الأخوة الأعزاء : بمنتدى مكشات ...
السلام عليكم ورحمة الله وبركاته وبعد:
مقدمة :
سبق لي أن أعلانة أنني سوف أقوم بمشاركة بالمنتدى وهي أول مشاركة عبارة عن رحلتي من الرياض - بريدة - قبه - سامودة - أم عشر - غرب الصمان ومن ثم العودة إلى الشمال ( سوف أخبركم السبب ) الحدقة - الأعيوج - لينه . وقد قسمت الرحلة إلى جزئين يحتوى كل جزء على التالي:
الجزء الأول:
( وأقولها لكم بصرحة أنني يوم عرفة الناس تسبح وتهلل وانا هواش مع المدام تدرون ليش بنت الحلال سراقة مني سكين أبو طير ( عمرها عندي 10 سنوات) يعني قبل زواجي بثلاث أسنين وتقولي نبي نقطع بها الضحية بالعيد.
لكن خويكم الزاجل ما تركها .
البر عنده اولى من الضحية ( لكن كفختن ورحت اشتري لها سكاكين وسواطير كأنك بمعركة "بالرمادي" ) عموماً قبل الفطور يوم عرفة كل شي جاهز من عدة وحطب وغيره .شكلي ثقلت عليكم انا عارف لكن أبدخل بالموضوع .
عيدنا مع الوآلد والوالدة بالمزرعة قرب البيت وأجتمع الأخوة والأخوات وتعرفون بعتبار أني شقردي أنا المدبر .
قال الوالد يالله وأنا أبوك أذبح والعيال يسلخون قلت أبشر وصار دوري فقط تقطيع الروس والتوجيه للشباب .
المهم خويكم الزاجل تبون الصراحة قلبه مع الباجيرو وفتوحاته المشهورة ومغامراته . بدأت أتصل على أخويا الغفلة . يحسبون أنني أعيد عليهم ما يدرون أني أشيك على أستعداداتهم لمعركة البلقان آوة أسف الصمان .لكنني صدمة من الإجابات السخيفة والعلث المنتهية المهم الأول قال أنا مستلم والثاني قال مسخن والثالث قال نروح أقريب وبدأة عندي ضيقة الصدرة
أخذت المعزبه والعيال وصلتهم لبريدة لأهلهم ورجعت للرياض بنفس الوقت زهقان ما أدري ويش اسوي .
رحت للأعمام مجتمعين بالمزرعة وجلتست معهم وخويكم الزاجل سرحان بتجهيز المعركة ساعة تجين فكرة أني أحط على الميمنة ( أزرق خطين ) أبو احمد والميسرة فلان والقلب طبعاً أنا لأنني القائد ثمن ما أدري إلا واحد من الأعمام يقول لي (قم صلح شاهي وين سرحت) ( ما يدري أنني مهموم بأن المعركة مع الصمان والدهناء قد خسرتها بسب أخوياء الغفلة .
المهم نمت أول العيد وأنا مغموم والطامة الكبرى جتني حلوم غريبة كلها بسب أخويا الغفلة (ما دريت إلا مذنا يأذن للفجر طبعاً أحلوى النوم وما قمت إلا على الإقامة ) قمت توضيت وصليت ورحت للوالده لعلها تحل بعض همومي ، وأقترحت عليها أن تخاوين لمعركة الصمان والدهناء لكنها أعتذرة وقالت أنت مجنون أحد يطلع بالبرد هذا وقالت لي "تدري أبي اصلح لك حنيني تعال بعد ساعه وخذه " قلتها يوه قصدي مامي تعرفين أحد من الجيران يخاوين ردت على أنت منك بصاحي .
بدأت أدور أحد يخاوين مسكة الجوال والله العظيم هذا الذي صار يا أخوان أول رقم دقت عليه تدرون منهوا طلع أبو زياد يحسب أنني أعايد عليه ما يدري أني أدور أحد يخاوين للمعركة الفاصلة بينى وبين الصمان رد على وقال متصل تبي أحد يخاويك قلت نعم تكفى قال أنا مستعد لكني أنا ببريدة مودي الأهل ( قلت جايك وآخذك ونطلع للبر للشمال ) قال ( موافق ) قلت له تدري أبي أسميك ( خالد بن الوليد ) علشان أرفع معنوياتك ونفوز بالمعركة على الدهناء والصمان رد على يضحك والله أنك منسم . ( ما يدري الضعيف أنني مهموم )
يوم جتني فرحة عضيمة ما بعدها فرحة ، ورحت أشغل الباجيرو استعداداً للذهاب لبريدة ، فجأة إلا خوينا أبو زياد يتصل قلت شكله يبي يغير أسمه من ( خالد بن الوليد ) (لأبي عبيدة بن الجراح)قلت خوينا شكله يبي أسم قائد من العشرة المبشرين بالجنة ، ومن أصحاب الشجرة ، المهم رديت على الجوال سم أبشر أبو زياد آمر تحتاج شي للمعركة من سيوف وتروس وغيره ،
ضحك وقال لي حولها ( يوم دخلني الماء ) قال أبي فراشي بالبيت قلت بس أبشر ، قال لكن البيت مسكر وما فيه أحد ، قلت يعني قال أما أن (تطمر أو تقمز ) "لغة قصيمية " يعني تقفز على الحوش وتجيب الفراش أو تشتري لي فراش ، قلت لا ياخوي أشتري فراش أصرف درت على محلات الرحلات مسكرة "عيد " المهم تدرون خويكم بايعها يبي ينتصر بالمعركة يبي ينتصر ، قلت الشكوا لله أبي أقمز رحت لبيت خوينا وجلست عند الباب إلا هذا بنغالي يمر فرحة قلت صديق تعال ( عيد مبارك ) رد عل ( شكراً ) قلت له حبيبي هذا بيت أنا ممكن تفتح لي الباب تدرون وش رد على قال ( أنت كذاب هذا بيت صديق أنا ) "يوم ودي أنشقت الأرض وبلعتاً " المهم راح البنغالي وجلست أنتضر الشارع يفضاء عشان أقمز على بيت أبو زياد ( خالد بن الوليد ) فضاء الشارع وقمزة بسرعة تمخشت يدي ورجلي لكن " المعركة" أهم .
فتح الباب وحصلت الفراش وجمب الفراش حطب أخذة منه شوي لازوم المعركة .
المهم ما أطول عليكم حملت الحطب والفراش وأنطلقت إلى بريدة وصلت إلى أقرب محطة بعد الرياض حصلت البنزيم متغير عبيت بسرعة طبعاً من الرخيص ويلتني ما عبيت من الرخيص . المهم كانت الساعة 12 ظهراً يوم الأحد الموافق 12/12/1427هـ ثاني العيد وصلت بريدة الساعة 4 عصراً
أحبائي نسيت أعلمكم وش سويت بالهمر H3 قمت قبل ما أحرك لبريدة تدخيله للبيت وقرأت عليه المعوذات و" أعذك بكلمات الله التامات من شر ما خلق" .
تدرون ليش ما اخذة الهمر للمعركة لأنه غير أصيل لا يعرف الكر والفر مثل الباجيرو " الله يخليه لي " حده شارع التحلية فقط أما المعارك تحتاج لأسود مثل الباجيرو .
الهمر H3 في عرينه
وهذي صوره من زاويه أخرى
وهذه صورة فرس القائد " الزاجل "
"
هذي عدة التصوير
الكانون D20 وعدساتها
وهذه عدة المعركة جاهزة
وهذه كذلك خرائط المعركة
المعذرة يا أخوان سوف أتوقف هنا -وأن شاء الله- في أقرب فرصة أكمل لكم المعركة ، لأنني كما قلت لكم " أول ما تتصل أمي الحبيبة " سوف أوقف الكتابة وروح اجيبها .
في الحلقة القادمة سوف أبين لكم تفاصيل خوينا أبو ياسر وش سوى من تجهيزات للمعركة من خضار طازجة ، وزنجبيل طازج ، وقرصان طازج ، " جميعها خاليه من الكيماويات "
تستحق الشكر لأنها لها دور بعد الله عزوجل في( لن أقول أنتصارنا بالمعركة أو خسرنا) لأنني سوف اتركها إلى الحلقات القادمة من حلقات (سواليف الزاجل والباجيرو )
في الحلقة القادمة سوف يكون الحديث عن :
- ماذا فعلنا في بريدة .
- أنطلقنا إلى الطرفية .
- أبا الدود ( أبا الورود )
- قبه .
- طريق سامودة الجديد.
- سامودة .
15 نوفمبر 2015 - 16:514 نوفمبر 2015 - 21:27
 |
رد مع اقتباس
