سحاب من سنين مبطيات والكلب البو ليسي

[سحاب نجد راعي شقراء]

السلام عليكم ورحمه الله وبراكاته
يالله تحييهم جميع كبيركم وصغيركم وليا حيا كثر وتنثر
هذي سالفه صارت لي من مووووبطي


صارلي سالفه من مووووبطي كان عندي استراحات اروح وجلس فيهن ووسع الصدر
ويجي لمي واحد من الربع ومعه كلب بس هذاك ذيب امعط وقشر
وقالي ياسحاب تكفا ابا اخلي ذا الحبيب عندك الين ارجع من السفر والرجال مدرب لعبه الملوك الكنق فوهذا انت ياالرجال وهي ممنوعه في السعوديه وكثير من الدول علشان خطورتها وهو متعاقدين معه نادي في بريطانيا المهم ماعلينا منه
المهم قلت له ابشر بس اربطه بسلسلته لياه ياكلني قالي ابشر وجايب معه اكله في علب بعد مهوب ياكل اي شي
وقالي ياسحاب حافظ عليه تكفا تراه يبي عنايه كنه ناقصني وقالي لاتحسبه رخيص تراي شاريه ب 8000 ريال قلت طيب وسافر الرجال
ويوم جا ليله خميس يوم الخميس له كار وهلحين صار مثل غيره
المهم يوم جا ليله الخميس ويام صيف وحر رحت للاستراحه لحالي كلن معزوم المهم سولت لي نفسي اني اسبح وقلت حر وبي وناسه وطبيت ماعلي الا حق السباحه
تراي اكذب علي اوميك
ومن طبيت والكلب بقواشي ينبح علي وزعجني وقمت ارشه بالماء وثره مايواطني خلقه ويوم رشيته ثانيه وينهبل ويطامر بقوا شي تدرون وش صار انطلق من سلسلته ثمن قالي تعال ابيك ويصير يدور على المسبح ونا ادور معه جاك الموت ياتارك الصلاه
اين المفر ياسحسح ترا سحسح اسم الدلع ههههه المهم ميت ميت بس مع وين تبيه يبدا
وتبون الصدق ساد وبرك علي بعد رحت ارشه مره ثالثه وهو منطلق
تدرون وش صار طب علي في المسبح
وصارن عصيقيلاتي مثل المراوح بسم الله علي عظيم اسمه وطلع من المسبح وزلق وطيح ونا اقول لنفسي تبي تموت وقف
ولا ادري وين اروح وطلع ابن الكلب ولحقني وقرب مالي سلم حديد وطلع على سطح الملحق تصدقون انه يحط يديه على السلم يبي يرقا
اسمه جعل السم يطلع من عيونه - جون -
ونا بالحالي في الاستراحه وجنبي استراحه فيها عوايل وخاف يحسبوني اطل عليهم
ونا وصريويلي اساحره ياجون ياجون وسبحانك ربي مايبيني اطري اسمه ينهبل هذا الا قالو الكره من اول نظره
المهم حر وليله خميس صارت حميس
ولا معي جوال مامعي الا صروالي بس وحتري وحتري لعل فيه احد يمر على سحسح وش عليكم مني ادلع نفسي بسحسح ههههه حتا لو مر احد مقدر افتح له الباب تدرون وش صار من الساعه يمكن 10 الين من بكرا الضحى ونا مطمن وساحره كوده يعقل
وحميت الشمس وميت ضما ايام صيف صايف
ويفرجها الله علي ولا هذا واحد من الربع ويوم طق الباب وويق عليه على استحياء وقلت له جابك الله قالي عما عما وراك مفصخ وعلى سطح الملحق وقلت له انا منهبل وبي شهار ولا مطرق على سحله راسي بعلامه صليب

وقالي وراك ماتحول وتفتح الباب قلت لو يطلع ابوي من قبره ماحولت وقالي وشلون ادخل قلت لا تدخل ليتك تويق وتشوف اسد منطلق علي وقلت له تدري اني على سطح الملحق من البارح ويقرب سيارته ويرقا عليها ثمن قالي وجع وشذا قلت وش تشوف وشو الي وشذا هذا كلب فلان مسافر وجابه عندي
وقالي وش نسوي فيه ماينقرب قلت سوات ربي ابرك ثمن قالي اصبر اصبر شوي بس ويحول ويطلع مسدس من سيارته ثمن رقا وقالي وش رايك قلت الراي رايك انت ونا احسبه على شكله رفيقي وهويدي مادريت انه مهبول الا ذاك اليوم
وقالي هذا يبي يموتك ولا نموته قلت سو الي تبي والله يعيني على الاقشر راعيه الا جا ومادريت الا وذا المنهبل ويطلق عليه خمس طلقات وكلهن في الراس اثره وقيع مادريت ويموت جون جعله في النار وحول وفتح الباب وقلت له غمض عيونك الين البس
وقالي بس عرفت وش فيه الكلب والله لا يلومه لو ينتحر قلت ليش قالي اثرك متفصخ عنده اكيد انه قال هذا غورلا وروعته
وفي النهايه مااقول الا
الحمد لله وسبحانالله ولا اله الا الله والله اكبر
عدد خلقه وزنه عرشه ومداد كلماته ورضى نفسه

[قوافي ( أم نهار )]

وعليكم السلام ورحمة الله وبركاته
الدنيا مواقف وموقفك من اللي لا عادة عليه من يوم
الحمد لله عالسلامة ولا تامن للي ماربيته
جزيل الشكر ابو نوره
تحياتي وتقديري واحترامي

[سحاب نجد راعي شقراء]

وعليكم السلام ورحمة الله وبركاته
الدنيا مواقف وموقفك من اللي لا عادة عليه من يوم
الحمد لله عالسلامة ولا تامن للي ماربيته
جزيل الشكر ابو نوره
تحياتي وتقديري واحترامي

هلا ومليون مرحبا ومسهلا بختي قوافي الغاليه

تدرين يالغاليه انا الي محارشه بس لوه مهوب ينابح كان ماصار شي
بس ادبني صحيح وصارت درس

وجعل والديك للفردوس ونتي معهم ووالدي ونا وكل مسلم امين يارب العالمين

[صريح المقال]

السلام عليكم ورحمة الله وبركاته ،،،

أسعد الله أوقاتكم بكل خير ..

هو صدز أنت سحاب رفيدزنا ؟!

الحمد لله على السلامة .. فاقدينك من عقب مويضيعك الأخير ما رديت عليه ولا عاد شفنا لك زول ولا سمعنا لك حس مدري وين أنت غاطس

شكلك مع الأمطار والحيا كثرت طلعاتك مير عطنا علوم الحيا في ديرتكم يقولون جاها سيل ما شاء الله تبارك الرحمن مبطي ما جاكم مثله

وقالي ياسحاب حافظ عليه تكفا تراه يبي عنايه كنه ناقصني وقالي لاتحسبه رخيص تراي شاريه ب 8000 ريال قلت طيب وسافر الرجال

يالله لا تعاقبنا .. هو ما يدري انه ما يجوز بيع كل ذي ناب ؟!

ويومه مشتريه بذا القيمة وشو عشانه ؟

انكان انه يبيه حراسه ورا ما خلاه يحرس محله وهو مسافر يجيبه يبلشك فيه وشهو له ؟

تراي اكذب علي اوميك

أنت وش تقول وراك قلبت فرنسي ههههههههههه

وتبون الصدق ساد وبرك علي بعد رحت ارشه مره ثالثه وهو منطلق

هذا لا قالو يحرث على مذبحه هههههههه

ولا ادري وين اروح وطلع ابن الكلب ولحقني وقرب مالي سلم حديد وطلع على سطح الملحق تصدقون انه يحط يديه على السلم يبي يرقا

فكك الله منه ولا بغيت تروح طعام جحوش

ماش مامن ذهانه ذا التسلب ولا رقي الدرج سهل مير علم رفيقك يعلم كلبه الجديد وشلون يطلع عشان المرة الثانية ما يبلش يمكن يطبح عليهم حرامي ويطلع فوق سطح الملحق مثل سواتك

ولا معي جوال مامعي الا صروالي بس وحتري وحتري لعل فيه احد يمر على سحسح وش عليكم مني ادلع نفسي بسحسح ههههه حتا لو مر احد مقدر افتح له الباب تدرون وش صار من الساعه يمكن 10 الين من بكرا الضحى ونا مطمن وساحره كوده يعقل
وحميت الشمس وميت ضما ايام صيف صايف

لا إله إلا الله .. والله انك في موقف ما تحسد عليه ما توقعت بتجلس كل هالوقت !

الحمد لله يوم الله فكك منه هذا لو يمسكك يقطعك بسنونه تروح مقلقل لحم في خمس دقايق

ويفرجها الله علي ولا هذا واحد من الربع ويوم طق الباب وويق عليه على استحياء وقلت له جابك الله

صدقت جابه رب العالمين وما بعد الضيق إلا الفرج والحمد لله على كل حال.

وقالي وش نسوي فيه ماينقرب قلت سوات ربي ابرك ثمن قالي اصبر اصبر شوي بس ويحول ويطلع مسدس من سيارته ثمن رقا وقالي وش رايك قلت الراي رايك انت ونا احسبه على شكله رفيقي وهويدي مادريت انه مهبول الا ذاك اليوم
وقالي هذا يبي يموتك ولا نموته قلت سو الي تبي والله يعيني على الاقشر راعيه الا جا ومادريت الا وذا المنهبل ويطلق عليه خمس طلقات وكلهن في الراس اثره وقيع مادريت ويموت جون جعله في النار وحول وفتح الباب وقلت له غمض عيونك الين البس

بيض الله وجهه .. هالكلب لو انه منطلق على صغار ذبحهم ما أمداهم ينحاشون منه !

واضح ان عقله مهوب مضبوط وفيه وحشيه زايده .. إلا اذا انت مسوي له شي ثاني ولا مجوعه ترا جوعه حار يمكن يبي ياكل منك شوي يسد جوعه بس

وقالي بس عرفت وش فيه الكلب والله لا يلومه لو ينتحر قلت ليش قالي اثرك متفصخ عنده اكيد انه قال هذا غورلا وروعته

عاد هذا كلام رفيقك هو أبخص منا بس تكفى لا عاد تسبح مرتن ثانية إلا تحت الدش

.
.
.



على طاري ذا السالفة تذكرت سالفةٍ يعلمني فيها رجال يقول رحنا لواحد في مزرعته ومعي واحد منيب أعرفه زين متعرف عليه بسوق الحمام بعت عليه وشريت منه وقلت له في رجال بأشتري منه حمام وودي تشوفهن معي قال ما يخالف ..

المهم (والله يعينا على المهم) دخلوا عنده وهم يمرون في طريقهم لشبوك الحمام بكلب رابض ومفكوك بس معهم راعي المزرعة ناظرهم ولا شافوه ولا قال شي ويوم خلصوا ويطلعون للمجلس خذو لهم فنجال وطلعوا برا بيمشون كل واحد بموتره جاي

يقول ومير يقول راعي سوق الحمام بعد اذنكم بأدخل المزرعة مرتن ثانية بأروح دورة المياة وأنتم بكرامه ..

أثره داخل يبي يسرق من الحمام !!

وهو يروح يمر من عند باب الحمام ويدور عليه ويبتل لشبوك الحمام ويختل لا يشوفه العامل ويوم وصل باب شبك الطيور ويجي بيفتحه مدري فتحه وهو يسمع له هاك الشخييير أثره الكلب جايه منطلق يزبد ويرعد ولا ينبح الأقشر يبي ينهي حياته !!

وهو ينطلق مثل الصاروخ ويصيح (ياااااوك يا ولد فكوني منه ) وما في وجهه إلا دورة المياة وهو يدخلها ويصك الباب والكلب يصدم فيه من قو الحدم

وراعي المزرعة راح ورفيقي راح والعامل يشتغل بعيد في النخل ويرجع غرفته ما يروح قسم الضيافة يقول ويجلس الرجال بالحمام يوم كامل والكلب طبعه ما ينبح جلس عند الباب ان طلع ذبحه ولا بيحتري راعيه لين يجي

ويجيك راعي المزرعة من باكر ويشوف الكلب واقف عند الباب وش العلم وهو يصوت عليه الرجال وعرف بعدين انه رجع بيسرق لأن الكلب بقسم الشبوك وفيه باب يفصل بين المجلس وقسم الضيافة وباقي المزرعة يعني السروق مفضوح واعترف وجلس يتعذر وحالته حاله (بالحمام يوم كامل الله لا يبلانا) وقاله راعي المزرعة يسدك ما جاك واطلع ولا عاد أشوفك موطوط عندي فيذا


وعلى طاري السرق والحرامية الله يهديهم ويكفينا شر من فيه شر ..

هذا رجال يقول جبت لي عامل من الجنسية الباكستانية للمزرعة وأعلمه الشغل وما شاء الله نشاط وأمانة وشغل ذمة ..

المهم ويجي هاك اليوم واحد مقرود بيسرق من الغنم مدري الدجاج ويدخل يحسب العامل هندي لو يرفع عليه العصا انحاش .. يقول ويسمع الحس العامل وهو يطلع بعصاته معه عصا يقول عرضها يجي له شبر الله العالم هههههه

ويختل السروق ويعطيه على راسه وحده ولاه ما يبي إلا هي طاح مغشي عليه وهو يقوم ويربطه مضبوط من فوق لتحت وينطله بالمستودع ويقفل عليه ويرجع يرقد ههههههههه

وأجي من بكره الفجر ما شاء الله يشتغل ويزين هالسواقي للبرسيم يوم خلص من السواقي قال تعال وأمشي وراه المستودع يوم فتحه ولا هاك الآدمي المربط ههههههه

وش السالفة يا ولد قال هذا (خرامي كبير)

عاد مدري وش سوو له هم شالوه الشرطة ولا فكوه مير يقول قمت أخاف منه عقب هالسالفة دريت ان قلبه حجر وحلالي في أيدي أمينة

والعذر والسموحة كثرت عليكم الهرج ..


سبحانك اللهم وبحمدك، أشهد أن لا إله إلا أنت، أستغفرك وأتوب إليك.

والسلام عليكم ورحمة الله.

[سحاب نجد راعي شقراء]

يالله انك تسعد قلبه دنيا ودين وتختم له ولوالديه وحبايبه بالفردوس وكل مسلم

اسفرت ونورت وستهلت ومطرت بك ياصريح المقال الغالي الي احبه في الله

سالفه الكلب وراعيه انت خابرصايره موضه عند بعض الناس كلاب وقطاوه ورانب وبعضهم تصدق عندهم فار يربونه هههههه
هذا زمن العجايب
خل اعلمك بشي فيه مره شفت بنت صغيره تمشي مع ابوها على الممشا وشوف في يدها خيط ماسكته ويوم شفت ولا وش اشوف ارنب يركض قدامها هههههههه ولا يخاف ولا عنده في احد


ذكرت شي خلني اعلمك فيه ان قلتا زمن العجايب يصير ون قلتا زمن الجهل والتخلف يصير تصدق في اسواق طيبه الي جنب العويس فيه محل عطاره يبيع قمل

هههههههههههه هذا وش نسميه مالقيت له اسم الحمد لله رب العالمين والله يثبت عقولنا

ابا ارجع لسالفه الكلب
اذكر سنه من السنين ونا في نخلي في شقراء كل ماسير علي احد وجا يروح مالقا نعاله ولاهوب واحد ولا اثنين ولا ثلاثه الي صارت لهم هذي ويروحون حافين ونا اولهم زهابين الله يكرمك اصير توي شاريه وول لبسه ويوم طلعت ابي نعالي مالقيتهن وشتري ثانيات ومن بكرامدري وينهن
ونشد العامل ماعندي الا هو وشذا السروق وقول للعامل تبي اشتري لك نعال بس لا تجي نعال الناس

وهو يحلف ماجا شي
وصير ذهين ذاك اليوم وشتري لي باتا جديده وحطهن عند باب المجلس ودخل وفتح الدريشه شوي علشان اشوف السروق


ويوم خذت لي ساعه وشوف السلوقي الي عند باب المزرعه من براقبلي اعطيه ماء وكل وله شهرين ماراح مدري منهو له
المهم والله يعينا على المهم


ولا هذا السلوقي داخل مع باب الاستراحه وجاي يمي ونا اويق مادرا عني لاني ارصد للحرامي انت خابر
ومادريت الا يوم عض وحده من النعال وراح بها وخليه شوي يوم رجع مره ثانيه ويعض النعله الثانيه ويروح بها برا المزرعه في المكان الي احط له فيه اكل كله رمل ونا اراقبه مادرا عني ابي اشوف وشو يسوي



ويحفر للنعله في الرمل ويدفنها هههههههههههه لا يالوقي يالسروقي هذا جزاتي ونا اعطيك اكل وشرب
وقول للعامل رح جب المشط الحديد وممداني اجر المشط على الرمل الا يوم طلعت النعال كلهن وحطهن منداخل وكل من جاني اقوله قبل لا تروح تكفا تمر على المبسط صايرات بظاعه محل من كثرهن وقول مرو على النعال وكلن ياخذ الي له
شفتا تكفا اجل سلوقي يسرق النعال

[صريح المقال]

السلام عليكم ورحمة الله وبركاته ،،،

يالله انك تسعد قلبه دنيا ودين وتختم له ولوالديه وحبايبه بالفردوس وكل مسلم

اسفرت ونورت وستهلت ومطرت بك ياصريح المقال الغالي الي احبه في الله

الله يجزاك خير ويعافيك ..

أحبك الله الذي أحببتني فيه اخوي سحاب نجد راعي النخل

الله يرزقنا وإياك ووالدينا ووالديك والمسلمين أجمعين الفرودس الأعلى من الجنة.


.
.

خل اعلمك بشي فيه مره شفت بنت صغيره تمشي مع ابوها على الممشا وشوف في يدها خيط ماسكته ويوم شفت ولا وش اشوف ارنب يركض قدامها هههههههه ولا يخاف ولا عنده في احد

يا زينه مع الملوخية بعد خص لا صار بلدي مطلوق بالمزرعة يرعى في أحواض البرسيم وما تصيده إلا بالساكتون

وسلمني على هالبنية وابوها ما اشترو كلب نجس ولا يجوز تشريه وقامو يتمشون به مير الأرنب طاهر ومتى ما طفشت منه البنت هات لك حزمة ملوخية وخل المره تصلح لك أحلى (ملوخية بالأرانب) وقلها تكثر البصل

ذكرت شي خلني اعلمك فيه ان قلتا زمن العجايب يصير ون قلتا زمن الجهل والتخلف يصير تصدق في اسواق طيبه الي جنب العويس فيه محل عطاره يبيع قمل

آمنا بالله

يبيعون قمل ؟!!!

وش ذا الحتسي

ما يبون قردان نجمعها لهم في قارورة شرط بلديات وبريات مشروبهن دم نياق وسمان بالحيل ؟

هههههههههه الله يقطع شيطانك أجل يبيعون قمل ؟ ومن الخبلة اللي تشتريه ووشهو له ؟

ذكرتني في زمان مضى يوم كان القمل يتكاثر في روسنا كانت جدتي الله يقومها بالعافية تفلانا وحنا صغار وكل ما خذت سحبت لها واحد وحطته فوق ظفرها وذبحته بظفرها الثاني

هالحين الماء وافر يالله لك الحمد والشكر وشامبوهات وصوابين وهالجيل التالي ما عاد إلا يتروشون كل ثلاث ساعات من زود النظافة وسخانات وماء حار ونعمة كبيرة الله يرزقنا شكرها ويديم علينا نعمته ..

شفتا تكفا اجل سلوقي يسرق النعال

ايه سبحان الله هذي فطرة في الكلاب تدفن غنايمها

هو طبع في الكلاب إذا زاد أكله أو حصل أكل وهو شبعان يقوم يدفنه لوقت الحاجه وهذي فطرة سبحان الله.

بعض الكلاب يسويها عشان يحافظ على مهارته يعني يتدرب بالنعال وأنت بكرامه ومن يقرأ عشان ما ينسى الطريقة أو مدري عنه يمكن ريح الجلد يزوّلّه انها لحم هههههههههههه

والله يجزاك خير على إحسانك له وطبيعي ما راح يخليك وأنت تحسن له فالوفاء من طبع الكلاب !

.
.

على طاري البوليسي سالفتك الأولى توي أتذكر واحد الله يستر علينا وعليه مغنيه الله وعنده مصانع مدري مستودعات المهم انه خايف عليها ولا يبي يدفع رواتب عمال قام واشترا له كلب من ذا اللي يسمونه بوليسي توه ما تعلم ويدفع فيه خمسة الآف مدري أكثر ويجيبه ويحطه عند مستودعاته ويربطه بهاك السلسلة ويروح عنه يقول يوم جيت من بكره ولاهم جايين ومعطينه لحم وفاكينه بسلسلته الغالية وماخذينه الله لا يبلانا هههههههههه

هماه غالي ويعرفون قيمته سرقوه وخلو له المستودعات ما لمسوها

يالله لا تبلانا بس راح مضحاكة للناس كل من علمه قام يضحك

الكلب إذا والف على الناس ما عاد ينفع حراسه لازم يتوحش ما يوكله إلا راعيه والظاهر الكلب اللي بغى ياكلك متوحش ما يعرف إلا راعيه

.
.


نستودعكم الله الذي لا تضيع أمانته.

سبحانك اللهم وبحمدك، أشهد أن لا إله إلا أنت، نستغفرك ونتوب إليك.

والسلام عليكم ورحمة الله.

[راجي الكريم]

ههههههههههههههههههههههههه
في الدوام وتوني متهاوش مع المدير والنفسية دمار ويامرني الله واقرا سالفتك
ضحكت لين دمعت عيني
الله يوسع صدرك بالعافية

[Al3rands]

ههههههههههههه بياع قمل عاد