مسيكم بالخير الجميع .
في احد ليالي الصيف بعد نص الليل سمعت حصاني يصهل قلت لنفسي
اذا الذيب يهرول عبث حصاني ما يصهل عبث .
قمت من فراشي وما شغلت الاناره وقفت جنب الستاره وناظرت من طرفها
لاحظت وجود فرس لونها ازرق حمامي في حوش البيت .
طلعت واقتربت من الفرس كان حبل رسنها مقطوع جبت حبل جديد
وربطته برسنها وسحبتها لمربط قريب من مربط حصاني
جبت جركن مويه وحطيته قدامها يتسع لحوالي 4 لتر مويه فشربته
رديت جبت لها جركن ثاني شربت حوالي نصه بعدها جبت علف وحطيته في المذود
تفقدت هالفرس ما شفتها قبل هالمره في ديرتنا
قلت في نفسي وكاد انها فرس جديده في الديره تركتها تاكل ورجعت لفراشي
في وقت صلاة الفجر قلت لخالي ابو حاتم
يبه لفتني فرس بعد نص الليل اول مره اشوفها اللي ينشد عنها يلاقيها عندي
في الصباح تفقدت هالفرس اذا فيها علامه او جرح او عذروب .
جربتها في الطراد ما شاء الله هبوب الريح سريعه بالحيل
نشرنا الخبر في الديره ما احد جا نشد عنها .
توكدت انها هالفرس غريبه عن الديره رحت لمركز الشرطه وابلغت عنها .
مضى على هالفرس مدة حوالي شهر عندي لقحت من حصاني اليحموم
في ليله وحنا بالديوان قالي شايب من العشيره .
يا ابو ظاري الفرس صار لها سنه عندك تقدر تتصرف فيها
رديت عليه : اذا لفاني باكر رياااال ينشد عنها ويش يكون موقفي قدامه ؟
فقال هالشايب لخالي : يا ابو حاتم اثمرت تربيتك في ابو ظاري .
خالي قال : الحمدلله هذا من فضل ربي .
بعد سنه ولدت الفرس مهر لونه اصفر في جبينه طبعه بيضا ومحجل ارجوله الاربع
اسميته المشهر ذات يوم توقف رياال غريب قدام بيتي وطلب مني زجاجة مويه لاجل يشرب
دخلت البيت وجبت له المويه اعطيته المويه بعد ما شرب وحمدالله .
نشدني: لمن هالفرس الكحيله ؟
رديت عليه : لراعيها .
قال : هاذ فرسي صارلي اكثر من سنه ادورها .
قلت له : ابي شيء يثبت لي انها فرسك .
قام هالريال صرخ طويسه طويسه قامت الفرس دارت وجهها صوبه
وصارت تصهل قطعت حبل الرسن وجت عنده وصارت تشمم وجهه .
قالي : ويش اكثر من هاذ يا الغانم ؟
طلبت منه يدخل البيت ربطت الفرس ودخلنا البيت .
قلت له : اسمع يا اللحيه الغانمه ابي ناس من ربعك يعرفون عليك
وتاخذها الله يطرح لك البركه فيها .
دقيت على خالي ابو حاتم وتعرف على هالريال وقاله نفس كلامي
قال الريال : زين باكر موعدنا عندك في بيتك هاذ ومعي ريايييل من ربعي
بعد ما تغدى الرياال وتقهوى ودعني ورجع لديرته
ثاني يوم تجمع عندي خوالي وبعض شيبان الديره
لفانا الريااال ومعه بعض اهله وربعه
جلسنا في مجلس الرجال سولفنا والربع اكدو لنا انها هالفرس تخص هالريال
والرجال جاب معه اوراق سلالة الفرس .
بعد الغدا سلمت الريال الفرس ومهرها المشهر وراح في حال سبيله .
قلت للربع : الحمدلله تريحت كانت امانه ثقيله علي رجعت لصاحبها
في اليوم الثاني كنت في حوش البيت وعندي خوالي وبعض الجيران
اذا الريال رجع ومعه الفرس والمهر .
قالي : يا اللحيه الغانمه امس اخذنا الهرج ونسيت اسألك
تبي الفرس خذها تبي المهر خذه ليته الف صبار بركه عليك
قلت له : ما ابي لا الفرس ولا المهر .
قام الريال يرمي عقاله عن راسه فزعو الربع لاجل يحطون عقاله على راسه
وقال : اسمعوني ما يرجع عقالي على راسي إلا حين هالريال ياخذ الفرس او مهرها
قلنا خلص توكل على الله خالي ابو حاتم حط عقال الريال على راسه .
قلت للريال : عطني المهر طلع الريال بسيارته وانزل المهر
وقال : ليته صبار بركه عليك يعطيك خيره ويكفيك شره .
جلس المهر عندي سنتين عسفته وطوعته .
زارني يوم صديق لي ورفض انه ياكل او يشرب شيء عندي إلا حين
اوافق على بيع المهر له واطلب السعر اللي يعجبني
فبعت المهر له بمبلغ 3000 دينار .
وقام صديقي دفع المبلغ واخذ المهر الله يطرح له البركه .
سويت اوراق سلاله للمهر لين راعي الفرس ام المهر جاب اوراق سلالتها .
وسلامتكم يا الربع
صوره تعبيريه .