برميل المندي الكهربائي- المزين.. هل يصلح للكشتات؟

[Huss-Fj]

سلام عليكم يالمكشاتية..
بالنسبة لبرميل مندي المزين الكهربائي او ما يسمى واقعياً بفرن للمندي.. لان المندي الأصلي بدون جمر وحطب ومرخ مهوب مندي..
لكن عجبني استغلال الوقت والجهد وتسوي شي يجمل للزقرت..بدون حطب ولا غثاثة دفن ولا شي
..
هل من الأمان استخدامه ب إستمرار للكشتات؟
علماً ان قوته 1000 واط (المقاس الصغير) وحسبت عدد الامبيرات المستهلكة لاستخدام ساعتين (وقت طبخ المندي)
طلعت بقرابة 5 أمبير..طبعاً يحتاج محول كهرب قوي وسعته قوية..(يفضّل من 2500 واط وطالع)
هل فيه مشكلة ع البطارية لو تم استخدامه بكثرة في كل كشتة!؟
علماً ان البطارية إضافية وليست الاساسية..
وفيه ناس جربوه لكن تجربتين ولا اعلم كرروها او كانت مرور الكرام.. طبعاً الي جربوه تَرَكُوا السيارة شغالة لمدة ساعة و 40 دقيقة الى ساعتين (وقت الطبخة)..
..
بطرح السؤال بشكل ثاني..
هل فيه احد منكم شغل اجهزة كهربائية ع بطارية إضافية بمجموع قدرة الواط فوق او يساوي 1000 واط؟ وهل ضر بعمر البطارية؟
...
اتمنى مساعدتكم وعرض تجاربكم

[rahall]

1000 واط استهلاك عالي جدا ولا بد من تشغيل السياره وقد يؤثر على البطاريه والدينمو
وفوق هذا كله لا بد من توصيل المحول بالبطاريه مباشره

[الرحال2222]

1000 واط كثيرة اشوفها
صعبه اغامر بالسيارة وانلطع بالبر عشان مندي
خذ اللي ينقلب على الذبيحة وبالغاز شفته عند احد الزملا وعجبني مشكلته الحجم

[ابو وليد 444]

انا جربت الحجم الوسط على محول 3000 w المشكله انه يفضي البطاريه وتضطر تفصله شوي وتشغل ثاني الحل دينمو اضافي ولا السيارة عادي تكون شغاله بس دينمو ثاني عشان يعوض البطارية

[منتعش]

أذكر أني كلمت الأخ بسام المزين صاحب البرميل
وقال يوجد محول للبرميل الصغير فقط 3000 واط
واسمه سونيك وبرفقة رابط المقطع

[fahad-k6]

انا جربته ما ينفع فضت البطاريه وخليت السياره شغاله وبعد نصف ساعه فضت البطاريه وشركناها بسياره ثانيه وخلينا السيارات شغاله لين خلص المندي
نصيحه لا احد يسويها