السلام عليكم ورحمه الله وبركاته
يالله تحييهم جميع وتوفقهم امين وتلبسهم ثوب الصحه وتسعد قلوبهم يا ارحم الراحمين
يقولي جدي الله يرحمه وميمتي وبيي وخيي ونا ونتم وكل مسلم
يقول منول انتم خابرين الدنيا جوع وخوف ولا هنا دنيا فقر في فقر
يقول فيه رجال مايملك من الدنيا الا غنمتين شياه يعني وقبله يسرح بهن في شعيب من الشعبان حول الديره ويهظل بالغنمتين المغرب ويحلبهن لعياله ماعندهم شي غير الحليب لعياله
ويجي يوم من الايام ويتماكنه المغرب وهو توه في راس الشعيب والديره باقي عليها وقت وياصلها المهم ويوم اذن المغرب ويتعفر وقام وربط الشاتين بحبل يجي طوله متر ونص الا مترين تقريبن يخاف يبعد ن عنه وهو يصلي
وكبر وبدا بالصلات وشوي ولا يسمع الغنم وراه فيهن حركه غريبه وهن وراظهره قال بينه وبين نفسه الله يدحرك يابليس والله مقطع صلاتي
وكمل صلاته ويوم سلم الرجال ويلتفت ورا ظهره ولا والله الذيب ملتف على رقبته الحبل الي بين الغنم وخانقاته وكل وحده تجر الثانيه يبي ينحاشن ضعيفات وثر الذيب دخل بينهن ولتف الحبل على رقبته ونتم خابرين منول كل اغلب الناس مايمشون الا في مخابيهم شبريه او مبرات سكين صغيره
وهو الي يطلع سكينه ويجهز عليه
سبحان منهو يحفض عباده ومن اتكل على الله كفاه سبحانه
السالفه الثانيه طال عمركم
انتم خابرين منول الناس مايعرفون الصراويل ولا الفنايل مهنا الا الثوب بس ولاكنا نسميه ثوب بعد نسميه مقطع
المهم والله يعينا على المهم
فيه فلاليح في نخلهم ونتم خابرين منول رزقهم من ربهم ياغنم ولا فلايح وقليل منهم تجاره هذي اعمال الناس منول بس
المهم الا جا عقب الظهر يرتاحون الفلاليح شوي لانهم من طلعه الشمس وهم يشتغلون
فيه واحد منهم رقد في حجره او غرفه حول القليب ونتم خابرين يصير فيها درايش وباب بس فاضيات مهنا درايش ولا بيبان بس محلهن
الرجال قيل و نام وخذه النوم وشوي ولاه يحس بوناسات
ههههههههههههه
ويصحي ولا العلم علم
وهو الي يحرك عيونه بس على تحت ولا وش يشوف ولاها داب يعني ثعبان طول ابليس ولاه يحس انه بالع كلش من تحت
وهو الي يسكت ولا تحرك لانه لو تحرك تبي تقرطه ويروح فيها
ويسكت الين ابطا على الباقين الي بدو الي يروس والي حصد العلف والي يحرث الارض
ويوم قالو وين فلان وراه مابعد قام من مقياله وشذا النوم
يافلان يافلان ولا يرد عليهم ويروحون يمه وهم ينادون عليه ولا يرد ويوم جو عنده ولاه يشر بعيونه مثل الي يقول شوفو الي تحتي
ويوم ناضرو ويبعدون عنه قال شايب منهم خلوكم بعيد وقاله الشايب انتبه تسوي اي حركه تراه يبي يقضي عليك خلك ساكن الين اشوف له حل
ويروح الشايب وياخذ له كسره جريد نخل او عسيب ويلف على راس العسيب قطعه قماش ويولع فيه النار ويوم ولع القماش وهو الي ينفخه الين طفت النار وصار بس يدخن
ويروح بشويش ويدخل مع وحده من الدرايش الي مافيها درايش
وبشويش وبشويش الين صار حول رجلين الرجال واخزياه بس يشوف كلش هههههههههه
المهم وبشويش ينفخ الدخان بين رجلين الرجال وينفخ وينفخ الين بدا الداب او الثعبان يتضايق من الدخان وبدا يطلع قش الرجال وهو بالع كلش
وشوي وشوا يوم فك الرجال وبدا يزحف يبي يبعد عن الدخان ويوم ابعد عن الرجال ولا الشايب يجهز عليه ويموته والحمد لله فك المسلم من شره
بس شوفو حكمه الشايب ودكم انها صايره فيذا الوقت كان يطمر الرجال من نومه ويروح فيها بسم الله عليكم من كل شر
عاد الرجال سبحانك ربي صابه البرص في قشه هذا كلامه هو لا تورطوني بعد
والحمد لله من قبل ومن بعد
عاد الله يجزاكم بالجنه ووالديكم ردو علي لا تقرون وبس تراي انقرالحروف بصبع واحد بس ويالله السلامه بعد جعل ربي يحفض ذا الاصيبع والله اني صادق ردو علي لا تخلوني
وفي النهايه اقول
سبحان الله والحمد لله ولا اله الا الله والله اكبر
عدد خلقه ورضا نفسه وزنه عرشه ومداد كلماته
سحاب - وهذا الي حصل من سنين مبطيات
رد مع اقتباس
المشاركة الأصلية كتبت بواسطة Daym
