لخبراء الابل

[صلفان.نجد]

البعير هديته في النياق وضرابه طيب بالحيل,,,,,,,لكنه مايبي الفطير وهن مجسرات,,ومنعته من الضراب 5ايام وهديته لكن مايبيهن.
وش الحل؟؟؟؟؟؟
اعرضهن على بعير ثاني وهو يشوف؟؟؟؟وعقب اعرضهن عليه.

[مريقب العيفار]

جرب تلبسهن جنايب

[صريح المقال]

السلام عليكم ورحمة الله وبركاته ،،،

البعير هديته في النياق وضرابه طيب بالحيل,,,,,,,لكنه مايبي الفطير وهن مجسرات,,ومنعته من الضراب 5ايام وهديته لكن مايبيهن.
وش الحل؟؟؟؟؟؟
اعرضهن على بعير ثاني وهو يشوف؟؟؟؟وعقب اعرضهن عليه.

البعير يعاف بعض النوق وإذا عافهن مالك إلا تضربهن على بعير غيره ..

قد يكون من أسباب عدم رغبة الفحل فيهن ان النياق الفطير توك مشتريهن ويشوف باقي البل ما يبونهن وبينهم مناوش وسبحان الله البعير إذا شاف امهاته عايفاتٍ ناقه يعافها معهم !!

وأحيان يكون له موقف سابق معها يمكن عاضته أو شي خصوصا وهو صغير ..

ويمكن حوالهن مهيب زينه أو فيهن مشكلة إذا كان يشمها ثم يتركها ..

عندنا إذا عافها نجرب ثانيه بعد اسبوع إذا عافها خلاص ما نعرضها عليه ونشوف غيره ..


وأذكر موقف حصل مع ناقة لرجال أرسلها مخصوص عشان الفحل يضربها ويوم جت دخلناها مع البل وجلست البل تحارشها وجا بينهن عض وزعل وهذا شي طبيعي ما يتوالفن علطول المهم انه بعد يومين فكينا البعير عليها وهو يعافها مع انها مجسر وباركةٍ له من نفسها !
وجلست عندنا شهر كل ما فكينا الفحل عليها يعافها ولا يبيها وحاقدٍ عليها عشانه يشوفها تعض امهاته وخواته !!

وبالأخير أضربها بعير ثاني ولقحت عليه ..


وقد يكون الأمر مختلف وفيه أسباب نجهلها أخي الكريم ..


هذا ما لدي فإن أصبت فمن الله وحده، وإن أخطأت فمن نفسي والشيطان.

والسلام عليكم ورحمة الله.

[راكان745]

عليكم السلام

هذا يعافهن والعلم عند الله ع حسب كلام دكتور بيطري انه يشم معهن ريحه ماهيب زينه

واكشف عنهن ترا يمكن فيهن التهاب ويطلع منهن صديد لونه ابيض من عندن موخرها

والله يرزقك

[الخنفه]

ياخوي أكيد أن الفحل يعاف النياق الفطر لو هن مجاسير اذا فيه مع البل بكار مجاسير أو حيل
أذا البعير هدي وطبعه ماهو اقشر ولاهو أكله أنصحك تشبك عليه مع النياق الفطر وتخليه معهن اسبوع كذا بيضرب
أو انك تشبك عليه بشبك وكل ليلة تدخل عليه فاطر من البل شرط انه مايشوف البكار المجاسير قدامه .

[أبو علوى]

إحمد ربك إبلك مياسير و بعيرك يضرب

البعارين واجد اما أضربها بعيرك فيفزعولك العرب

[مجاهيم]

لا يكون حوله بكار ....