= القصائد المشاركة في مسابقة مكشات الشعرية =

[ريف النشاما]

قصيدة الشاعر /راعي الجير

ربعي هـــــلي ياكاسبـــين النوامــــيس = وش حيلة اللي ضايقن خاطره عمس
يشكي الهموم امن الليالي المعـــابيــس = باكر مثل قبله على الابله وامس
لافرق غير اللي سوات المحاميـــــــس = مع بنها الاشقر تكوى من الحمس
هذي علوم اللي بعيد المرامـــــــــــيس = خذا من الايام معلومه ودرس
لاضاق صدره فيتعوذ من ابليـــــــس = ويترك صديق السو ومطاوع النفس
ويقني الحرار التامات القرانيـــــــــس = اللي يونس شوفها مطلع الشمس
حرش الكفوف النادرات المقابيس = طرح السنه ماوسرت بربع وخمس
مع خوتن مايعرفون الدنافيس = وعلومهم زينه ولافيهم النجس
احد على الشبة واحد علق التيس =واحد يدوج الخد ويشوف ويعس
في خايعن معشب براد ونسانيس = فيه ام سالم ترفع الصوت والحس
يطرب لها من فيه هم وهواجيس = ولاحداه الدين والحال مفلس
ومعهم حلال القوم صنع الاباليس = من وارد اليابان والخشم الافنس
صمم على رقي الصعب والتضاريس = يمشي الوعر والطين والحزم والطعس
وختامها عد الحبر في القراطيس = صلوا على من علم الجن والانس

[ريف النشاما]

قصيدة الشاعر/ معطاب

لاضاق صدري شلت صفر المعاميل = ودورتلي قفرٍ من الناس خالي
فوق ابيضٍ يبري الكبود المعاليل= توه من اليابان جبته وجالي
ليا ركبته كنك على شرد الخيل = من نوع لاندكروز وافي الخصالي
ياكن صوته لانقرته هماليل= من عقربية هلت الما وسالي
نسرح عليه الصبح او تالي الليل=ننصا ديار القوم اهل الشمالي
وحنا دلايل ماتدور دواليل = خطو العيال مميلين العقالي
خوة نشامى الرجال الحلاحيل=تسوى من الدنيا كثير الحلالي
وفي مهمه قفرٍ قد عله السيل = شبيت لي ضوٍ يزيد اشتعالي
وزينتلي كيف من البن والهيل = من العرف ناقيها من السوق غالي
مع زعفرانٍ والشمطري ليا قيل =ياكن لونه لااندلق ثم مالي
دم الغزال ليا انطلق له شخاتيل =ومن دونه الضيحه بعيد المنالي
درجله الرماي وابعد لها الميل = من خوف لاترتخي في الرمالي
ولااخذتلي منها خمسة فناجيل = يزين بدع القاف مماطرالي

[ريف النشاما]

قصيدة الشاعر /مروق

مكشات لي يومي ..اعيشه بمكشات =مع رفقة" علومهم غانمتي
هذاك متزهب وهذاك مابات = وذولا جماعة ينطرون الصلاتي
مع شبة المجمار ودلالا ذربات = والهيل ريحه باين بالعباتي
ماعندهم غيبه ولاعلوم فسلات = هروجهم تبهج وكله حلاتي
واذا بغيت الشور تجيك فزعات =شيء موثق مايجيبه هقاتي
واذا بحلت بشيء جولك زرفات = كل يقدم خدمته بالرهاتي
والسوق قايم والمبايع حراجات = من كل شكل ولون تلقى البغاتي
واذا انفقد لك شيء لاتقول هيهات = كل معك فزاع لو كان شاتي
والفن له بالمكاشيت حزات = رح لم قسم الكام واسمع وصاتي
تلقى تصاوير" من كل الاشتات = متبين فيها جميل" وهاتي
والمشرفين اللي يديرون بسكات = تطلاهم البيضاء بزين السواتي
وختامها صلو على سيد الذات = عداد ماهل الوبل بالفلاتي

[ريف النشاما]

قصيدة الشاعر/ رش السحاب

الله اللـّي مـحبـبني ضـــــــــريّه= وجبال طخفه وهرمول وسلام !
لها بــنفسي معــزّه داخلــــــــيّه= ومالي بها ، لاحلال ولا حرام
احب فيها الفضاء وارضٍ عذيه=واحب لاجا من القبله غمام
وهبت شذا ريح الازهار النديه=وغنّا على نايد السدره حمام
وشبيت نار ٍ بجال الضلع حيه=يجلي سناها دياجير الظلام
وطرّفت مــــــن جمرها للشاذليه=وطاب السمر مع رفيعين المقام
هذي طراة الزمن ساعـــــه هنيه=والعمر يمضي وربك ما ينام
ودك والى الرجل وان قصّر خويه=ما يكثر من التأفف والملام
المرجله فعـــــــل خير وطيب نيه=وصبر ٍ على ما يغيض من الكلام
والرزق بيدين خلاّق البريه=اللي ومر بالصلاة وبالصيام

[ريف النشاما]

قصيدة الشاعر/ هاني السلوم

ياالله ياللــــــــــي ترسل الفلك بالريح= يــــــــامرسل محمد نذير ٍوهادي
أنزل علينا مــــــــــــــــايسروتفاريح= غيث ٍ يجينا قبل وقـــــــت البرادي
يفرح بـــــــــــه البدوان هم والفلاليح=ويفرح به اللـي بالحضروالبوادي
ويفرح به اللـــــي له فروق ٍمساريح= اللـــــــي حداه من العنا كل حادي
والسحب تضفي فوقنا قـــــبل ترزيح= الوابل الـلـــي صوت رعده ينادي
جو ٍتطيب به القلوب المـــــــــجاريح=جو ٍ خيالي بــالوصف غير عادي
ثم الوبل ينزل مـــــــن المزن ويطيح = والسيل يملا كل روضـــه ووادي
حتى نشوف النفل ينبت مـــــع الشيح =وريح الخزاما مـثل مسك ٍ وكادي
والارض خضراء تبهج القلب ويريح= والبرجاهزللمكاشت وبــــــــــادي
كنــــــه ينادي للمخاليق ويــــــــصيح=ياللي بوسط البيت وين انت غادي
عز الله انــــــــه يبعد الــــــهم ويزيح= شوفه منى روحـــي ويبري فؤادي