ابطلع بكره للبر وابيكم تعطوني مكان زين وفيه ضبان؟؟

[نجمة سهيل]

السلام عليكم ورحمة الله وبركاته كيف حال الشباب .اقول ياشباب ابطلع بكره للبر وودي تعطوني مكان فيه ضبان وربيع .وانا كنت طبعا مقرر اني اروح للدهناء .بس حبينا نشارككم .وقلنا خلنا نشوف الاماكن الي بيعطونياها بس ياليت تكون فيها صيد ((اقصد ضبان ووز و....)).وشاكرين لكم حسن تعاونكم((صارت مدرسه))))

[ابو سلطان العتيبي]

أخي نجمة سهيل

وعليكم السلام ورحمة الله وبركاته

أخي اذا بغيت وقت صيد الضبان فهو بعد شهرين من الآن بعد ماتسمن من العشب أو من الشجر.

وتحياتي لك.

[شاص]

وكلام أخوي عقاب على متمه الضبان باقي لها حدود الشهرين أو أكثر شوي وقت الكنّه إن شاء الله إبشر بالضبان الطيبة..

[الحُمَيدِي]

ما قصرت يا الأخ عقاب

أرجو يا نجم سهيل الصبر أو إعطاء الضبان مهلة حتى يمديها تسمن
ولو انك ابخص يا نجم سهيل الله يعطيك ألف عافية


و إذا جاء موسمهن ابشر باللي يوديك موبس يعلمك المواقع ؟

اسلم عليكم كللللللللكم ....................

[نجمة سهيل]

حياكم الله ياشباب ومشكورين على هذا الرد السريع.
بالنسبه للضبان انا عارف انه باقي عليهن بس بلاكم ماتدرون ليه انا ابي اروحلهن. انا ياطويلين العمر شاري بندق ام خمس رمينغتون وابي اروح اجربها .فلذلك طلبت منكم مواقع والا المواقع الحمدلله عندي وااجد بس قلت يمكن انهم يعطونا مواقع غير الي نعرفهن.وفي النهايه اشكركم وماقصرتوا.

[الهلالي]

بسم الله الرحمن الرحيم

الأخ العزيز نجمة سهيل
لا يمكن أن تكون جادا في الرد السابق
مستحيل . أنت لازم تمزح

[نجمة سهيل]

ههههههه فهمت عليك يالهلالي .اذا كان قصدك الضبان مايصلح لها ام خمس . فترى معلومتك خطأ واذا كنت ماقد جربت رمي الضبان بام خمس فهذا شي راجعلك.انا عارف انه افضل شي للضبان الخرازه بس يخوك الخرازه بس الاهل ماوافقوا نشري خرازه عاد تعرف يخافون علينا تونا صغار . وانا ماخذ ام خمس لانها تصلح لكلش . فصحح معلومتك اذا انت تحسب ان ام خمس ماتصلح للضبان.

[ذيب الصحراء]

هل خلقت هذه الحيوانات لتجرب عليها الرمي ومن ثم ترميها هذا أخي لا يجوز شرعاً ، لعل من لديه فتوى تحريم هذا العمل يضعها أمامه .

[الحُمَيدِي]

يسعد صباحك .... يا كل من هو موجود

كيف حالك يا ذيب الصحراء ؟
إن شاء الله تكون بخير ؟

أخي وعزيزي "ذيب الصحراء" إعلم حفظك الله ورعاك أن كل شيء له حدوده
والأصل في كل شيء الحل .
أولا: انت الآن تسأل بمن يفتيك , وقد افتيت حفظك الله .

ثانيا: لاتكن متسرعاً في اصدار الفتيا , إذا كنت من أهلها .

وانا معك في ان التجاوز في كل شيء لا يجوز قطعاً , لكن كعموم الصيد ليس فيه محذور إلا عند تجاوز المعقول بحيث يصل الى الصيد الجائر والإبادة.
لكن انتبه ان تقول (هل خلقت هذه الحيوانات للتجربة ؟) وتنسى ان الله أحل الصيد , فقال عز من قائل وأحل لكم صيد البر والبحر).
وأشكر لك تعاطفك لهذه الحيوانات ورحمتك لها , لكن بأسلوب أجمل تستطيع اقناع اهل الصيد الجائر بالتخفيف , أو أهل الصيد عموماً بالرأفأة والرحمة لهذ الحيوانات , قال رسول الله صلى الله عليه وسلم ارحموا من في الأرض ,,,, يرحمك من السماء ).

وآسف ,, ثم آسف ,, على الرد القاسي مني , وآمل عدم المؤاخذة ,, فإن أصبت فمن الله , وإن أخطئت فمن نفسي والشيطان .

والسلام عليكم ورحمة الله وبركاته ....

[المسفهل]

تصحيح للآية أحل لكم صيد البحر وطعامه متاعا لكم وللسيارة وحرم عليكم صيد البر ما دمتم حرما واتقوا

الله الذي إليه تحشرون ) .

[الهلالي]

بسم الله الرحمن الرحيم

السلام عليكم ,, ورحمة الله وبركاته

الأخ العزيز نجمة سهيل.هداك الله لم تفهم ماعنيته

إن ما أعنيه هو عدم جواز إتخاذ الطيور والحيوانات ( كنيشان) للتصويب .أما أنا فلا أميل إلى صيد الضبان . وأسلم لأخيك (العود) .

الأخ ذيب الصحراء أنت فاهمني صح

[نجمة سهيل]

حياكم الله.اخواني انتو مافهمتوا علي الله يهديكم وتسرعتوا بالاجابه.انا قصدي باني اجربها ابي اروح واصيد لي الي مكتوب لي اصيده واكله من قالكم اني ارميه او اني اسرف فيه .بل بالعكس انا اخذ قدر حاجتي منه وانا قصدي اني اجرب البندق يعني اشوف رميها هل هو زين او لا.وانتم الله يهديكم تسرعتوا بالاجابه.