرب من بلده عين الصوينع الاحداثيه هـــــــــــــــــــــــــــــي 416ـ26ـ25ــــ837ـ26ـ044 ملاحظه انالست من منطقه السر لو يتفضل واحد من اهل المنطقه ويشرح الموقع كان تمام

[حفيد أبو الليول]

شكراً جزيلاً على هذا

الصوره يا أخي غير واضحة عندي ولا أدري ما السبب
هل هو من الصورة نفسها أو من جهازي

لك كل التقدير والدعاء
أخوك:
حفيد أبو الليول

[راعي عنيزة]

بارك الله فيك وكثر خيرك

وياليت تخبرنا عن المنطقه هل فيها فياض ثانيه لانها قريبه لنا وعنوتها سهله

وعندي ملاحظه بخصوص الصوره يبدو انك ما ظبطت الزوم
حاول انك تثبت ايدك وتخلي الهدف في نصف الشاشه واصبر شوي عشان الزوم يوزن نفسه ولا تنطح الشمس

وتحياتي لك يا غالي

[راعــي النــفــود]

السلام عليكم ورحمة الله وبركاته

اخوكم من منطقة السر وأعرف الروضة

يااخواني اللي بيمشي من الرياض طبعاً الوصف من الرياض

يطلع من الرياض على طريق الحجاز يعني من عند طلعة العريجا وبعدين يجيك مفرق الى ضرما خذ المفرق واتجه الى ضرما ادخل ضرما واطلع منها و اتجه الى مرات المسافه بين ضرما ومرات تقريباً 80 كيلوا متر
اذا دخلت مرات تجيك أول اشارة خذ معها يسار واطلع سيده واطلع من مرات وبعدين يجيك تقاطع المسافة بين التقاطع و مرات 35 كم تقريباً اذا جاك التقاطع اطلع يمين من عند التقاطع وابتل سيده تقريباً 10 كم وبعدين يجيك حرف تي اطلع يسار وابتل سيده الى ان يجيك مفرق يقول ساجر المدينة بريدة اطلع يمين طبعاً ابتل سيده الى ان يجيك حرف تي يعني تقريباً المسافة 30 كم اطلع بعد يمين تجيك قريه اسمها عسيله وبعدين ساجر وبعدين السكران وبعدين جفن وبحد جفن عين الصوينع تجيك الروضه يعني المافه بينها وبين ساجر بحكم ان ساجر اكبر قريه في المنطقه 35 كم تقريباً

طبعاً الروضة تجي يسار الخط

في المنطقه هناك النفود ممتاز ولا فيه احد مهوب مثل الثمامه هنا عالم

منطقة جبله بالقرب من ساجر 80 كم تقريبا الى صرت في ساجر اسأل عنها
منطقة جبله على اسمها جبال واشجار والى جت الأمطار تشوف الشلالات عاد

اما اللي في القصيم وبيجي لروة مطربه فهو من عند المذنب

وسلامتكم

محبكم


الساطع

[دباس]

اخوي الساطع اشكرك على الشرح الوافي بارك الله فيك

[الحلو]

وين هالموقع الجميل الله يعافيك ومشكور وماقصرت

[((( الحر)))]

تحياتي لاعضاء مكشات من اولهم الى اخرهم!!!

اسف جداً على انقطاعي !!!

مشكور اخوي دباس على هالموضوع وعلى صورك الحلوه لروضة مطربه!!!

وانا يالربع اكتب لكم ومابيني وبين هالروضة الا 10 كم!!!

ويعلم الله اني مصور 15 صوره لروضه مطربه قبل الاجازه ولاكن بعد ماطلعت الفلم من الكمره حطيته في درج السياره علشان احمضه وانزله في مكشات . والضاهر اني ماقلت انشالله وبعد ماجيب ابي الفلم ولا ايديني والخلاء يعني ضاااااااااااااع الفلم ، وهذا من مساوي كمرات التحميض ووالله يالربع اني متحسف عليه الى الان لان الروضه بعد الاجازه تغيرت شوي وقل الماء الي فيها . وكان الهدف من تصويري لها ان الربع يزورونها خلال الاجازه لاكن ماقول الا الله يعوض علي!!!

على العموم روضة مطربه ماعليها كلام وتعتبر معلم سياحي لمنطقة السر واغلب اهل القصيم وخاصة الشيبان يعرفونها لانها تقع على طريق القصيم الرياض القديم بعد مدينة المذنب وانت متجه جنوباً حوالي 45 او 50 كم بعد قرية عين الصوينع على اليمين وانت جاي من القصيم غرب الخط 500 متر والمدرسين الي من القصيم اكيييييييد يعرفونها!!!

وهي عباره من منطقة منخفضة تحدها حزوم من جهة الشمال والشرق والغرب ويحدها من الجنوب اشجار الاثل والطرفا الكثيفه والتي يمر من خلالها الشعيب المسمى باسمها( شعيب مطربه) وعندما يسيل شعيبها عدة مرات في العام يرتفع الماء فيهاالى حوالي الاربعة امتار في جهتها الشماليه. وهي بيضاوية الشكل يبلغ طولها حوالي 2 كيلو وعرضها 1 كم والنبات الموجود فيها والمبين في الصوره هو السعد او الحلفا ويبلغ طوله فيها حوالي المترين وتعتبر منطقة مناسبه للنزهه والكشته سواء بجوار الماء او بين الاثل ويوجد فيها طيور ماء كثيره تجذب الصيادين!!!

وحالياً فيها مياه وخضره تغطي الماء وهي تشابه حقول الارز فياليت الربع الي من القصيم يزورنها واكيد بتعجبهم اكثر من غيرها. لاكن هاه عطونا خبر حتى نقوم بالواجب!!!!

ارجو ان اكون وضحت الي يبين للجميع مايساعدهم على معرفتها ويشجعهم على زيارتها !!!

وحيا الله الجميع من ممشاكم لملفاكم!!!

اخوكم ((( الحر)))
11/1/1424هـ

[دباس]

او على طاري الطيور هذي صوره واحد من هالطيورالموجوده وتوجد انواع مختلفه من الطيور 1-1-1424 __________

[صاحب العقب]

[الأخ الفاضل دباس اشكرك على الصورة الرائعة وآمل ان توثق تاريخ الصورة والف الف شكر

[ابوفهـــــــد]

ابغى احداثيه مطربه الله لايهينكم ان كانت ربيع الآن وشكرا

[سعود مسعود]

0السلام عليكم ورحمه الله وبركا ته هذه اول مشاركه في هذا المنتدى العزيز
اما ما يتعلق بروضه المطربه فقد زرتها يوم الخميس الموافق 10-1-1424
ولكن هذه منطقه سبخه كريهه الرائحه ولا يوجد بها نبات ربيعي حلو
جميع النبات قصب مخيس وارض طينيه منتنه لا تستطيع الجلوس عليها
فهي اذا لاتستحق العنوه لذا احببت ان اوضح ذالك للجميع وشكرا

[ذيب البر]

السلام عليكم ورحمة الله وبركاته

أدري ان الرد متأخر ولكن للتوضيح فهذه الروضة زرتها مئات المرات منذ الصغر وحتى الان

لاني لي علاقة بالمنطقة ولكن يجب أن نوضح للجميع أشياء هامة

أولاً هي ليست روضة ولكن درج الاسم عند أهل المنطقة لاننا نسميها روضة من على وقت الشيبان

فستمر الاسم ولكن الصحيح أنها مجرد مستنقع مااااااااااااااااء فقط

وأنا اقول ان المكان جميل لأهل المنطقة فقط ولكن لا توهقون الشباب يعنون من الرياض ومن

القصيم من أجل مستنقع مااااااااااااااء يجب يااخوان أن نتحرى الدقة في النقل
ولا شك أن بجوار مدينة الرياض والقصيم فياض ورياض تساوي مطربة وغيرها ان اتفقنا على

أنها روضة ....... ومن أكثر من زارها أنا كما قلت لكم ولكن لقربي لها ولصيد بعض الطيور

أحياناً ولكن بصراحة ما اصدق ان الوقت ينتهي من الروائح الكريهة والقمامة اكرمكم الله


فأقول لك الاخوة خااااااااااارج المنطقة وبكل أما نة سوف أسأل عنها أمام الله طبعاً اقصد في

السنوات القادمة لان السنه هذي خلااااااااااااص المكان مجر د مستنقع مااااااااااء ولا يسوى

العنوة وضربة المشوار .