السلام عليكم ورحمة الله وبركاته .
مسيكم بالخير الجميع .
حين بلغت من عمري 25 صارت مشكله في الديره كنت طرف فيها وصدر علي حكم ( جلوه ) عن الديره مدة الجلوه سنه كامله .
طلبنا مهله مدتها 4 ايام لاجل ارتب اموري وافقوا الربع على هالمهله .
في صباح اليوم اللي تقرر فيه اغادر الديره تجمعت حريم العائله في بيتي واخوالي واولادهم كنت اشوف دموع الحريم تنسكب على وجوههم .
خاصه شايبتي وامي بالرضاعه ( خالتي ) خوالي كانو يوصوني الوصايا الزينه .
قالي خالي ابو حاتم : يا حمود المثل يقول يا غريب كون اديب ربيتك على الادب والحشمه والاخلاق الطيبه
ان لاسنك شخص لا ترد عليه تعوذ من الشيطان الرجيم اعوذ بالله من الشيطان الرجيم استغفر الله وامسح وجهك بالرحمن .
استغفر الله العظيم من كل ذنب عظيم واتوب اليه .
قلت له : توكل على الله يبه وصاتك احفظها وامشي فيها .
جا الرياال اللي كانت جلوتي عنده ودعت ربعي وحبيت على ايدين والدتي وخالاتي وحريم العائله الكبيرات في السن
طلعت مع الرياال في سيارته .
فقال له خالي : ما اوصيك عليه يا ابو متعب تراه غالي علي قطعه من الكبد . ربيته من هو عمره سنتين وانت اخبر بالسالفه .
رد عليه ابو متعب : يا ابو حاتم تراه مثل ولدي متعب توكل على الله .
حين مشى ابو متعب بالسياره ناظرت الديره بمراية السياره لين غابت عني عيوني تهيا بيت شعر للشريف الرضي حين قال
- وَتَلَفّتَتْ عَيني، فَمُذْ خَفِيَتْ
- عنها الطلول تلفت القلب .
ديرة ابو متعب تبعد عن ديرتنا حوالي 120 كيلومتر طلبت منه اسكن في بيت لحالي فوافق جزاه الله كل خير .
اعطاني بيت على طرف حديقة بيته مكون من غرفتين ومطبخ ودورة مياه وانتم بكرامه وله مدخل خارجي .
في ذيك الايام كان الاجهزه الخلويه قليل من الناس يمتلكها لكن ظليت على تواصل مع الاهل عن طريق التلفون .
جلست مدة 3 ايام عنده وبعدها توجهت لوظيفتي في العسكريه غبت حوالي شهرين ورجعت في اجازه مدتها 3 ايااام .
تغديت عند ابو متعب وتوجهت لمسكني الجديد فتحت التلفازعلى قناه كان تعرض مسلسل بدوي وسمعت شاعر يقول قصيده على الربابه قال فيها .
يا عين كثر الحزن والهم جدد النوح .
قلبي تجرع البين ومر الليالي .
اضحك مع الخلان والقلب مذبوح .
على اصيلن زوع في المرقاب عالي .
النشمي لن نصيته وعنده الزل مسموح .
غير الصهيل وصوت الصدى ما بقالي .
نار الهوى لهبها دمع وجروح .
وحطبها سود النوايا ودهري نوالي .
حينها ضاق صدري وهزني الوجد والشوق والحنين للاهل والربع والديره حين شارف الوقت على الغروب
وسمعت اذان المغرب توجهت للمسجد صليت المغرب وما عدت احتمل ضيق الصدر طلعت اتمشى .
وصلت مراح حلال صاح علي راعي الحلال من هناك من انت يا ريال ؟
قلت له : جار ابو متعب .
رد علي : حياك الله افلح على المعازيب .
رحت عنده وجلست معه ومع شايبه وسولفنا حوالي ساعتين وبعدها استأذنت منهم ورجعت للمسكن .
ظل الشوق والحنين يراودني وما في منه فكاك ما عرفت طعم النوم في الليل .
ثاني يوم قلت لابو متعب : الشوق والحنين ذبحني يا ابو متعب .
رد علي : ما ترضى تكون جاري ؟
رديت عليه : والله انك نعم الجار ونعم الرجااال .
قلت له : يا ابو متعب ودي اروح للديره ما ظل عندي صبر خلص كفاها الباري .
ردت علي زوجته من خلف الباب وقالت : خلك راكز وركين الرجال تبان في الشدايد والامور الصعيبه .
قالي ابو متعب : ودك تصغرني بين الريااييل ترضاها لي ؟
رديت عليه : يخسى ويخسى شارب اللي يصغرك انت مقامك كبير ومعروف . اروح للديره واناظرها من بعيد . من بعيد يا ابو متعب .
نادى على 2 من اولاده وقال لهم : تروحون معه وترافقوه للجبل يناظر ديرته من بعيد من فوق الجبل وترجعوه معكم .
طلعنا في السياره وتوجهنا لمنطقه فيها جبل جلسنا على قمة الجبل وناظرت ديرتي لكن لان الوقت كان بعد المغرب ما شفت الا اضواء البيوت .
فصرت كل اجازه اروح الجبل واجلس اناظر ديرتي الريال ابو متعب كان دوم يرسل اهل بيته قبل اجازتي ينظفون مسكني ويرتبونه .
ما قصر بحقي وانا جار له الله يجزاه كل خير .
في ليله من ليالي الشاء البارد حين شفت البرق ودوى صوت الرعد تذكرت مطلع قصيده للامير محمد بن احمد السديري
اللي يقول فيها مطلعها
بداجي دجا الديجـور هلـت مدامعـي .
على وجنتي والجفـن للنـوم حاربـه .
بليـلٍ سنـا بـرقٍ غشانـي بنـوره.
غطا ما وطا وآمر غياهـب سحايبـه .
وتذكرت الربع في العسكريه قلت في نفسي الله يهونها عليكم باكر في التدريب تحت المطر .
اخر اجازه لي عنده قلت له : يا ابو متعب بيض الله وجهك ما قصرت وافي وكافي باقي لي شهرين وارجع للديره .
ودعته ورحت لوظيفتي غبت شهرين وكنت اعد الساعات والايام والاسابيع لاجل ارجع للديره حين انقضى الشهرين وزدت عليهم اسبوع .
توجهت للديره اسابق الوقت حين وصلت الديره لقيت الاهل والربع متجمعين في حوش البيت حين نزلت من السياره طلعت الزغايد من حريمنا .
واطلاق النار من الرياييل واذكر حينها اخوي حاتم عطاني سلاحه مسدس ضربت 14 طلقه كل اللي في مشط الرصاص .
وبديت احب ايدين اخوالي وانتقلت لوالدتي وخالاتي وحريمنا الكبار في السن خاصه عمتي الشايبه ام صالح اللي بكت بحرقه وانا احب على ايدنها .
وساوا خالي يومها غدا للجميع 5 ذبايح ما شاء الله .
وسلامتكم يالربع
ان شاء الله السالفه تنال رضاكم .
15 نوفمبر 2015 - 16:514 نوفمبر 2015 - 21:27
 |
رد مع اقتباس
