السلام عليكم ورحمة الله وبركاته .
ذات يوم قلت خالي ودي اطلع القنيص يبه تامرني بشيء
فقالي : الله معاك ويحفظك لا تطول غيبتك المغرب تكون هنا
لاحظت انه الوالد ما هو بطبعه كأن في شيء يشغل باله
نشدته : ويش فيك يبه ما انت بخواص اليوم في شيء؟
قال ما في شيء يا ولدي الله ييسر امرك ودربك لا توخر علي وتشغل بالي وقلبي عليك
ركبت حصاني وطلعت جنوب الديره وصلت منطقه كلها اشجار زيتون وقدامي سلسله حجريه ارتفاعها حوالي 180 سنتمتر فقام حصاني نصب اذانه وحمحم بصوت خفيف .
فقلت له : ويش شفت وصرت تحمحم ؟
فجأه حسيت بشي يخزني بقوه في الجهه العلويه اليسرى من صدري وسمعت صوت الفرقعه حطيت يدي على منطقة الوجع وناظرتها تصبغت يدي بالدم حينها عرفت اني تصوبت ادرت وجه الحصان صوب الديره ولكزته برجولي صار يمشي وكنت احس بالم رهيب لا يحتمل بعد شوي بسبب نزف الدم بديت احس بفقدان الوعي اخر شي اذكره مريت من جنب حجر كبير لونه احمر وبجنبه شجرة صنوبر معمره اذكرها من ايام طفولتي.
حين صحيت على نفسي اذا انا في كهف وحصاني داخل الكهف بعيد عني حوالي 4 امتار وجنبي سلاحي ومتاعي ما فقدت شيء فقلت في نفسي : وكاد اللي حطني هنا شهم لكن من هو ؟
تحسست مكان الجرح كان مكوي بالنار شعرت بالم حين تحركت ناظرت طرف الكهف كان الجمر ما زال موجود
صفرت لحصاني جا عندي وصار يتشمم وجهي وانا اتحسس جبينه بعد لحظات سمعت صوت ريال .
يقول موال من مقدمة مسلسل وضحى وبن عجلان :
علمييييييي بهواكم وانا سواح وعفراااااااااق ما لانام عيني وياااااااا وضحى يا زينة الملاح .
امسكت بسلاحي وعدلت جلستي وصوبت على باب الكهف حين دخل الريااال .
قلت له : مكانك من انت ؟
فقال : حمدالله على سلامتك يا الغالي .
حين سمعت صوته نزلت سلاحي كان خويي الشايب ابو مرزوق كان يحمل في يده ارنب مصلوخ
جلس جنبي وبدا يشب النار من جديد
فقالي : من صوبك يا ابو ضاري ؟
قلت : والله مدري يا ابو مرزوق لو عرفته قلت لك وانت خويي ورفيقي وبمقام والدي .
حين شبت النار حط الارنب عليها وصار يقلبه وهو يشوي الارنب سولفته اللي صار معي .
فقالي : كنت رايح اتفقد هالشجرات اللي غرستهم قبل فتره حين وصلت شجرة البلوط شفتك منكفي على ظهر حصانك والدم يغرق ثوبك سحبت حصانك وادخلته هنا نزلتك عن ظهر الحصان وشفت جرحك شبيت النار وفكيت راس رصاصه واحميت راس الشبريه على النار ونزعت الرصاصه فيها وهاذ هي رصاصة بندقية مارتيني حطيت ملح البارود في جرحك وحرقته حمدت الله انك فاقد وعيك حين كويت جرحك ترى الالم شديد ما تقدر تتحمله بعد ما تغدى نرجع مع بعض للديره .
حين استوى الارنب حطه قدامي
وقالي سمي بالله وتغدى خلك تشد نفسك .
قلت له : اتغدى لحالي ما يصير ؟
قالي : انا صايم توكل على الله تغدى انت.
كليت من الارنب وكان ابو مرزوق يسوي شاي شربت الشاي بعد ما تغديت وقلت الحمدلله .
بعد مضي حوالي ساعه تقريبا
قالي : الساعه الحين 6 بعد العصر خلنا نرجع للديره
اطلعنا الخيول وركبناها ورجعنا الديره حين دخلنا الديره فصار اللي يشوفنا يلحقنا
حين شافوا الدم يغرق ثوبي الابيض .
حين وصلنا البيت وشافني الوالد جا يركض
ووقع العقال والشماغ عن راسه وامسكني من ذراعي ونزلني عن ظهر الحصان وهو يقول
يا ستار يا رب يا دافع البلا يا الله إن شاء الله سليمه يا بوي وادخلني البيت .
وصار يسألني ويش صار يبه من اللي صوبك ؟
رديت عليه : مدري يبه مدري وسولفت له السالفه
صار ابو مرزوق يقول : يا الربع ما في شيء توكلوا على الله .
وانتشر الخبر في الديره انتشار النار في الهشيم واذا بيت خالي يتحشد فيه رجاجيل العشيره ناهيكم عن حريم العائله في القسم الثاني من البيت.
امي تقول لخالي وين حمود خلني اشوفه رحت للحريم حضنتني والدتي وخالاتي
واخواتي وكان بكا يقطع نياط القلب وعمتي ام صالح الله يرحمها تقول وين الغالي خلوني اشوفه حضنتي ودموعها تغرق وجهها.
قلت لهم : خلص يا حريمنا ما فيني شيء الحمدلله جرح بسيط .
الرجاجيل يقولون لخالي :
لزوم تعرف من صوب حمود الحين وتطلب حق ولد اختك وهو ولدك اللي ربيته
بعد وفاة والده الله يرحمه واموات المسلمين .
الامر ماهو هين يا ابو حاتم الامر ما هو لعب عياااال لا بد في الامر شيء حنا ما نعرفه .
خالي قال : الامر يحير يالربع بعلمي حمود ما له اعداء لو في شيء حمود ما يخفيه عني .
لكن لا بد يجي يوم ونعرف من اللي صوبه ولكل حادث حديث يفرجها الله .
قلت له وللربع : والله ورب البيت مالي عدو ولا سويت مشكله مدري مدري يالربع من اللي صوبني .
صديق طفولتي حميدي قال لوالدي:
لزوم قائد الوحده اللي نخدم فيها يعرف بالموضوع فقام والدي اتصل عليه وخبره السالفه بعد حوالي ساعه تقريبا وصلوا حين دخلوا
المجلس وكان في مجموعه من اهل الديره وقفت واديت التحيه العسكريه لهم ردوا بمثلها .
فقال قائد الوحده العسكريه سلامتك يا حمود وصافحني وعانقني واللي معه نفس الشيء جلسوا .
قال القائد : يا الربع اعذرونا ودنا نسولف مع حمود على انفراد فطلعوا الموجودين .
فقالي القائد : تعرف الربع الشرطه العسكريه ودهم يسألوك على اللي صار تجاوب بكل صراحه لا تخبي شيئ انت عسكري لزوم نعرف من اللي صوبك لاجل ياخذ جزاااه اللي يستحقه
قلت : ان شاء الله توكل على الله .
جلسنا حوالي ساعه وهم يسألوني وقالوا لزوم نروح المنطقه اللي تصاوبت فيها غيرت ثوبي ورحنا المكان كانت منطقه واسعه صاروا يفتشون عن ظرف الرصاصه بعد حوالي ساعه وشوي بدا الليل يرخي سدوله ما طلعوا بنتيجه قفلنا راجعنا للديره بعد حوالي 9 شهور تم اعلامي انه تم اغلاق الملف لانه ما وصلنا لنتيجه كل الطرق مسدوده .
بعد مرور حوالي 7 شهور عرفت اللي صوبني لكن ما قدرت اسوي له شيء لانه كان ضيف عندنا
هاذ اسولفها لكم بعد فتره ان شاء الله .
وسلامتكم يا الربع .
رد مع اقتباس