صبحكم الله بالخير الجميع .
اذكر انه في شهر شباط من عام 1992 من القرن الماضي جا منخفض جوي محمل
بالامطار استمر حوالي 5 اياااام ما شاء الله مطر غزير قال خبير الارصاد الجويه .
انها كمية المطر اللي كانت في المنخفض الجوي بلغت 70 ملم في 5 ايااام .
بعد هالمنخفض بحوالي 5 اياام اخذت اجازه من العسكريه ورحت للديره حبيت اطلع جوله حول الديره .
على صهوة حصاني اليحموم والد حصاني الاغر .
فقالي خالي : يبه لا تبعد عن الديره ترى شهر شباط ما عليه رباط .
قلت له : توكل على الله ركبت اليحموم وطلعت ابعدت مسافه قدرتها حوالي 7 كلم .
عن الديره كان ذاك اليوم خالي من الغيوم ومشمس ارتديت فوق الثوب بلوزه شتويه .
خفيفه وعلى هاذ البعد عن الديره في احد الوديان ما لاحظت الغيوم السودا البعيده .
المحمله بالامطار تجمعت الغيوم وبدا لمع البرق ودوى صوت الرعد ونزل المطر .
وبدا الهوا البارد يصكني لكزت حصاني واخذت طرف الوادي وطلعت من مجرى السيل
قبل ما يبدى .
التصمت بشماغي وطردت بالحصان لاجل ارجع بسرعه للديره لكن هيهات ارجع بسرعه
الطريق فيه مناطق وعره ما اقدر اطرد بالحصان فيها .
وصلت منطقه وعره واضطريت امشي بالحصان على مهل اخذ وقت معي وقت
حوالي 10 دقايق المطر يتساقط علي وعلى الحصان والهوا البارد يصكني من جميع
الجهات وتبللت هدومي لكن ما في مجال إلا ارجع للبيت .
طلعت من المنطقه الوعره لمنطقه سهليه لكن ما في مجال اطرد بالحصان الخوف
يتزحلق الحصان لانها الارض طينيه واحتمال انه الحصان يتزحلق وارده 100% .
لين طلعت من الارض الطينيه اخذت وقت قدرته حوالي 10 دقايق .
كنت اسابق الوقت لاجل اوصل البيت بسرعه .
وصلت طريق زراعي مرصوف بالحصى طوله حوالي 3500 متر حينها دفعت اليحموم .
انه ينطلق باقصى سرعته خلال طرد الحصان كان المطر يزيد نزوله وقطراته كبيره .
ناهيكم عن الهوا البارد اللي يصكني واحس انه يضرب العظم .
وصلت نهاية الطريق الزراعي شديت لجام اليحموم توقف لحظات وتركته يمشي بعجله
شوي لانها الطريق مسفلته وصلت بيت خالي ودخلت بالحصان حوش البيت .
كان خالي يستعد انه يشب نار كان يكسر فروع الحطب الجافه ويحطها على المنقل .
داخل تنكه كبيره مفتوحه من الطرفين طرحت السلام عليه رد السلام وجاني بسرعه .
نزلت عن الحصان كانت هدومي مبلله وصل البلل لهدومي الداخليه وحصاني غرقان
بموية المطر سحب الحصان وربطه داخل حظيره مسقوفه فيها فرس خالي .
قالي : يبه الله يرضى عليك قلت لك لا تبعد عن الديره هاذ شهر شباط روح بدل هدومك
توجهت للبيت طلعت بنت خالي وشافتني مبلول رجعت بالحال للغرفه سمعت صوت حريم
ناظرت باب الغرفه اذا شايبتي الله يحفظها وزوجة خالي واقفات يناظروني
قالت لي زوجة خالي : تعال بسرعه يمه ادخل البيت وبدل هدومك المبلوله من المطر .
دخلت وطرحت عليهم السلام فردو السلام جتني بنت خالي .
وقالت لي : روح الغرفه هناك تلاقي منشفه وهدوم نظيفه بدل هدومك وعطني هدومك
المبلوله
دخلت الغرفه تنشفت وبدلت هدومي عطيتهم الهدوم المبلوله ورحت لخالي .
كان ينشف حصاني من موية المطر :
قلت له : يبه انا اشب النار وانشف الحصان من موية المطر .
رد علي : يبه البرد ما هو بزيين للحصان كنت تطرد فيه سخن جسمه .
وبنفس الوقت كان المطر ينزل عليه والمطر بارد هاذ يصيبه بصدمه احتمال انها تقتله .
بديت اشب النار واحط قطع حطب كبيره واحرك التنكه لاجل الجمر يتساقط في المنقل .
والحطب اللي ما اشتعل زيين يشتعل ويصير جمر تركت النار ورحت لخالي وصرت
اساعده بتنشيف الحصان وأرد ارجع للنار اشبها من جديد واحط قطع الفحم الكبيره
والجفت ( مخلفات ثمار الزيتون بعد عصر الزيت منها ) ظليت اروح للحصان وارجع
للنار لين تنشف الحصان وصارت النار جاهزه وكلها جمر احمر .
قالي خالي : الله يرضى عليك يبه علف الحصان وخلنا ندخل المنقل للديوان .
علفت الحصان واسقيته وحملت المنقل مع خالي وادخلناه للديوان وحطينا دلال القهوه
حوله غلقت باب الديوان بعد حوالي ساعه كان جو الديوان عبق بالحراره .
ظليت طول الليله ذيك افكر بالحصان وما عرفت طعم النوم من قلقي عليه وما أن طلع
النهار قمت بسرعه رحت اتفقده حين قربت من الحظيره صفرت للحصان .
صهل لي رحت بسرعه للباب وفتحته كان حصاني طليق في الحظيره دخلت عنده .
حطيت يدي على رقبته وصرت امسحها بيدي كان يقرب فمه من راسي ويشد شماغي
عن راسي قلت له : خشمك لقدام خشمك لقدام مد راسه حطيت قبله على جبينه .
وقلت له : العذر والسموحه على ما بدر مني امس بحقك خليتك تمشي تحت الطل والمطر بجو بارد
جبت العلف وحطيته له وجبت المويه في ماعون كبير وحطيتها قدامه .
اذا صوت خالي يقولي : صباح الخير يبه .
ناظرته وقلت : صباح النور يبه رحت عنده ومسكت يده لاجل احب عليها سحبها .
وقالي : الله يرضى عليك يبه حصانك ما عليه إلا العافيه والحمدلله .
بعد ذيك الحادثه ما طلعت مشوار وابعدت عن الديره على ظهر حصاني بجو بارد وماطر .
وسلامتكم يالربع .
رد مع اقتباس