مطر ديم استمر لمدة خمسة وعشرين يوم على رفحاء ولينه والحجرة قبل 55 الى 60 سنه والمعلومة اخذتها من مصدرين
الاول خال لبوي يوم كان عمره 70 سنه تقريباً يقول رحت من رفحاء الى شعبة نصاب قبل دخول الشبط بيوم او
يومين والقى رفيق لي عنده غنم وبعارين وكانت ذيك السنه محل ولا جانا مطر حتى خروج المربعانيه قال يا ليتنا راحلينن لطريف
به ربيع طيب قلت له خلصت المربعانيه اطلب من ربك الغيث وخلك على الشجر قال بس الحجره يبيله سيل علشان تربع ما تروى من
الماء وسبحان الله يوم وصلت رفحاء وهي تستهل وتديم علينا حول الشهر واسبوع والبهم يشبع والفياض ما تشوف الا شوش السدر
والبعارين تعقل علشان ما تزلق بالطين
الثاني جار لي سليطي من عمام ابو عمر السليطي. يقول كنا بشعيب خثال ومع نقزت المربعانيه ديمت علينا لمدة 25 يوم او اكثر
ورحلنا للحجره حول زبالا وما تشوف الرظم من العشب وتمتلي الحزام من الكما يوم نشفت الارض وتربع ربيع بحياتي ما شفت مثله
وكان عمري حول 12 سنه ونشلع الزبيدي من تحت الرضم وماحنا مشفح مثلكم ما كنا نهتم له
وكنت دايم اكرر السالفه مع خالي الله يرحمه خصوصاً برحلاتنا الشماليه وكذلك مع جاري للذة اخبار الربيع والكما
والان ثبت ان شرط الوسم ليس ضروريا لخروج الزبيدي فالمطر استهل مع دخول الشبط
والان ارجو من اخواني الختصين مساعدتي في تحديد هذه السنه الطيبه خصوصاً انهم ذكروا عدم نزول المطر حتى نهاية المربعانيه