سالفة الرجال العصبي والشغاله (( النبهاني ))

[النبهاني]

السلام عليكم ورحمة الله وبركاته
اليكم هذي السويليفه
عسى تجوز لكم

هذي سالفة رجال عصبي . طبعه كذا الى دخل البيت دخلت معه الصجه واللجه وتعودوا عليه اهل بيته
ام عياله وعياله صارعندهم صقع البيبان وجدع المواعين شبه يومي ويحوسهم عند ادنى شي مرت الايام
وجابو شغاله وبعد شهر من قدوم الشغاله حدث بالبيت امر كبير وغريب الا وهو تغيير جذري في طبايع ابوهم
وانقلب 180 درجه وصار دابة سليمه وش حليله اصبح منطوقه سموا وش تبون وغدا الرجل المنشود
يوديهم للي يبون ويجيبهم ويسولف ويضحك معهم .
ام العيال شكت بالوضع وراحت للشغاله وقالت ابو العيال ماتغير الا من بعد ماجيتينا انت وش انتي مسويه له علمينن
ولك اللي تبين وان ماعلمتينن والله لافضحك واكب عفشك . قالت الشغاله لا ياماما انا اوريك كل شي الحين ..تعالي
وراحت ام العيال مع الشغاله لغرفته وقالت شوفي ياماما
وش شافت ام العيال تدرون.. شافت صورة ابو العيال مثبته بدولاب الشغاله وكل وجهه دبابيس وانهبلت وانصدمت الام وصاحت بوجه الشغاله هذا حرام ومايجوز حسبي الله عليك وتقوم وتشيل دبوس من الصوره على دخلت ابوالعيال وهو يصقع بالباب ويدخل المطبخ ويقعد يزعق ورا الترمس مابه شاهي لا بوكم لا بو من جمعكم ام العيال . انقلب الحليل ؛ الضعيفه رجّعت الدبوس للصوره والرجال مازال يحوس ويدوس بالمطبخ قالت الشغاله خلاص ياماما الشغل خراب وراحت ام العيال بسرعه للمستودع وتخمط له كم مسمار وتلقط المطرقه وهي تركض وتقعد تطق من هالمسامير بالصوره لين تكسرالدولاب لكن مافيه فايده وتجي لبوعياله وتمسكه وتقوله تعوذ من الشيطان واسمع السالفه .. وتعلمه بالعلم وهو يتعوذ من الشيطان ويتحسب الله ويذكر الله ثم قال لام عياله هالشغاله ماتبات الليله بالبيت ضفي عفشه خليني الحق على المكتب .. وفعلاً قلع الشغاله على طول ورجع لبيته وقام يتعوذ بالله من الشيطان ويكثر من الذكر حتى اصبح مطمئن . وبيته وعياله يعيشون باطمئنان .........
أليس بذكرالله تطمئن القلوب ....... تطمئن البيوت ...... تطمئن الحياة .
لا اله الا الله
انتهت السويلفه غفر الله لي ولكم ولوالدينا وللمسلمين والمسلمات


لكم كل الود من محبكم
النبهاني

[قوافي ( أم نهار )]

وعليكم السلام ورحمة الله وبركاته
حياك الله ابو جار الله
اعوذ بالله من شر شياطين الارض وكفانا الله واياكم والمسلمين شرهم..
لا اعتب على العماله بقدر ما اعتب على من اتى بهم
عشنا سنين وشهور وايام وتجوز الحياة بلاهم
اصلح الله احوال المسلمين
الزوجين هم اساس المنزل واذا اعتل اعتلت اموره واختلت موازينه
ليت كل من تكبر بمنزله او تكبرت بمنزلها يعلمون انهم طرف لحياة جديده لأبناء وبنات وعليهم مخافة الله بكل كبيره وصغيره ..
جزيل الشكر ابو جار الله فالقصه وان كانت عدة اسطر لكن فالحقيقة معجم وقاموس متفرع لعدة لغات اسمها الحياة..
تحياتي وتقديري واحترامي

[سفير القدس]

حسبي الله ونعم الوكيل

[Al3rands]

اعوذ بالله من شر ماخلق سوالف الشغالات واجد بس خفوا بعد روحة الاندنوسيات جن الاثيوبيات ايده والساطور الله يكفينا شرهم