وشو اللي يطرد النوم بالخط نبي رايك

[ابن المهدي]

من واقع تجربتي اللي ما أنساها

التفكير في أشياء ممكن تشغل بالك

مشاويرك إذا رجعت من السفر
أشياء تحتاجها
مواعيدك
شؤونك المالية
مشاريعك


احياناً أشياء أخرى

مثل الخوف


ممكن تتخيل مواقف ... لو حصلت وش بتسوي


يعني خلي المعالج شغال ... على الآخر .... لاتنح

..............................

أيضاً أنا مثل ما قال أحد الإخوة

انز أقرب بقالة ... وادخل ... ولفلف ... واشتر حاجة ... وخرج فلوسك ... أكيد .. طار النوم


ورافقتكم السلامة

[جنتلمان نجد]

نسم الدريشه شوي ..وخل صوت الهوى يرفرف ..جربها وبتدعي لي ..

[سراب الصيف]

اللي ما يبي ينام يركب ددسن تطير النوم
يكفيك التنسيم

اسأأأأأأأأأأأأأأأأأأأأأأأأأأأأأأأأأأأأأأأأأأأأأأأأ أأل مجرب

مادرو عنه اليابان والا كان رافعين سعره

[ابوسعد]

اشكرك على طرح الموضوع ..

اول شي يعتمد على المسافه اذا كانت من اقل من 500 كم تقدر تمشيها مابين فصفص وعلك وقهوه وتمغط على جنب الطريق .

واذا كانت اكثر من 500 الى 1500 ماينفع فيها الى شي واحد انك تشوف مكلن امن وزين او في محطه وتغطك ساعتين ثلااث ساعات وبعدها توكل على الله وحالو انك ماتاكل اي شي .

على فكره المسافات الطويله مراح تئثر عليك اذا زاد عليك الوقت ساعتين او ثلاث ساعات ترتاح فيها لائن بعض المسافات يبيلاها من 15 الى 20 ساعه ..

[ابن موصل]

الله لاهينك على طرح الموضوع

إسأل مجرب ولا تسأل طبيب____ المشروبات كلها مضرة ما عدا القهوة العربية
والدويات بعد خاصة دواء بندر الله يحمانا جميع فكر والتفكير زين وإبدى بالوظيفة
وإن كنت موظف بالزواج وإن كنت متزوج فكر بالديون .
ولا في حل أزين مثل ماقال أخوي الحر ولاشريييييييييط محاااااااورة لصياف الحربي وخلف ومطلق الثبيتي عليه الكلام يسوى ألف محاورة من محاورات هاليومن
وتفاعل معه صدقني ماتنام كثرت الكلام عليكم عساك بدوي بس.

[المموه]

داوها بالتي هي الداءُ . اللي يطرد النوم بالخط هو النوم . لاتمسك خط الا وانت مكتفي نوم . كم واحد غمضت عينه وما رده الا الشبك .
الامر الاخر هو ان البعض حتى وهو مكتفي نوم اذا مسك خط ينعس يمل بسرعه خاصه اذا كان ملتزم بالسرعه المحدده وما معه رفيق يسولف معه . من سنين طويله وانا معي رفيق ما يمل حديثه واحيانا اهدي السرعه بزياده ما ودي اوصل المكان المقصود لين ينتهي حديثه يوسع الصدر الله يجزاه خير ( الشيخ عايض القرني) كل اشرطته عندي. بالاضافه للدكتور طارق السويدان . خذ قصص الانبياء وحياة الصحابه اكثر من ثلاثين شريط ان نعست او ضاق صدرك بالخط انا المسئول . راح تلاحظ الكيلوات تنخرط والوقت يمشي وانت تعبي معلومات وثقافه والاهم من ذلك ذكر لله وصلاة على رسوله عليه افضل الصلاة والتسليم .

[كن مع الله]

حبتين بندول وبايسن جرررررررررررررب
لاتفهمون خلط ياجماعة

[ابن المهدي]

كما قلت لكم سابقاً

من واقع تجربتي اللي ما أنساها

أنا ساكن بمكة

ودوامي في جدة .. ×××××

وعاد يوم في الصيفية الماضية

وأنا راجع من الدوام ( طريق مكة جدة السريع

طنت في راسي ألحق الشباب في أبها

ومافيها كلام

وصلت مكة على المغرب

الساعة 9.30 وأنا محرك

الساعة 12 ليلاً تعديت الطائف في طريق الباحة

صلاة الفجر كانت في تنومة

وصلت السودة الساعة 7.45 دقيقة

هذا كله .... وانا لوحدي

هذا وللعلم ... أول مرة أتعدى الطائف

ومع ذلك ولله الحمد .... مارمشت عيني

طبعاً الفضل يعود لله .... ثم بسبب الشاي العدني .. !!!!! ؟

والخوف من الطريق شي طبيعي
لأني كنت الوحيد في الخط ... حاجة تخوف


طولت عليكم ... آسف

-------

حرر من قبل المشرف ناصح

[ابن المهدي]

ونسيت بعد ما أقولكم

نا كنت ماشي على مهلي

وطوال الطريق والحمد لله ... وانا أردد .... اللهم هون علينا سفرنا هذا واطوي عنا بعده

[بن نويشر]

إذا حسيت بالنوم وأنا على الخط أقوم بفتح الشبابيك خل الهواء ينفخ نفخ .

[فتك111]

طلع راااااااااسك مع الدريشه والله الله بالفصفص والblack coffee وقبل كل شي دعاء السفر والتوكل علي الله وان شاء الله دربك خضر............

[مدالنظر]

تجنّبوا البايسون وشاكلته
لأنه بعد النشاط يصير مثبّط
ولاتسوى عليك ساعتين ولا ثلاث

كلش جربناه (تقريباً)
مامثل الوقفه والتمغط
يعني لايصير مشوارك (أبنص واحد)

الظاهر معاد ينفع إلا علاج الشاعر بندر بن سرور ههههههههه أمزح

ترحّم على الرجال

الله يغفرله ويرحمه وسكنه فسيح جناته ووالدينا وجميع المسلمين

[المربد]

من ما تعلمناه في دورات (القيادة الوقائية) ان تركيز الانسان ينقص بعد ساعتين حتى وان لم يشعر بالنعاس.
لذا يجب اقول يجب على كل سائق ان يتوقف كل ساعتين وينزل من السيارة ويمشي حول السيارة خطوات (يتمغط ) ويستنشق بعمق ويشرب بيالة شاي او قهوة، واذا حصل محطة يتوضأ فيها ويغسل وجهة ثم يعاود الركوب بالسيارة ويواصل المسير.
نسال الله ان يحفظنا واياكم ويكفينا شر الحوادث وما احدثت والارض وما احتوت

[هديب الشام]

اشكرك اخوي على الموضوع الطيب
نصيحة اذا معك عائلة لاتمشي الا وانت مفلل من النوم
اما علاج النوم اذا كانت مسافر ومستعجل وما عندك وقت تمغط وترتاح ربع ساعة جربته اكثر من مرة مفعولة سريع (( كيس لبتون ))حطه تحت لسانك كل ما حسيت بالنوم

[الحسكولي]

انا اقترح والله اعلم انك تحول رشاش المساحات على وجهك وكل ما جاك النوم خذلك رشقه هههههه .

والجد اللى مابعده مزح اني جربت كل اللي قالوها الشباب مانفع الا الفصفص ............. وسلامتكم